ମୁମ୍ୱାଇ: ଭାରତ ଓ ଅଷ୍ଟ୍ରେଲିଆ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଏଠାରେ ଶୁକ୍ରବାର ଠାରୁ ଆରମ୍ଭ ହେଉଛି । ଏହି ସିରିଜରୁ ଚଳିତ ବର୍ଷ ଶେଷ ଆଡକୁ ହେବାକୁ ଥିବା ଭାରତୀୟ ଦଳ ନିଜର ବିଶ୍ୱକପ ପ୍ରସ୍ତୁତି ଆରମ୍ଭ କରିବାକୁ ଥିବାବେଳେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱ ଦକ୍ଷତାର ମଧ୍ୟ ପରୀକ୍ଷା କରାଯିବ ।
ପାରିବାରିକ ବାଧ୍ୟବାଧକତା କାରଣରୁ ନିୟମିତ ଅଧିନାୟକ ରୋହିତ ଶର୍ମା ମ୍ୟାଚ୍ ପ୍ରଥମ ଦିନିକିଆରେ ଖେଳିବେନି । ପାଣ୍ଡ୍ୟା ତାଙ୍କ ଅନୁପସ୍ଥିତିରେ ଦଳର ନେତୃତ୍ୱ ନେବେ। ପାଣ୍ଡ୍ୟାଙ୍କ ଅଧିନାୟକତ୍ୱରେ ଗୁଜୁରାଟ ଜାଏଣ୍ଟସ୍ ନିଜ ପ୍ରଥମ ସିଜନରେ ଆଇପିଏଲ୍ ଟାଇଟଲ୍ ଜିତିଥିଲା। ସେ ଗତ କିଛି ଅନ୍ତର୍ଜାତୀୟ ଟି-୨୦ ସିରିଜରେ ଭାରତୀୟ ଦଳର ନେତୃତ୍ୱ ନେଉଛନ୍ତି।
ଅଷ୍ଟ୍ରେଲିଆ ବିପକ୍ଷ ଚାରି ମ୍ୟାଚ୍ ବିଶିଷ୍ଟ ବର୍ଡର-ଗାଭାସ୍କର ସିରିଜ୍ ୨-୧ରେ ଜିତିବା ସହ ଜୁନରେ ଅନୁଷ୍ଠିତ ହେବାକୁ ଥିବା ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲରେ ଟିକେଟ ନିଶ୍ଚିତ କରିବା ପରେ ଭାରତୀୟ ଦଳ ବର୍ତ୍ତମାନ ୫୦ ଓଭର ଫର୍ମାଟରେ ବିଶ୍ୱକପ ପାଇଁ ପ୍ରସ୍ତୁତି ଜୋରଦାର କରିବାକୁ ଚାହିଁବ। ଚଳିତ ବର୍ଷ ଅକ୍ଟୋବର-ନଭେମ୍ବରରେ ଭାରତରେ ଦିନିକିଆ ବିଶ୍ୱକପ ଅନୁଷ୍ଠିତ ହେବ।
ମହେନ୍ଦ୍ର ସିଂ ଧୋନିଙ୍କ ନେତୃତ୍ୱରେ ଭାରତ ଶେଷଥର ୨୦୧୧ରେ ଘରୋଇ ମାଟିରେ ବିଶ୍ୱକପ ଜିତିଥିଲା। ପୁଣି ୧୨ ବର୍ଷ ପରେ ଘରୋଇ ମାଟିରେ ବିଶ୍ବକପ୍ ଖେଳିବାକୁ ସୁଯୋଗ ମିଳିଥିବା ବେଳେ ରୋହିତ ଶର୍ମାଙ୍କ ନେତୃତ୍ୱାଧୀନ ଦଳରୁ ମଧ୍ୟ ସମାନ ସଫଳତା ଆଶା କରାଯାଏ। ଶ୍ରୀଲଙ୍କା ଏବଂ ନ୍ୟୁଜିଲ୍ୟାଣ୍ଡ ବିପକ୍ଷ ଦୁଇଟି ପୃଥକ ଦିନିକିଆ ସିରିଜରେ ସମସ୍ତ ୬ଟି ମ୍ୟାଚ୍ ଜିତି ଭାରତୀୟ ଦଳ ଚଳିତ ବର୍ଷ ଭଲ ଆରମ୍ଭ କରିଛି। ଏହି ୬ଟି ଦିନିକିଆରେ ଶୁଭମାନ ଗିଲ ତିନୋଟି ଶତକ ଏବଂ ୧୧୩.୪୦ ଆଭରେଜରେ ୫୬୭ ରନ୍ କରିଥିଲେ । ପ୍ରଥମ ମ୍ୟାଚ୍ରେ ରୋହିତଙ୍କ ଅନୁପସ୍ଥିତିରେ ଦଳକୁ ଭଲ ଆରମ୍ଭ ଦେବାକୁ ସେ ଚାପରେ ରହିବେ। ଅହମ୍ମଦାବାଦରେ ଚତୁର୍ଥ ତଥା ଅନ୍ତିମ ମ୍ୟାଚ୍ରେ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ଶତକ ପରେ ତାଙ୍କଠାରୁ ପୁଣି ଏକ ବଡ଼ ଇନିଂସର ଆଶା କରାଯିବ।
ଅହମ୍ମଦାବାଦ ଟେଷ୍ଟରେ ୧୮୬ ରନର ଇନିଂସ ଖେଳିଥିବା କୋହଲି ପୂର୍ବରୁ ଖରାପ ସୀମିତ ଓଭର ଫର୍ମକୁ ପଛରେ ପକାଇ ଦେଇଛନ୍ତି। ସେ ଚଳିତ ବର୍ଷ ହାରାହାରି ୬୭.୬୦ରେ ୩୩୮ ରନ୍ ସଂଗ୍ରହ କରିଛନ୍ତି ଏବଂ ଚିର ପ୍ରତିଦ୍ୱନ୍ଦ୍ୱୀ ଅଷ୍ଟ୍ରେଲିଆ ବିପକ୍ଷରେ ଅନ୍ତର୍ଜାତୀୟ ଶତକ ସଂଖ୍ୟା ୭୫ରୁ ଆଗକୁ ବଢ଼ାଇବାକୁ ଚାହିଁବେ। ଏହି ସମୟ ମଧ୍ୟରେ କୋହଲି ଅଷ୍ଟ୍ରେଲୀୟ ଲେଗ୍ ସ୍ପିନର ଆଡାମ ଜାମ୍ପାଙ୍କ ସହ ମୁକାବିଲା କିପରି ହେବ ତାହା ଦେଖିବା ରୋଚକ ହେବ | ଭାରତୀୟ ରନ୍ ମେସିନ୍ ବିପକ୍ଷରେ ଜାମ୍ପାଙ୍କ ରେକର୍ଡ ଭଲ ରହିଛି ।
ବୁଧବାର ଏଠାରେ ଏକ ଇଚ୍ଛାଧୀନ ଅଭ୍ୟାସ ସେସନରେ କୁଲଦୀପ ଯାଦବ ଏବଂ ୟୁଜବେନ୍ଦ୍ର ଚହଲ ଏକାଠି ବୋଲିଂ କରିଥିଲେ। ଏହି ଦୁଇ ଲେଗ୍ ସ୍ପିନର ୱିକେଟ୍ ନେବା କ୍ଷମତା ସହିତ ସୀମିତ ଓଭର କ୍ରିକେଟରେ ଭାରତୀୟ ଆକ୍ରମଣରେ ଗୁରୁତ୍ୱପୂର୍ଣ୍ଣ ଅସ୍ତ୍ର ହୋଇପାରନ୍ତି | କୁଲଦୀପ ଚଳିତ ବର୍ଷ ପାଞ୍ଚଟି ମ୍ୟାଚରେ ୧୧ ୱିକେଟ୍ ନେଇ ଭାରତର ଶ୍ରେଷ୍ଠ ସ୍ପିନର ହୋଇଥିବାବେଳେ ଦ୍ରୁତ ବୋଲରଙ୍କ ମଧ୍ୟରେ ମହମ୍ମଦ ସିରାଜ ସମାନ ସଂଖ୍ୟକ ମ୍ୟାଚରେ ୧୪ ୱିକେଟ୍ ନେଇଛନ୍ତି।
ନିୟମିତ ଅଧିନାୟକ ପ୍ୟାଟ୍ କମିନ୍ସଙ୍କ ଅନୁପସ୍ଥିତି ସତ୍ତ୍ୱେ ଯେକୌଣସି ପରିସ୍ଥିତିରେ ମ୍ୟାଚ୍ ଜିତିବାର କ୍ଷମତା ଅଷ୍ଟ୍ରେଲିଆ ଦଳର ରହିଛି। ପାଞ୍ଚ ଥର ବିଶ୍ୱକପ ବିଜେତା ଅଷ୍ଟ୍ରେଲିଆ ମଧ୍ୟ ଚଳିତ ବର୍ଷ ଅକ୍ଟୋବର-ନଭେମ୍ବରରେ ଅନୁଷ୍ଠିତ ହେବାକୁ ଥିବା ବିଶ୍ୱକପ ପାଇଁ ପ୍ରସ୍ତୁତିକୁ ଚୂଡ଼ାନ୍ତ ରୂପ ଦେବାକୁ ଚାହୁଁଛି। କମିନ୍ସଙ୍କ ଅନୁପସ୍ଥିତିରେ ଷ୍ଟିଭ୍ ସ୍ମିଥ୍ ଅଷ୍ଟ୍ରେଲିଆର ନେତୃତ୍ୱ ନେବେ। ଗତ ଦୁଇଟି ଟେଷ୍ଟ ମ୍ୟାଚ୍ରେ ତାଙ୍କ ଅଧିନାୟକତ୍ୱରେ ଦଳ ଭଲ ପ୍ରଦର୍ଶନ କରିଥିଲା।
ଏହି ଦିନିକିଆ ସିରିଜ୍ ପାଇଁ କମିନ୍ସ ଏବଂ ଜୋସ୍ ହାଜଲେଉଡ୍ ଉପଲବ୍ଧ ନୁହଁନ୍ତି । କିନ୍ତୁ ଅଭିଜ୍ଞ ବ୍ୟାଟ୍ସମ୍ୟାନ୍ ଡେଭିଡ ୱାର୍ଣ୍ଣର ଏବଂ ଅଲରାଉଣ୍ଡର ଆଷ୍ଟନ୍ ଅଗର ଜାତୀୟ ଦଳରେ ଯୋଗ ଦେଇଛନ୍ତି | ଏହି ଉଭୟ ଖେଳାଳି ଟେଷ୍ଟ ସିରିଜ୍ ମଝିରେ ଘରକୁ ଫେରିଥିଲେ। ଅଷ୍ଟ୍ରେଲିଆ ଦଳ ପାଇଁ ଏହା ଚଳିତ ବର୍ଷର ପ୍ରଥମ ଦିନିକିଆ ହେବ।
ଭାରତ: ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଶୁଭମାନ ଗିଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ଲୋକେଶ ରାହୁଲ, ଇଶାନ କିଶନ (ୱିକେଟ୍ କିପର), ରବିନ୍ଦ୍ର ଜାଡେଜା, କୁଲଦୀପ ଯାଦବ, ୱାଶିଂଟନ୍ ସୁନ୍ଦର, ୟୁଜବେନ୍ଦ୍ର ଚହଲ, ମହମ୍ମଦ ସିରାଜ୍, ମହମ୍ମଦ ସିରାଜ, ଶାର୍ଦ୍ଦୁଲ ଠାକୁର, ଅକ୍ଷର ପଟେଲ, ଜୟଦେବ ଉନାଦକଟ |
ଅଷ୍ଟ୍ରେଲିଆ: ଷ୍ଟିଭ୍ ସ୍ମିଥ୍ (ଅଧିନାୟକ), ଡେଭିଡ୍ ୱାର୍ଣ୍ଣର, ଟ୍ରାଭିସ୍ ହେଡ୍, ମାର୍ନସ୍ ଲାବୁସେନ୍, ମିଚେଲ ମାର୍ଶ, ମାର୍କସ ଷ୍ଟୋଇନିସ୍, ଆଲେକ୍ସ କେରି, ଗ୍ଲେନ୍ ମ୍ୟାକ୍ସୱେଲ, କ୍ୟାମେରନ୍ ଗ୍ରୀନ୍, ଜୋସ୍ ଇଂଲିଶ୍, ସନ୍ ଆବଟ, ଆଷ୍ଟନ୍ ଅଗର, ମିଚେଲ ଷ୍ଟାର୍କ, ନାଥନ୍ ଏଲିସ୍, ଆଡାମ ଜାମ୍ପା।