ହାଇଦ୍ରାବାଦ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହାଇଦ୍ରାବାଦକୁ “ଭାଗ୍ୟନଗର” ବୋଲି ସମ୍ବୋଧନ କରିବାର ଦିନକ ପରେ ତେଲେଙ୍ଗାନା ମନ୍ତ୍ରୀ କେ.ଟି. ରାମା ରାଓ ଏହାର ଜବାବ ଦେଇଛନ୍ତି । କିଛି ବିଜେପି ନେତା ମଧ୍ୟ କହିଥିଲେ ଯେ ସେମାନଙ୍କ ଦଳ କ୍ଷମତାକୁ ଆସିଲେ ହାଇଦ୍ରାବାଦର ନାଁ ବଦଳାଇ “ଭାଗ୍ୟନଗର” ରଖାଯିବ ।
ବିଜେପି ନେତା ରଘୁବର ଦାସଙ୍କ ମନ୍ତବ୍ୟର ଉତ୍ତରରେ କେ.ଟି. ରାମା ରାଓ (କେଟିଆର) ପ୍ରଧାନମନ୍ତ୍ରୀ ମୋଦିଙ୍କ ରାଜ୍ୟ ଗୁଜୁରାଟ ଏବଂ ଶିଳ୍ପପତି ଗୌତମ ଆଦାନୀଙ୍କ ନାମ ଉଲ୍ଲେଖ କରିଛନ୍ତି । କେଟିଆର ଟ୍ବିଟ୍ କରି କହିଛନ୍ତି, “ଆପଣ ଅହମ୍ମଦାବାଦର ନାମ ପ୍ରଥମେ ବଦଳାଇ ଏହାକୁ ‘ଆଦାନୀବାଦ’ କାହିଁକି ରଖୁନାହାଁନ୍ତି ? ଏହି ଜୁମ୍ଲା ଜିବୀ କିଏ?”
ରବିବାର ଦିନ ହାଇଦ୍ରାବାଦରେ ବିଜେପି ନେତାଙ୍କ ବୈଠକକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଏହା ହେଉଛି ଭାଗ୍ୟନଗର ଯେଉଁଠାରେ ସ୍ୱାଧୀନତା ସଂଗ୍ରାମୀଙ୍କ ପ୍ରତୀକ ସର୍ଦ୍ଦାର ପଟେଲ “ଏକ ଭାରତ” ଶବ୍ଦର ରଚନା କରିଥିଲେ। ମୋଦୀଙ୍କ ଏପରି ମନ୍ତବ୍ୟ ପରେ ହାଇଦ୍ରାବାଦର ନାମ ପରିବର୍ତ୍ତନ ପ୍ରକ୍ରିୟା ଚାଲିଛି ବୋଲି ଚର୍ଚ୍ଚା ହୋଇଥିଲା ।
ବହୁ ବିଜେପି ନେତା ତଥା ଦଳର ମାର୍ଗଦର୍ଶକ ରାଷ୍ଟ୍ରୀୟ ସ୍ଵୟଂସେବକ ସଂଘ (ଆରଏସଏସ) ତେଲେଙ୍ଗାନାର ରାଜଧାନୀକୁ “ଭାଗ୍ୟନଗର” ନାମରେ ନାମିତ କରିବାକୁ ଆହ୍ବାନ କରିଛନ୍ତି।
୨୦୨୦ ରେ ଗ୍ରେଟର ହାଇଦ୍ରାବାଦ ମ୍ୟୁନିସିପାଲିଟି କର୍ପୋରେସନ୍ (ଜିଏଚ୍ଏମସି) ନିର୍ବାଚନ ସମୟରେ ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିଥିବା ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଭୋଟରଙ୍କୁ ହାଇଦ୍ରାବାଦକୁ “ଭାଗ୍ୟନଗର”ରେ ପରିଣତ କରିବା ପାଇଁ ଭୋଟ୍ ଦେବାକୁ ଅନୁରୋଧ କରିଥିଲେ ।
ହାଇଦ୍ରାବାଦର ନାମ ବଦଳାଇବା ପ୍ରଶ୍ନ ଉପରେ ବିଜେପି ନେତା ରଘୁବର ଦାସଙ୍କ ମନ୍ତବ୍ୟ ଉପରେ କେଟିଆର ଜବାବ ଦେଇଥିଲେ ।