ନୂଆଦିଲ୍ଲୀ: ଭାରତୀୟ ନୌସେନାରେ ରବିବାର ସ୍ୱଦେଶୀ ଜ୍ଞାନକୌଶଳରେ ନିର୍ମିତ କ୍ଷେପଣାସ୍ତ୍ର ବିନାଶକ ଯୁଦ୍ଧପୋତ ‘ଆଇଏନ୍ଏସ୍ ମର୍ମୁଗାଓ’କୁ ସାମିଲ କରାଯାଇଛି । ମୁମ୍ବାଇରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ‘ଆଇଏନ୍ଏସ୍ ମର୍ମୁଗାଓ’କୁ ନୌସେନାରେ ସାମିଲ କରାଯାଇଛି। ଏହି ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ନୌସେନା ମୁଖ୍ୟ ଆଡମିରାଲ ଆର୍ ହରି କୁମାର ଏବଂ ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ମଧ୍ୟ ଉପସ୍ଥିତ ଥିଲେ। ରାଜନାଥ ସିଂହ କହିଛନ୍ତି ଯେ ଏହି ଯୁଦ୍ଧ ଜାହାଜର ସାମିଲ ହେବା ଦ୍ବାରା ଭାରତର ସାମୁଦ୍ରିକ ଶକ୍ତି ଆହୁରି ସୁଦୃଢ଼ ହେବ ।
ଟେକ୍ନୋଲୋଜି ଆଧାରରେ ସେ ”ଆଇଏନ୍ଏସ୍ ମର୍ମୁଗାଓ’କୁ’ ସବୁଠାରୁ ଉନ୍ନତ ଯୁଦ୍ଧ ଜାହାଜ ବୋଲି ଅଭିହିତ କରିଛନ୍ତି | ସିଂହ କହିଛନ୍ତି ଯେ ବିଶ୍ବର ଶ୍ରେଷ୍ଠ ପାଞ୍ଚଟି ଅର୍ଥନୀତି ମଧ୍ୟରେ ଭାରତୀୟ ଅର୍ଥନୀତି ରହିଛି ଏବଂ ଭାରତ ୨୦୨୭ ସୁଦ୍ଧା ଶ୍ରେଷ୍ଠ ତିନି ଅର୍ଥନୀତି ମଧ୍ୟରେ ସ୍ଥାନ ପାଇବ। ନୌସେନା ମୁଖ୍ୟ କହିଛନ୍ତି ଯେ, ଗୋଆ ମୁକ୍ତି ଦିବସର ଅବ୍ୟବହିତ ପୂର୍ବରୁ ନୌସେନାରେ ଯୁଦ୍ଧ ଜାହାଜକୁ ସାମିଲ କରିବା ଗତ ଦଶନ୍ଧିରେ ଯୁଦ୍ଧ ଜାହାଜ ଡିଜାଇନ୍ ଏବଂ ନିର୍ମାଣ କ୍ଷମତାରେ ହୋଇଥିବା ବଡ଼ ଅଗ୍ରଗତିକୁ ସୂଚାଉଛି |
ଭାରତୀୟ ନୌସେନାର ସୂଚନା ଅନୁଯାୟୀ ଏହି ଯୁଦ୍ଧ ଜାହାଜରେ ରିମୋଟ ସେନ୍ସିଂ ଉପକରଣ, ଆଧୁନିକ ରାଡାର ଏବଂ ଭୂପୃଷ୍ଠରୁ ଭୂପୃଷ୍ଠ କ୍ଷେପଣାସ୍ତ୍ର ଏବଂ ଭୂପୃଷ୍ଠରୁ ଆକାଶକୁ ନିକ୍ଷେପ ହୋଇପାରୁଥିବା କ୍ଷେପଣାସ୍ତ୍ର ଭଳି ଅସ୍ତ୍ରଶସ୍ତ୍ର ରହିଛି। ନୌସେନା କହିଛି ଯେ ଏହି ଯୁଦ୍ଧ ଜାହାଜର ଲମ୍ବ ୧୬୩ ମିଟର, ଚଉଡ଼ା ୧୭ ମିଟର ଏବଂ ଓଜନ ୭,୪୦୦ ଟନ୍ | ଭାରତ ଦ୍ୱାରା ନିର୍ମିତ ଯୁଦ୍ଧ ଜାହାଜ ମଧ୍ୟରେ ଏହାକୁ ସବୁଠାରୁ ଘାତକ ବୋଲି କୁହାଯାଉଛି |
ପଶ୍ଚିମ ଉପକୂଳରେ ଅବସ୍ଥିତ ଐତିହାସିକ ଗୋଆ ବନ୍ଦର ସହର ନାମରେ ‘ମର୍ମୁଗାଓ’ ନାମିତ | ସଂଯୋଗ ବଶତଃ ଜାହାଜଟି ପର୍ତ୍ତୁଗୀଜ୍ ଶାସନରୁ ଗୋଆର ମୁକ୍ତିର ୬୦ ବର୍ଷ ପୂର୍ତ୍ତି ଅବସରରେ ଅର୍ଥାତ୍ ୧୯ ଡିସେମ୍ବର ୨୦୨୧ରେ ପ୍ରଥମ ଥର ପାଇଁ ସମୁଦ୍ରକୁ ଓହ୍ଲାଇଥିଲା ।