ଭୋପାଳ: ମଧ୍ୟପ୍ରଦେଶରେ ନିର୍ବାଚନ ପାଇଁ କଂଗ୍ରେସ ପ୍ରାକ୍ ପ୍ରସ୍ତୁତି ଆରମ୍ଭ କରିଦେଇଛି। ଆଜି ଏକ ବଡ଼ ନିଷ୍ପତ୍ତି କ୍ରମେ ଦଳର ହାଇକମାଣ୍ଡ ପୂର୍ବତନ ମୁଖ୍ୟମନ୍ତ୍ରୀ କମଲ ନାଥଙ୍କ ବଦଳରେ ମଧ୍ୟପ୍ରଦେଶ ବିଧାନସଭାରେ ବିରୋଧୀଦଳର ନେତା ଭାବରେ ବରିଷ୍ଠ ବିଧାୟକ ଡକ୍ଟର ଗୋବିନ୍ଦ ସିଂହଙ୍କୁ ନିଯୁକ୍ତ କରିଛନ୍ତି। ତେବେ କମଲ ନାଥ ରାଜ୍ୟ କଂଗ୍ରେସ ସଭାପତି ପଦ ବଜାୟ ରଖିବେ।
ଦୀର୍ଘ ଦିନ ଧରି ଦୁଇଟି ପୋଷ୍ଟ ମଧ୍ୟରୁ ଗୋଟିଏ ଛାଡିବାକୁ କମଲ ନାଥଙ୍କ ଉପରେ ଚାପ ରହିଥିଲା ଏବଂ ମଧ୍ୟପ୍ରଦେଶରେ ଜଣେ ବ୍ୟକ୍ତିଙ୍କ ପାଇଁ ଗୋଟିଏ ପଦ ନିୟମ କରିବାକୁ ଦାବି ହୋଇଆସୁଥିଲା। ବିଧାନସଭା ବିରୋଧୀ ଦଳର ନେତା ପଦର ଦାବିଦାର ଭାବେ ଡକ୍ଟର ଗୋବିନ୍ଦ ସିଂହ ସବୁଠାରୁ ଆଗରେ ଥିଲେ। ସେ ଦିଗବିଜୟ ସିଂହଙ୍କ ଜଣେ ସମର୍ଥକ ଭାବେ ଜଣାଶୁଣା ହୋଇଥିବା ବେଳେ କମଲ ନାଥ କ୍ୟାମ୍ପରୁ ଏହି ପଦବୀ ପାଇଁ ସଜ୍ଜନ ବର୍ମା ଏବଂ ବାଲା ବଚ୍ଚନ ଦାବିଦାର ଥିଲେ ।
ସୂତ୍ରରୁ ପ୍ରକାଶ ଯେ ଦଳର ସଭାପତି ସୋନିଆ ଗାନ୍ଧୀ ନିଜେ ଡକ୍ଟର ସିଂହଙ୍କୁ ବିରୋଧୀ ଦଳ ନେତା କରିବାକୁ ନିଷ୍ପତ୍ତି ନେଇଛନ୍ତି। ଆଜି ହଠାତ୍ ଏଆଇସିସି ଭୋପାଳକୁ ଏକ ଚିଠି ପଠାଇ ଡକ୍ଟର ଗୋବିନ୍ଦ ସିଂହଙ୍କୁ ବିରୋଧୀଦଳର ନେତା କରିବାକୁ ଘୋଷଣା କରାଯାଇଥିଲା। ଡକ୍ଟର ଗୋବିନ୍ଦ ସିଂହ ହେଉଛନ୍ତି ମଧ୍ୟପ୍ରଦେଶ ବିଧାନସଭାର ବୟୋଜ୍ୟେଷ୍ଠ ସଦସ୍ୟ ।
୧୯୯୦ରେ ସେ ପ୍ରଥମ ଥର ପାଇଁ ବିଧାୟକ ହୋଇଥିଲେ, ତା’ପରଠାରୁ ସେ ଅପରାଜେୟ ରହିଆସିଛନ୍ତି | ସେ ଦିଗବିଜୟ ସିଂହ ଏବଂ କମଲ ନାଥ ସରକାରରେ କ୍ୟାବିନେଟ ମନ୍ତ୍ରୀ ଭାବେ ଦାୟିତ୍ଵ ମଧ୍ୟ ତୁଲାଇଛନ୍ତି।