ଥିରୁବନନ୍ତପୁରମ୍: ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଆଜିଠାରୁ ଆରମ୍ଭ ହେଉଛି । ବିଶ୍ୱକପ୍ ପୂର୍ବରୁ ଏହା ଭାରତୀୟ ଦଳର ଶେଷ ପ୍ରସ୍ତୁତି ହେବ । ବିଶ୍ବକପ୍ ପୂର୍ବରୁ ବ୍ୟାଟ୍ସମ୍ୟାନଙ୍କୁ ଭଲ ଅଭ୍ୟାସ ଦେବା ସହ ଭାରତୀୟ ଦଳ ଏହାର ଡେଥ୍ ଓଭର ବୋଲିଂରେ ଉନ୍ନତି ଆଣିବାକୁ ଚେଷ୍ଟା କରିବ।
ଅଷ୍ଟ୍ରେଲିଆ ବିପକ୍ଷ ସିରିଜ ଜିତିବା ପରେ ଭାରତୀୟ ଅଧିନାୟକ ରୋହିତ ଶର୍ମା ଡେଥ୍ ବୋଲିଂରେ ଉନ୍ନତି ଆଣିବା ଉପରେ ଗୁରୁତ୍ୱାରୋପ କରିଥିଲେ। ଭାରତୀୟ ଦଳ ଟି-୨୦ ବିଶ୍ୱକପ ପୂର୍ବରୁ ଏହାର ଦୁଇ ପ୍ରମୁଖ ବୋଲର ହାର୍ଦ୍ଦିକ ପାଣ୍ଡ୍ୟା ଏବଂ ଭୁବନେଶ୍ୱର କୁମାରଙ୍କୁ ବିଶ୍ରାମ ଦେଇଛି।
ମହମ୍ମଦ ଶାମି ଏପର୍ଯ୍ୟନ୍ତ କରୋନା ସଂକ୍ରମଣରୁ ସୁସ୍ଥ ହୋଇନଥିବାରୁ ଦକ୍ଷିଣ ଆଫ୍ରିକା ବିପକ୍ଷ ତିନୋଟି ମ୍ୟାଚ୍ ଖେଳି ପାରିବେ ନାହିଁ। ଆଘାତରୁ ସୁସ୍ଥ ହେବା ପରେ ହର୍ଷଲ ପଟେଲ ଅଷ୍ଟ୍ରେଲିଆ ବିପକ୍ଷ ସିରିଜକୁ ଫେରିଥିଲେ । କିନ୍ତୁ ତାଙ୍କର ଓଭର ପିଛା ଇକୋନୋମି ୯ ରନରୁ ଅଧିକ ରହିଥିଲା।
ବିଶ୍ୱକପ ପାଇଁ ଷ୍ଟାଣ୍ଡବାଇ ଥିବା ଦୀପକ ଚହର ଗତ ସିରିଜରେ ସୁଯୋଗ ପାଇନଥିଲେ । ଏବଂ ବର୍ତ୍ତମାନ ତିନୋଟି ମ୍ୟାଚ୍ ପାଇଁ ପେସରଙ୍କୁ ରୋଟେଟ୍ କରାଯିବାକୁ ଥିବା ବେଳେ ସେ ଖେଳିପାରିବେ । ସ୍ଲଗ୍ ଓଭରରେ ଯୁବ ପେସର୍ ଅର୍ଶଦୀପ ସିଂ ଅଭିଜ୍ଞ ଜସପ୍ରୀତ ବୁମ୍ରାଙ୍କୁ ସହାୟତା କରିବେ ବୋଲି ଆଶା କରାଯାଉଛି।
ଅଷ୍ଟ୍ରେଲିଆ ବିପକ୍ଷ ପ୍ରଥମ ଦୁଇଟି ମ୍ୟାଚରେ ପିଚ୍ ଫ୍ଲାଟ୍ ରହିବା ପରେ ୟୁଜବେନ୍ଦ୍ର ଚହଲ ତୃତୀୟ ମ୍ୟାଚ୍ରେ ଟର୍ନିଂ ପିଚ୍ରେ ଭଲ ବୋଲିଂ କରିଥିଲେ। ଅଷ୍ଟ୍ରେଲୀୟ ପିଚକୁ ଧ୍ୟାନରେ ରଖି ଚହଲ ତାଙ୍କ ପ୍ରଦର୍ଶନରେ ଉନ୍ନତି ଆଣିବାକୁ ଲକ୍ଷ୍ୟ ରଖିବେ।
ରୋହିତ ଶର୍ମା ବିଶ୍ୱକପ ପୂର୍ବରୁ ସମସ୍ତ ଖେଳାଳିଙ୍କୁ ସୁଯୋଗ ଦେବା ବିଷୟରେ କହିଛନ୍ତି । ତେଣୁ ଚୂଡାନ୍ତ ଏକାଦଶରେ ଆର୍ ଅଶ୍ୱିନଙ୍କୁ ସାମିଲ କରାଯାଇପାରେ ।
ବ୍ୟାଟିଂରେ କେଏଲ୍ ରାହୁଲ ଅଷ୍ଟ୍ରେଲିଆ ବିପକ୍ଷରେ ଆଶାନୁରୂପ ପ୍ରଦର୍ଶନ କରି ପାରିନଥିଲେ ଏବଂ ସେ ଏହି ସିରିଜରେ ତାହା ଭରଣା କରିବାକୁ ଚାହିଁବେ। ବିରାଟ କୋହଲି ଏବଂ ରୋହିତ ଶର୍ମା ଫର୍ମରେ ଅଛନ୍ତି ଏବଂ ରାହୁଲଙ୍କୁ ମଧ୍ୟ ଦ୍ରୁତ ଗତିରେ ରନ୍ ସ୍କୋର କରିବାକୁ ପଡିବ। ଅଷ୍ଟ୍ରେଲିଆ ବିପକ୍ଷରେ ଖେଳିବା ପାଇଁ ଦୀନେଶ କାର୍ତ୍ତିକଙ୍କୁ ମାତ୍ର ଆଠଟି ବଲ ମିଳିଥିଲା ଏବଂ ରୋହିତ ଏହା ପୂର୍ବରୁ କହିଛନ୍ତିି ଯେ ତାଙ୍କୁ କ୍ରିଜରେ ଅଧିକ ସମୟ କଟାଇବାକୁ ପଡିବ।
ବିଶ୍ୱକପ ଦଳରେ ସାମିଲ ହୋଇଥିବା ଦୀପକ ହୁଡା ପିଠିରେ ଆଘାତ ଯୋଗୁଁ ଦକ୍ଷିଣ ଆଫ୍ରିକା ବିପକ୍ଷରେ ଖେଳିପାରିବେ ନାହିଁ | ତାଙ୍କ ସ୍ଥାନରେ ଶ୍ରେୟସ୍ ଆୟରଙ୍କୁ ସୁଯୋଗ ମିଳିପାରେ |
ଘରୋଇ ଦ୍ୱିପାକ୍ଷିକ ସିରିଜରେ ଭାରତ କେବେ ଦକ୍ଷିଣ ଆଫ୍ରିକାକୁ ହରାଇପାରି ନାହିଁ। ଅଷ୍ଟ୍ରେଲିଆରେ ହେବାକୁ ଥିବା ବିଶ୍ୱକପ୍ର ଗ୍ରୁପ୍ ପର୍ଯ୍ୟାୟରେ ଦୁଇ ଦଳ ମୁହାଁମୁହିଁ ହେବେ କିନ୍ତୁ ପରିବେଶ ଭିନ୍ନ ହେବ। ଏହି ତିନି ମ୍ୟାଚ୍ ସିରିଜରେ ଉଭୟ ଦଳ ସେମାନଙ୍କର ଦୁର୍ବଳତା ଖୋଜି ସେଥିରେ ସୁଧାର ଆଣିବାକୁ ସୁଯୋଗ ପାଇବେ |
ଦକ୍ଷିଣ ଆଫ୍ରିକାର ତାବ୍ରେଜ୍ ଶାମସି କହିଛନ୍ତି ଯେ ଅଷ୍ଟ୍ରେଲିଆରେ ପିଚ୍ ଭିନ୍ନ ହେବ ଏବଂ ପଡିଆ ବଡ଼ ହେବ । କିନ୍ତୁ ବୋଲର ସର୍ବଦା ତାଙ୍କ ପ୍ରଦର୍ଶନ ଉପରେ କାମ କରିବା ଉଚିତ୍। ଭାରତୀୟ ବ୍ୟାଟ୍ସମ୍ୟାନଙ୍କ ପରୀକ୍ଷା ନେବା ଏହା ଏକ ସୁବର୍ଣ୍ଣ ସୁଯୋଗ ହେବ ବୋଲି ସେ କହିଛନ୍ତି।