ମୁମ୍ବାଇ: ବହୁ ପ୍ରତୀକ୍ଷିତ ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍)ର ଉଦଘାଟନୀ ସଂସ୍କରଣ ଶନିବାର ଠାରୁ ଆରମ୍ଭ ହେଉଛି । ଏହି ଟୁର୍ଣ୍ଣାମେଣ୍ଟ ସହ ଭାରତୀୟ କ୍ରିକେଟରେ ଏକ ନୂଆ ଯୁଗର ଆରମ୍ଭ ହେବ । ନିଜ ଖେଳକୁ ପରବର୍ତ୍ତୀ ସ୍ତରକୁ ନେବା ପାଇଁ ଏହି ଲିଗରୁ ମହିଳା କ୍ରିକେଟର ଆବଶ୍ୟକ ଅଭିଜ୍ଞତା ହାସଲ କରିବେ । ଏହାଛଡ଼ା ମୋଟା ପାଉଣା ଓ ଗ୍ଲାମରର ଲାଭ ଉଠାଇବା ପାଇଁ ସେମାନଙ୍କୁ ଭରପୂର ସୁଯୋଗ ଦେବ ଏହି ଟୁର୍ଣ୍ଣାମେଣ୍ଟ । ମୁମ୍ବାଇ ଇଣ୍ଡିଆନ୍ସ ଓ ଗୁଜରାଟ ଜାଏଣ୍ଟଓ ମଧ୍ୟରେ ମ୍ୟାଚରୁ ଟୁର୍ଣ୍ଣାମେଣ୍ଟର ଶୁଭାରମ୍ଭ ହେବ । ଟିମ୍ ଇଣ୍ଡିଆ କ୍ୟାପଟେନ ହରମନପ୍ରୀତ କୌର ମୁମ୍ବାଇର ନେତୃତ୍ୱ ନେଉଥିବା ବେଳେ ଅଷ୍ଟ୍ରେଲୀୟ ଷ୍ଟାର ବେଥ୍ ମୁନୀ ଗୁଜରାଟର ଅଧିନାୟକ ଦାୟିତ୍ୱ ତୁଲାଇବେ ।
ଡବ୍ଲୁ୍ଲପିଏଲର ପ୍ରଥମ ସିଜନରେ ୨୩ ଦିନରେ ୨୦ଟି ଲିଗ୍ ମ୍ୟାଚ୍ ଓ ଦୁଇଟି ପ୍ଲେ ଅଫ୍ ଗେମ୍ ଖେଳାଯିବ । ମାର୍ଚ୍ଚ ୫ରେ ଲିଗର ପ୍ରଥମ ଡବଲ ହେଡର ଅନୁଷ୍ଠିତ ହେବ । ସେହି ଦିନ ବ୍ରାବୋର୍ଣ୍ଣ ଷ୍ଟାଡିୟମରେ ରୟାଲ ଚାଲେଞ୍ଜର୍ସ ବାଙ୍ଗାଲୋର ଓ ଦିଲ୍ଲୀ କ୍ୟାପିଟାଲ୍ସ ଏବଂ ଡିୱାଇ ପାଟିଲ ଷ୍ଟାଡିୟମରେ ଗୁଜରାଟ ଜାଏଣ୍ଟସ-ୟୁପି ୱାରିୟର୍ସ ମୁହାଁମୁହିଁ ହେବେ ।
ଟୁର୍ଣ୍ଣାମେଣ୍ଟରେ ମୋଟ ୪ଟି ଡବଲ ହେଡର ରହିବ । ଦିନ ମ୍ୟାଚ୍ ଅପରାହ୍ନ ୩:୩୦ରୁ ଏବଂ ସନ୍ଧ୍ୟା ମ୍ୟାଚ୍ ୭ଟା ୩୦ରୁ ଆରମ୍ଭ ହେବ । ଲିଗ୍ ପର୍ଯ୍ୟାୟର ଶେଷ ମ୍ୟାଚ୍ ୟୁପି ୱାରିୟର୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ମାର୍ଚ୍ଚ ୨୧ରେ ବ୍ରାବୋର୍ଣ୍ଣ ଷ୍ଟାଡିୟମରେ ଖେଳାଯିବ । ମାର୍ଚ୍ଚ ୨୪ରେ ଡିୱାଇ ପାଟିଲ ଷ୍ଟାଡିୟମରେ ଏଲିମିନେଟର ଅନୁଷ୍ଠିତ ହେବ । ମାର୍ଚ୍ଚ ୨୬ରେ ଟୁର୍ଣ୍ଣାମେଣ୍ଟର ଫାଇନାଲ ବ୍ରାବୋର୍ଣ୍ଣ ଷ୍ଟାଡିୟମରେ ଖେଳାଯିବ ।
ଡବ୍ଲୁପିଏଲର ପ୍ରଥମ ସିଜନ୍ ପାଇଁ ଅନୁଷ୍ଠିତ ନିଲାମରେ ପାଞ୍ଚ ଦଳ ଦିଲ୍ଲୀ କ୍ୟାପିଟାଲ୍ସ, ଗୁଜରାଟ ଜାଏଣ୍ଟଓ, ମୁମ୍ବାଇ ଇଣ୍ଡିଆନ୍ସ, ରୟାଲ ଚାଲେଞ୍ଜର୍ସ ବାଙ୍ଗାଲୋର ଓ ୟୁପି ୱାରିୟର୍ସ ଘରୋଇ ଓ ଅନ୍ତର୍ଜାତୀୟ ସ୍ତରର ବଛା ବଛା ଖେଳାଳିଙ୍କୁ କିଣିବା ପାଇଁ ନିଜ ପର୍ସ ଖୋଲି ଦେଇଥିଲେ ।
ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍)ର ଉଦଘାଟନୀ ସଂସ୍କରଣ ପାଇଁ ସୋମବାର ଖେଳାଳି ନିଲାମ ହୋଇଥିଲା | ପାଞ୍ଚ ଫ୍ରାଞ୍ଚାଇଜ୍ ୮୭ ଖେଳାଳିଙ୍କୁ ନିଜ ନିଜ ଦଳର ସ୍ଥାନ ଦେଇଛନ୍ତି | ସେମାନଙ୍କ ମଧ୍ୟରୁ ୩୦ ଜଣ ବିଦେଶୀ ଖେଳାଳି | ନିଲାମରେ ପାଞ୍ଚ ଦଳ ମୋଟ ୫୯.୫ କୋଟି ଟଙ୍କା ବ୍ୟୟ ହୋଇଥିଲା । ଦିଲ୍ଲୀ, ଗୁଜରାଟ ଏବଂ ଆରସିବି ସର୍ବାଧିକ ୧୮-୧୮ ଖେଳାଳି କିଣିଛନ୍ତି। ୟୁପି ଦଳ ୧୬ ଏବଂ ମୁମ୍ବାଇ ୧୭ ଜଣ ଖେଳାଳିଙ୍କୁ କିଣିଛି | ଭାରତର ଷ୍ଟାର ବ୍ୟାଟର ତଥା ଉପଧିନାୟିକା ସ୍ମୃତି ମନ୍ଧାନା ଲିଗର ସବୁଠାରୁ ଦାମୀ ଖେଳାଳି ହୋଇଥିଲେ। ତାଙ୍କୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୩.୪୦ କୋଟିରେ କିଣିଥିଲା। ତିନି ଖେଳାଳିଙ୍କୁ ୩ କୋଟିରୁ ଅଧିକ ଟଙ୍କା ମିଳିଥିଲା |
ଅଷ୍ଟ୍ରେଲିଆର ଅଲରାଉଣ୍ଡର ଆସଲେ ଗାର୍ଡନର୍ଙ୍କୁ ଗୁଜରାଟ ଜଏଣ୍ଟସ୍ ୩.୨୦ କୋଟି ଟଙ୍କାରେ ଏବଂ ଇଂଲଣ୍ଡ ଅଲରାଉଣ୍ଡର ନାଟାଲିଆ ସ୍କିଭରଙ୍କୁ ମୁମ୍ବାଇ ଇଣ୍ଡିଆନ୍ସ ୩.୨୦ କୋଟିରେ କିଣିଥିଲା ।
ଭାରତୀୟ ଅଧିନାୟକ ହରମନପ୍ରୀତ କୌରଙ୍କୁ କିନ୍ତୁ ମନ୍ଧାନାଙ୍କ ଠାରୁ କମ୍ ମୂଲ୍ୟ ପାଇଥିଲେ । ତାଙ୍କୁ ମୁମ୍ବାଇ ଇଣ୍ଡିଆନ୍ସ ୧.୮୦ କୋଟି ଟଙ୍କାରେ କିଣିଛି, ଯାହାକି ମନ୍ଧାନା ପାଇଥିବା ମୂଲ୍ୟର ଅଧା ଅଟେ। ମୁମ୍ବାଇ ଟିମ୍ ଇଂଲଣ୍ଡର ନାଟ୍ ସ୍କିଭର ବ୍ରଣ୍ଟକୁ ସର୍ବାଧିକ ୩.୨୦ କୋଟି ଟଙ୍କାରେ କିଣିଥିଲା ।