ଭାଗଲପୁର: ଗୁରୁବାର ରାତିରେ ବିହାରର ଭାଗଲପୁରରେ ଏକାଧିକ ବିସ୍ଫୋରଣ ଘଟିଛି । ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ସମଗ୍ର ସହର ଥରି ଉଠିଥିଲା। ଏହି ଭାଗଲପୁର ବିସ୍ଫୋରଣ ଘଟଣାରେ ଚାରି ଜଣଙ୍କର ମୃତ୍ୟୁ ହୋଇଥିବା ବେଳେ ୧୨ ଜଣ ଗୁରୁତର ଆହତ ହୋଇଛନ୍ତି। ଭାଗଲପୁର ରେଞ୍ଜର ଡିଜି ସୁଜିତ କୁମାର କହିଛନ୍ତି ଯେ ପ୍ରାଥମିକ ତଦନ୍ତରୁ ବୋମା ତିଆରି କରିବା ବେଳେ ଏହି ବିସ୍ଫୋରଣ ଘଟିଥିବା କୁହାଯାଇଛି। ଫରେନସିକ୍ ଯାଞ୍ଚ୍ ପରେ ପ୍ରକୃତ କାରଣ ଜଣାପଡିବ ବୋଲି ସେ କହିଛନ୍ତି ।
ଏହି ଘଟଣା କୋଟୱାଲି ପୋଲିସ ଥାନା ଠାରୁ ୧୦୦ ମିଟର ଦୂରରେ ଥିବା ଏକ ଘରର ଘଟିଥିଲା | ଏହି ବିସ୍ଫୋରଣରେ ଏକ ତିନି ମହଲା ବିଶିଷ୍ଟ ଘର ଭାଙ୍ଗି ଯାଇଥିଲା। ଏଥିସହିତ ନିକଟସ୍ଥ ଦୁଇଟି ଘର ମଧ୍ୟ ଏହା ଦ୍ୱାରା ନଷ୍ଟ ହୋଇଯାଇଛି। ଘଟଣା ସମ୍ପର୍କରେ ସୂଚନା ପାଇ ଡିଜି ସୁଜିତ କୁମାର, ଡିଏମ୍ ସୁବ୍ରତ କୁମାର ସେନ୍, ଏସଏସପି ବାବୁ ରାମ ଭାରୀ ପୋଲିସ ବାହିନୀ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ।
ଏହି ଘଟଣାରେ ଆହତ ହୋଇଥିବା ଲୋକଙ୍କୁ ଭାଗଲପୁରର ଜେଏଲଏନ ହସ୍ପିଟାଲ ମାୟାଗଞ୍ଜରେ ଭର୍ତ୍ତି କରାଯାଇଛି। ପ୍ରଶାସନ ପକ୍ଷରୁ ଏହା ମଧ୍ୟ କୁହାଯାଇଛି ଯେ ମୃତ୍ୟୁ ସଂଖ୍ୟା ମଧ୍ୟ ବଢିପାରେ। ସମ୍ପ୍ରତି ରିଲିଫ ଓ ଉଦ୍ଧାର କାର୍ଯ୍ୟ ସହ ପୋଲିସ ଏହି ଘଟଣାର ତଦନ୍ତରେ ଜାରି ରଖିଛି ।