ଭୁବନେଶ୍ବରରେ କାର୍ତ୍ତିକ ପାଣ୍ଡିଆନଙ୍କ ପ୍ରଚାର : କିଛି କାମ କରିନଥିବାରୁ ସାଂସଦଙ୍କୁ ଟାର୍ଗେଟ

ଭୁବନେଶ୍ୱର – ବିଜୁ ଜନତା ଦଳର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ଭୁବନେଶ୍ୱରରେ ଦଳ ପାଇଁ ପ୍ରଚାର କରିଛନ୍ତି। ସେ କହିଛନ୍ତି ଯେ, ବିଜେଡି ଏକମାତ୍ର ରାଜନୈତିକ ଦଳ ଯିଏ କି ନିର୍ବାଚନ ଇସ୍ତାହାରରେ ମଧ୍ୟବିତ୍ତ ଲୋକମାନଙ୍କ ଉନ୍ନତିକୁ ସ୍ଥାନ ଦେଇଛି । ସମସ୍ତଙ୍କୁ ବିଏସକେୱଇରେ ସ୍ବାସ୍ଥ୍ୟ ସୁରକ୍ଷା ଯୋଗାଇ ଦେବ ଦଳ । ମଧ୍ୟବିତ୍ତ ଶ୍ରେଣୀ ଲୋକଙ୍କ ପାଇଁ ଏଭଳି ସୁବିଧା ଆଉ କେଉଁଠି ନାହିଁ ।

୨୦ ଲକ୍ଷ ଟଙ୍କା ପର୍ଯ୍ୟନ୍ତ ହାଉସିଂ ଲୋନ୍‌ ପାଇଁ ସୁଧ ହାର କମ୍‌ ରହିବ । ଏହା ମଧ୍ୟ କେଉଁଠି ନାହିଁ ବୋଲି ପାଣ୍ଡିଆନ କହିଛନ୍ତି। ଶିକ୍ଷା ଋଣରେ

ମଧ୍ୟ ସୁଧ ହାର କମ୍‌ ରହିବ । ସମସ୍ତ ସରକାରୀ ପରିବହନରେ ମଧ୍ୟବିତ୍ତ ମାନଙ୍କ ପାଇଁ ରହାତି ଦର ରହିବ ।

ପୁଅଙ୍କୁ ୧୨ ହଜାର ଓ ଝିଅଙ୍କୁ ୧୪ ହଜାର ଟଙ୍କାର ଛାତ୍ରବୃତ୍ତି ମିଳିବ ।

ମଧ୍ୟବିତ୍ତ ଲୋକଙ୍କ ମୁଣ୍ଡ ଉପରୁ ବୋଝ ହାଲକା କରିବା ପାଇଁ ଓ ସେମାନଙ୍କ ଖର୍ଚ୍ଚ କମାଇବା ଚିନ୍ତା କରି ମୁଖ୍ୟମନ୍ତ୍ରୀ ଏସବୁ ପଦକ୍ଷେପ ନେଇଛନ୍ତି ବୋଲି ପାଣ୍ଡିଆନ କହିଛନ୍ତି।

ମହାପ୍ରଭୁ ଓ ଆପଣମାନଙ୍କ ଆଶୀର୍ବାଦରେ ନବୀନ ପଟ୍ଟନାୟକ ପୁଣିଥରେ ଜୁନ ୯ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ।

ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଦସ୍ତଖତରେ ଓଡିଶାର ୯୦ ପ୍ରତିଶତ ଲୋକଙ୍କ ବିଜୁଳି ବିଲ୍‌ ଛାଡ ହେବ, ବସ୍ତିବାସିନ୍ଦାଙ୍କ ପାଖକୁ ଆଉ ବିଜୁଳି ବିଲ୍‌ ଆସିବ ନାହିଁ । ମଧ୍ୟବିତ୍ତ,ଗରିବ, ଚାଷୀ, ଯୁବପୀଢିଙ୍କ ସାଥି ହେଉଛନ୍ତି ମୁଖ୍ୟମନ୍ତ୍ରୀ । ସମସ୍ତଙ୍କୁ ଏକାଠି ନେଇ ନୂଆ ଓଡିଶା ଗଠନର ଲକ୍ଷ୍ୟ ରଖିଛନ୍ତି ମୁଖ୍ୟମନ୍ତ୍ରୀ । ବିଜେପି ୨୦୧୪ରେ କହିଥିଲା କ୍ଷମତାକୁ ଆସିଲେ ଡାଲି, ଖାଇବା ତେଲ, ପେଟ୍ରୋଲ ଡିଜେଲ ଦର କମାଇବେ, କିଛି କମିଲା କି ବୋଲି ପ୍ରଶ୍ନ କରିଛନ୍ତି ପାଣ୍ଡିଆନ ।

ଭୁବନେଶ୍ୱର ସାଂସଦଙ୍କ କର୍ତ୍ତବ୍ୟ କଣ ବୋଲି ପ୍ରଶ୍ନ କରି ପାଣ୍ଡିଆନ କହିଛନ୍ତି ଯେ, ବଡ ବଡ ପ୍ରକଳ୍ପ ଆଣିବାର ଥିଲା, ରୋଜଗାର ବଢାଇବା ପାଇଁ ସ୍କିମ ଆଣିବାର ଥିଲା । ହେଲେ ସାଂସଦ କିଛି କଲେ ନାହିଁ ବୋଲି ପାଣ୍ଡିଆନ କହିଛନ୍ତି।

ବାଙ୍ଗାଲୋର ଓ ଭୋପାଳର ବିଜେପି ସାଂସଦ ସେମାନଙ୍କ କ୍ଷେତ୍ର ପାଇଁ ୪୦/୫୦ ହଜାର କୋଟି ଟଙ୍କାର ପ୍ରକାଳ୍ପ ଆଣିଛନ୍ତି । ଆମ ସାଂସଦ କିଛି ଆଣିଲେନି ବୋଲି ପାଣ୍ଡିଆନ କହିଛନ୍ତି।

କ୍ୟାପିଟାଲ ରିଂ ରୋଡ୍ Capital ଆଣିବାର ଥିଲା । ରିଙ୍ଗ ରୋଡ ହେଲେ, ଭୁବନେଶ୍ବରର ସଂପ୍ରସାରଣ ହୋଇଥାନ୍ତା । ଏଇଟା କେନ୍ଦ୍ର ସରକାରଙ୍କ କାମ । ହେଲେ ଖଣ୍ଡେ ଇଟା ବି ପଡିଲା ନାହିଁ ବୋଲି ପାଣ୍ଡିଆନ କହିବା ସହ ସାଂସଦ ଭୁବନେଶ୍ବରକୁ ପଛକୁ ନେଇଗଲେ ବୋଲି ପ୍ରକାଶ କରିଛନ୍ତି।

ନିର୍ବାଚନ ଆଗରୁ ସାଂସଦ ମନ୍ଦିର ମନ୍ଦିର ବୁଲି ୱାଟର କୁଲର ବାଣ୍ଟୁଛନ୍ତି । ଭୁବନେଶ୍ବର ବାସିନ୍ଦାଙ୍କ କୌଣସି ଆଶା ପୂରଣ କଲେ ନାହିଁ । ଆମ ମୁଖ୍ୟମନ୍ତ୍ରୀଙ୍କର ଉଚ୍ଚକୋଟୀର ଚିନ୍ତାଧାରା ରହିଛି, କଳିଙ୍ଗ ଷ୍ଟାଡିଅମରେ ବିଶ୍ବ କପ୍‌ ହକି ପଡିଆ କରିଛନ୍ତି । ଭୁବନେଶ୍ବରକୁ ମେଟ୍ରୋ ଆଣୁଛନ୍ତି । ଅନ୍ୟାନ୍ୟ ଭିତ୍ତିଭୂମି ବିକାଶ କରୁଛନ୍ତି ।

ଉଭୟ ସାଂସଦ ଓ ବିଧାୟକ ପ୍ରାର୍ଥୀଙ୍କୁ ଶଙ୍ଖ ଚିହ୍ନରେ ବିପୁଳ ସଂଖ୍ୟାରେ ଭୋଟ ଦେଇ ମୁଖ୍ୟମନ୍ତ୍ରୀଙ୍କୁ ଆଶୀର୍ବାଦ କରିବାକୁ ଅନୁରୋଧ କରିଛନ୍ତି ପାଣ୍ଡିଆନ।