ଗମ୍ଭୀର ଟିମ୍ ଇଣ୍ଡିଆ ପାଇଁ ଭଲ କୋଚ୍ ସାବ୍ୟସ୍ତ ହେବେ: ଗାଙ୍ଗୁଲି

ମୁମ୍ବାଇ: ଭାରତୀୟ କ୍ରିକେଟ୍ ଦଳର ପରବର୍ତ୍ତୀ ମୁଖ୍ୟ କୋଚ୍ କିଏ ହେବେ ସେନେଇ କଳ୍ପନା ଜଳ୍ପନା ଲାଗି ରହିଥିବା ବେଳେ ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ଏହି ପଦରେ ଜଣେ ଭାରତୀୟଙ୍କୁ ନିଯୁକ୍ତି ଦେବା ସପକ୍ଷରେ ମତ ଦେଇଛନ୍ତି । ଗାଙ୍ଗୁଲି କହିଛନ୍ତି ଯେ ଯଦି ଗୌତମ ଗମ୍ଭୀର ଏହି ପଦ ପାଇଁ ଆବେଦନ କରିଛନ୍ତି, ତେବେ ସେ ଜଣେ ଭଲ କୋଚ୍ ସାବ୍ୟସ୍ତ ହେବେ। କାରଣ ନିକଟରେ ଶେଷ ହୋଇଥିବା ଆଇପିଏଲ୍ ଟ୍ରଫି ବିଜୟ ବେଳେ ତାଙ୍କ ଭୋକ ଏବଂ ଆବେଗ ସ୍ପଷ୍ଟ ଦେଖାଯାଉଥିଲା |

ବିସିସିଆଇର ପୂର୍ବତନ ସଭାପତି ଗାଙ୍ଗୁଲି ଏଠାରେ ଏକ କାର୍ଯ୍ୟକ୍ରମରେ କହିଛନ୍ତି, ଦେଶରେ ପ୍ରତିଭାର ଅଭାବ ନାହିଁ। ତେଣୁ ସେ ଜାତୀୟ ଦଳ ପାଇଁ ଜଣେ ଭାରତୀୟ କୋଚ୍ ନିଯୁକ୍ତ କରିବା ସପକ୍ଷରେ ଅଛନ୍ତି।

ଗାଙ୍ଗୁଲି କହିଛନ୍ତି, “ମୁଁ ଜଣେ ଭାରତୀୟ କୋଚ୍ ସପକ୍ଷରେ ଅଛି । କାରଣ ଆମ ଦେଶରେ ଅପାର ପ୍ରତିଭା ରହିଛି। ଆମ ଦେଶରେ ବହୁତ ଦକ୍ଷ ଖେଳାଳି ଅଛନ୍ତି ଯେଉଁମାନେ ଭାରତୀୟ କ୍ରିକେଟ୍ ପାଇଁ ବହୁମୂଲ୍ୟ ଅବଦାନ ଦେଇଛନ୍ତି ଏବଂ ସେମାନେ ଏହି ବ୍ୟବସ୍ଥାର ଏକ ଅଂଶବିଶେଷ ହେବା ଉଚିତ୍। ”

କୋଚ୍ ପଦ ପାଇଁ ଦୌଡ଼ରେ ଥିବା ଗମ୍ଭୀର ଏହି ଭୂମିକା ପାଇଁ ଉପଯୁକ୍ତ ବ୍ୟକ୍ତି ହେବେ କି ନାହିଁ ପ୍ରଶ୍ନ କରିବାରୁ ଗାଙ୍ଗୁଲି କହିଛନ୍ତି ଯେ ସେ (ଗମ୍ଭୀର) ଆବେଦନ କରିଛନ୍ତି କି? କାରଣ ପ୍ରଥମେ ତାଙ୍କୁ ଆବେଦନ କରିବାକୁ ପଡ଼ିବ। ତା’ପରେ ହିଁ ସେ ଏହି ପଦ ହାସଲ କରିପାରିବେ | ମୁଁ ଭାବୁଛି ମେ ୨୭ ଆବେଦନ ପାଇଁ ଶେଷ ତାରିଖ ଥିଲା।ବିସିସିଆଇର ଏହି ସମୟସୀମା ବୃଦ୍ଧି କରିବାର ଅଧିକାର ରହିଛି । ଯଦି ସେ (ଗମ୍ଭୀର) ଆବେଦନ କରନ୍ତି, ତେବେ (କୋଚ୍ ପାଇଁ) ଜଣେ ବହୁତ ଭଲ ପ୍ରାର୍ଥୀ ହେବେ। ”

ବିଶ୍ୱକପ ବିଜେତା ଭାରତୀୟ ଦଳର ସଦସ୍ୟ ପୂର୍ବତନ ବ୍ୟାଟ୍ସମ୍ୟାନ୍ ଗମ୍ଭୀରଙ୍କ ନେତୃତ୍ୱରେ କୋଲକାତା ନାଇଟ୍ ରାଇଡର୍ସ ୧୦ ବର୍ଷ ପରେ ଆଇପିଏଲ୍ ଟାଇଟଲ୍ ଜିତିଥିଲା।

ଗାଙ୍ଗୁଲି କହିଛନ୍ତି, “ଯଦି ଗମ୍ଭୀର ଆବେଦନ କରିଛନ୍ତି ତେବେ ଆପଣ ନିଶ୍ଚୟ ଦେଖିଥିବେ ଯେ ସେ କେକେଆର୍ ପାଇଁ କିପରି କାମ କରିଛନ୍ତି। ଆପଣ ତାଙ୍କ ଜିତିବାର ଭୋକ ଏବଂ ଆବେଗ ଦେଖିପାରୁଥିବେ | ଯଦି ସେ ଆବେଦନ କରିଛନ୍ତି ଏବଂ ବୋର୍ଡ ତାଙ୍କୁ ଏହି ପଦ ଦେବାକୁ ନିଷ୍ପତ୍ତି ନେଇଛି ତେବେ ମୁଁ ଖୁସି ହେବି | ମୋର ବିଶ୍ୱାସ ଯେ ସେ ଏହି ପଦ ପାଇଁ ଜଣେ ଭଲ ପ୍ରାର୍ଥୀ। ”

ଭାରତୀୟ କୋଚ୍ ଦୌଡ଼ରେ ଗମ୍ଭୀର ସବୁଠୁ ଆଗରେ ରହିଥିବା ଚର୍ଚ୍ଚା ହେଉଛି । ଆସନ୍ତାକାଲି ଠାରୁ ଆରମ୍ଭ ହେଉଥିବା ଟି-୨୦ ବିଶ୍ୱକପ ପରେ ବର୍ତ୍ତମାନର କୋଚ୍ ରାହୁଲ ଦ୍ରାବିଡଙ୍କ କାର୍ଯ୍ୟକାଳ ଶେଷ ହେବ । ବିସିସିଆଇ ସଚିବ ଜୟ ଶାହା ମଧ୍ୟ ସୂଚାଇ ଦେଇଛନ୍ତି ଯେ ଭାରତୀୟ କୋଚମାନଙ୍କୁ ପ୍ରାଥମିକତା ଦିଆଯିବ।

ଗାଙ୍ଗୁଲି ଆହୁରି ମଧ୍ୟ କହିଛନ୍ତି ଯେ, ଆମେରିକା ଏବଂ ୱେଷ୍ଟଇଣ୍ଡିଜରେ ଖେଳାଯାଉଥିବା ଟି-୨୦ ବିଶ୍ୱକପରେ ଟାଇଟଲ ପାଇଁ ଭାରତ ଏକ ମୁଖ୍ୟ ଦାବିଦାର।