କୋଲକାତା: ୱେଷ୍ଟଇଣ୍ଡିଜ୍ ବିପକ୍ଷରେ ଭାରତୀୟ କ୍ରିକେଟ୍ ଦଳ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳୁଛି। ଭାରତ ପ୍ରଥମ ମ୍ୟାଚକୁ ୬ ୱିକେଟ ଏବଂ ଦ୍ୱିତୀୟ ମ୍ୟାଚରେ ୮ ରନରେ ଜିତିଥିଲା। ଏହା ସହିତ ଟିମ୍ ଇଣ୍ଡିଆ ସିରିଜରେ ୨–୦ ଅଗ୍ରଣୀ ହାସଲ କରିଛି | ପୂର୍ବରୁ ଚାରିଟି ମ୍ୟାଚରେ ବିରାଟଙ୍କ ବ୍ୟାଟ୍ ନୀରବ ରହିଥିଲାବେଳେ ଦ୍ୱିତୀୟ ମ୍ୟାଚରେ ସେ ଏକ ଆକର୍ଷଣୀୟ ଅର୍ଦ୍ଧଶତକ ହାସଲ କରି ଫର୍ମକୁ ଫେରିଥିଲେ। ସେହି ମ୍ୟାଚରେ ରିଷଭ ପନ୍ତ ମଧ୍ୟ ବିସ୍ଫୋରକ ଅର୍ଦ୍ଧଶତକ ହାସଲ କରିଥିଲେ ।
ତେବେ ଏବେ ଖବର ଆସୁଛି କୋହଲି ଓ ପନ୍ତ ସିରିଜର ଅନ୍ତିମ ମ୍ୟାଚ୍ ଖେଳିବେ ନାହିଁ | ଉଭୟଙ୍କୁ ବିସିସିଆଇ ବାୟୋ-ବବଲ ବ୍ରେକ୍ ଦେଇଛି। ଡିସେମ୍ବରରେ ଦକ୍ଷିଣ ଆଫ୍ରିକା ଗସ୍ତ ପରଠାରୁ ବିରାଟ ଓ ପନ୍ତ ଲଗାତର ବାୟୋ-ବବଲରେ ଅଛନ୍ତି। ଜଣେ ବୋର୍ଡ ଅଧିକାରୀ କହିଛନ୍ତି ଯେ ଭାରତ ଏହି ସିରିଜ ଜିତି ସାରିଥିବାରୁ କୋହଲି ଓ ପନ୍ତ ଶନିବାର ସକାଳେ ଘରକୁ ଫେରିଛନ୍ତି। ବିସିସିଆଇ ନିଷ୍ପତ୍ତି ଅନୁଯାୟୀ, ସମସ୍ତ ଫର୍ମାଟରେ ଖେଳୁଥିବା ଖେଳାଳିଙ୍କୁ ବାୟୋ-ବବଲରୁ ନିୟମିତ ବ୍ୟବଧାନରେ ବିରତି ଦିଆଯିବ | ସେମାନଙ୍କର କାର୍ଯ୍ୟଭାର ପରିଚାଳନା ଏବଂ ମାନସିକ ସ୍ବାସ୍ଥ୍ୟର ଯତ୍ନ ନିଆଯିବା ନିଶ୍ଚିତ କରିବାକୁ ଏପରି ନିଷ୍ପତ୍ତି ନିଆଯାଇଛି |
ବର୍ତ୍ତମାନ ତୃତୀୟ ମ୍ୟାଚ୍ରେ ଅଧିନାୟକ ରୋହିତ ଶର୍ମା ବେଞ୍ଚରେ ବସିଥିବା ଯୁବ ଖେଳାଳିଙ୍କୁ ସୁଯୋଗ ଦେଇପାରିବେ। ପ୍ରଥମ ଦୁଇଟି ମ୍ୟାଚରେ ଦଳର ଚୂଡ଼ାନ୍ତ ଏକାଦଶରେ କୌଣସି ପରିବର୍ତ୍ତନ ହୋଇନଥିଲା। ସିରିଜର ତୃତୀୟ ତଥା ଅନ୍ତିମ ଟି-୨୦ ମ୍ୟାଚ୍ ରବିବାର ଦିନ ଭାରତ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ଖେଳାଯିବ। ଏହା ପରେ ଶ୍ରୀଲଙ୍କା ଦଳ ଟି-୨୦ ଏବଂ ଟେଷ୍ଟ ସିରିଜ୍ ଖେଳିବାକୁ ଭାରତ ଆସିବ। ଭାରତ ଏବଂ ଶ୍ରୀଲଙ୍କା ମଧ୍ୟରେ ଟି-୨୦ ସିରିଜ୍ ଫେବୃଆରୀ ୨୪ରୁ ଆରମ୍ଭ ହେବ |