ପୁଣେ: ବିଶିଷ୍ଟ ଶିଳ୍ପପତି ବଜାଜ୍ ଗ୍ରୁପର ପୂର୍ବତନ ଅଧ୍ୟକ୍ଷ ରାହୁଲ ବଜାଜଙ୍କ ଆଜି ପୁଣେରେ ଦେହାନ୍ତ ହୋଇଯାଇଛି। ତାଙ୍କୁ ୮୩ ବର୍ଷ ବୟସ ହୋଇଥିଲା। ବଜାଜ୍ ଦୀର୍ଘ ସମୟ ଧରି କର୍କଟ ରୋଗରେ ପୀଡିତ ଥିଲେ। ତାଙ୍କ ମୃତ୍ୟୁ ଖବର ଆସିବା ମାତ୍ରେ ଲୋକମାନେ ସୋସିଆଲ ମିଡିଆରେ ଏହି ବିଶିଷ୍ଟ ଶିଳ୍ପପତିଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ବଜାଜଙ୍କୁ ୨୦୦୧ରେ ପଦ୍ମ ଭୂଷଣ ସମ୍ମାନ ମିଳିଥିଲା। ରାହୁଲ ୧୦ ଜୁନ୍ ୧୯୩୮ରେ କୋଲକାତାରେ ମାରୱାଡ଼ି ବ୍ୟବସାୟୀ ପରିବାରରେ ଜନ୍ମଗ୍ରହଣ କରିଥିଲେ। ତିନି ପିଢ଼ି ପାଇଁ ବଜାଜ ଏବଂ ନେହେରୁ ପରିବାରରେ ପାରିବାରିକ ବନ୍ଧୁତା ରହିଥିଲା | ରାହୁଲଙ୍କ ପିତା କମଲନୟନ ଏବଂ ଇନ୍ଦିରା ଗାନ୍ଧୀ ଏକଦା ଗୋଟିଏ ସ୍କୁଲରେ ପଢୁଥିଲେ।
୧୯୬୫ରେ ରାହୁଲ ବଜାଜ ବଜାଜ ଗ୍ରୁପର ଦାୟିତ୍ବ ଗ୍ରହଣ କରିଥିଲେ। ତାଙ୍କ ନେତୃତ୍ୱରେ ବଜାଜ ଅଟୋର କାରବାର ୭.୨ କୋଟିରୁ ୧୨ ହଜାର କୋଟିରେ ପହଞ୍ଚିଥିଲା । ଏବଂ ଏହା ସ୍କୁଟର ବିକ୍ରି କରୁଥିବା ଦେଶର ଅଗ୍ରଣୀ କମ୍ପାନୀ ହୋଇପାରିଥିଲା | ୨୦୦୫ରେ ରାହୁଲ କମ୍ପାନୀର ପରିଚାଳନା ଭାର ତାଙ୍କ ପୁଅ ରାଜୀବଙ୍କୁ ହସ୍ତାନ୍ତର କରିଥିଲେ। ତା’ପରେ ସେ ରାଜୀବଙ୍କୁ ବଜାଜ ଅଟୋର ପରିଚାଳନା ନିର୍ଦ୍ଦେଶକ କରିଥିଲେ । ଯାହା ପରେ ଅଟୋମୋବାଇଲ ଶିଳ୍ପରେ କମ୍ପାନୀର ଉତ୍ପାଦର ଚାହିଦା କେବଳ ଘରୋଇ ବଜାରରେ ନୁହେଁ ଆନ୍ତର୍ଜାତୀୟ ବଜାରରେ ମଧ୍ୟ ବୃଦ୍ଧି ପାଇବାରେ ଲାଗିଥିଲା |