ଜୋହାନ୍ସବର୍ଗ: ୱାନଡର୍ସ ଷ୍ଟାଡିୟମରେ ସୋମବାର ଠାରୁ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟ ମ୍ୟାଚରେ ଭାରତ ପ୍ରଥମ ଇନିଂସରେ ୨୦୨ ରନ୍ କରି ଅଲ୍ଆଉଟ୍ ହୋଇଛି । ଏହାର ଜବାବରେ ପ୍ରଥମ ଦିନର ଖେଳ ଶେଷ ସୁଦ୍ଧା ଦକ୍ଷିଣ ଆଫ୍ରିକାର ଗୋଟିଏ ୱିକେଟ୍ ହରାଇବା ପାଇଁ ୩୫ ରନ୍ ସଂଗ୍ରହ କରିଛି | କ୍ୟାପଟେନ୍ ଡିନ୍ ଏଲଗାର (୧୧ *) ଏବଂ କିଗାନ ପିଟରସେନ (୧୪ *) ଅପରାଜିତ ଅଛନ୍ତି। ଭାରତ ପାଇଁ ମହମ୍ମଦ ଶାମି ଏକମାତ୍ର ୱିକେଟ୍ ନେଇଛନ୍ତି। ସ ଏଡେନ ମାର୍କ୍ରାମ(୭) ଆଉଟ୍ କରିଥିଲେ |
ଏହାପୂର୍ବରୁ ପିଠି ସମସ୍ୟା ଯୋଗୁଁ ଅଧିନାୟକ ବିରାଟ କୋହଲି ଦ୍ବିତୀୟ ଟେଷ୍ଟରୁ ଓହରି ଯାଇଥିଲେ । କୋହଲିଙ୍କ ଅନୁପସ୍ଥିତିରେ କେ.ଏଲ୍ ରାହୁଲ ଦଳର ନେତୃତ୍ବ ଦାୟିତ୍ୱ ତୁଲାଉଛନ୍ତି । ରାହୁଲ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ତେବେ ଭାରତ ମାତ୍ର ୨୦୨ ରନରେ ସୀମିତ ରହିଥିଲା। ଟିମ୍ ଇଣ୍ଡିଆର ଆରମ୍ଭ ଖାସ୍ ହୋଇ ନଥିଲା ଏବଂ ଦଳ ୪୯ ରନରେ ତିନୋଟି ୱିକେଟ୍ ହରାଇଥିଲା। ମୟଙ୍କ (୨୬) ଶୀଘ୍ର ଆଉଟ୍ ହେବା ପରେ ପୂଜାରା (3) ଏବଂ ରାହାଣେ(୦)ଙ୍କ ଠାରୁ ଭଲ ପ୍ରଦର୍ଶନ ଆଶା କରାଯାଉଥିଲା । କିନ୍ତୁ ଏହି ଦୁଇ ଭେଟେରାନ୍ ବ୍ୟାଟ୍ସମ୍ୟାନ୍ ପୁଣି ଥରେ ନିରାଶ କରିଥିଲେ | ଏହା ପରେ ବିହାରୀ ଏବଂ ରାହୁଲ ଇନିଂସ୍ ସମ୍ଭାଳିବାକୁ ଚେଷ୍ଟା କରିଥିଲେ ଏବଂ ଚତୁର୍ଥ ୱିକେଟ୍ ପାଇଁ ୪୨ ରନ୍ ଭାଗିଦାରୀ କରିଥିଲେ। ରାହୁଲ ତାଙ୍କ ଟେଷ୍ଟ କ୍ୟାରିୟରର ୧୩ତମ ଅର୍ଦ୍ଧଶତକ ହାସଲ କରିଥିଲେ | ତେବେ ଅର୍ଦ୍ଧଶତକ ପୂରଣ ପରେ ସେ ଆଉଟ୍ ହୋଇଯାଇଥିଲେ ।
୧୧୬ ରନରେ ଭାରତର ଅଧା ବ୍ୟାଟ୍ସମ୍ୟାନ୍ ପ୍ୟାଭିଲିୟନକୁ ଫେରିଥିଲେ | କିନ୍ତୁ ଏହା ପରେ ରିଷଭ ପନ୍ତ (୧୭) ଏବଂ ଅଶ୍ୱିନ (୪୬) ଙ୍କ ମଧ୍ୟରେ ୪୦ ରନ ଭାଗିଦାରୀ ହୋଇଥିଲା। ଏହି ଯୋଡ଼ି ଭାଙ୍ଗିବା ପରେ ପରବର୍ତ୍ତୀ ଖେଳାଳି ବିଶେଷ କିଛି କରିପାରିନଥିଲେ । ଉପଅଧିନାୟକ ଜସପ୍ରୀତ ବୁମ୍ରାଙ୍କ ଅପରାଜିତ ୧୪ ରନ୍ ସହାୟତାରେ ଭାରତ ୨୦୦ ରନ୍ ଅତିକ୍ରମ କରିଥିଲା। ଦକ୍ଷିଣ ଆଫ୍ରିକା ପାଇଁ ମାର୍କୋ ଜେନ୍ସେନ୍ ସର୍ବାଧିକ ୪ ୱିକେଟ୍ ନେଇଥିବାବେଳେ ଓଲିଭିୟର୍ ଏବଂ ରବାଡା ୩ଟି ଲେଖାଏଁ ୱିକେଟ୍ ନେଇଥିଲେ ।
ସେଞ୍ଚୁରିଅନରେ ଅନୁଷ୍ଠିତ ପ୍ରଥମ ଟେଷ୍ଟରେ ଭାରତ ୧୧୩ ରନରେ ବିଜୟୀ ହୋଇଥିଲା । ଉକ୍ତ ବିଜୟ ସହ ଭାରତ ତିନି ମ୍ୟାଚ୍ ସିରିଜରେ ୧-୦ରେ ଅଗ୍ରଣୀ ରହିଛି ।