ନୂଆଦିଲ୍ଲୀ: ଭାରତର ଜନସଂଖ୍ୟାରେ ପ୍ରଥମ ଥର ପାଇଁ ପୁରୁଷଙ୍କ ତୁଳନାରେ ମହିଳାଙ୍କ ସଂଖ୍ୟା ବୃଦ୍ଧି ପାଇଛି। ଜାତୀୟ ପରିବାର ସ୍ୱାସ୍ଥ୍ୟ ସର୍ଭେ ଅନୁଯାୟୀ ଦେଶରେ ପ୍ରତି ୧୦୦୦ ପୁରୁଷରେ ମହିଳାଙ୍କ ସଂଖ୍ୟା ୧୦୨୦ ରହିଛି ।
ନୀତି ଆୟୋଗ ସଦସ୍ୟ (ସ୍ୱାସ୍ଥ୍ୟ) ଡ. ବିନୋଦ କୁମାର ପଲ୍ ଏବଂ କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ସଚିବ ରାଜେଶ ଭୂଷଣ ୨୦୧୯-୨୧ ପାଇଁ ଜାତୀୟ ପରିବାର ସ୍ୱାସ୍ଥ୍ୟ ସର୍ଭେ (ଏନ୍ଏଫ୍ଏଚ୍ଏସ୍-୫)ର ତଥ୍ୟପତ୍ର ପ୍ରକାଶ କରିଛନ୍ତି। ଏହାପୂର୍ବରୁ ୨୦୧୫-୧୬ରେ ହୋଇଥିବା ଏନ୍ଏଫ୍ଏଚ୍ଏସ୍-୪ରେ ପ୍ରତି ୧୦୦୦ ପୁରୁଷରେ ମହିଳାଙ୍କ ସଂଖ୍ୟା ୯୯୧ ଥିଲା |
ସର୍ଭେର ପ୍ରଥମ ପର୍ଯ୍ୟାୟରେ ଅନ୍ତର୍ଭୁକ୍ତ ୨୨ଟି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ ସମ୍ବନ୍ଧରେ ଏନ୍ଏଫ୍ଏଚ୍ଏସ୍-୫ ର ଅନୁସନ୍ଧାନ ଡିସେମ୍ବର ୨୦୨୦ରେ ଜାରି କରାଯାଇଥିଲା | ଦ୍ୱିତୀୟ ପର୍ଯ୍ୟାୟରେ ସର୍ଭେ କରାଯାଇଥିବା ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳଗୁଡିକ ହେଉଛି ଅରୁଣାଚଳ ପ୍ରଦେଶ, ଚଣ୍ଡିଗଡ଼, ଛତିଶଗଡ, ହରିୟାଣା, ଝାଡଖଣ୍ଡ, ମଧ୍ୟପ୍ରଦେଶ, ଦିଲ୍ଲୀ, ଓଡିଶା, ପୁଡୁଚେରୀ, ପଞ୍ଜାବ, ରାଜସ୍ଥାନ, ତାମିଲନାଡୁ, ଉତ୍ତରାଖଣ୍ଡ ଏବଂ ଉତ୍ତରପ୍ରଦେଶ। ଦେଶର ୭୦୭ ଟି ଜିଲ୍ଲାର ପ୍ରାୟ ୬.୧ ଲକ୍ଷ ନମୁନା ପରିବାରରେ (ମାର୍ଚ୍ଚ ୨୦୧୭ ସୁଦ୍ଧା) ଏନ୍ଏଫ୍ଏଚ୍ଏସ୍-୫ ସର୍ଭେ କାର୍ଯ୍ୟ ହୋଇଥିଲା । ଏଥିରେ ଜିଲ୍ଲା ସ୍ତର ପର୍ଯ୍ୟନ୍ତ ପୃଥକ୍ ଆକଳନ ପ୍ରଦାନ କରିବା ପାଇଁ ୭୨୪,୧୧୬ ମହିଳା ଏବଂ ୧୦୧,୮୩୯ ପୁରୁଷଙ୍କୁ ସାମିଲ କରାଯାଇଥିଲା ।
ଜାତୀୟ ସ୍ତରରେ ପ୍ରତି ମହିଳାଙ୍କ ହାରାହାରି ଜନ୍ମଗ୍ରହଣ କରିଥିବା ଶିଶୁଙ୍କ ସଂଖ୍ୟା ମଧ୍ୟ ୨.୨ ରୁ ୨.୦କୁ ହ୍ରାସ ପାଇଛି।