ୱାଶିଂଟନ୍: ଆମେରିକାର ୱିସ୍କୋସିନ୍ ଠାରେ ରବିବାର ସନ୍ଧ୍ୟାରେ ଏକ ଗାଡି ଖ୍ରୀଷ୍ଟମାସ ପରେଡ୍ ବେଳେ ହଠାତ୍ ଭିଡ଼ ଭିତରକୁ ପଶିଯାଇ ଅନେକ ଲୋକଙ୍କୁ ଦଳିଦେଇଛି । ଏହି ଘଟଣାରେ ୨୦ ରୁ ଅଧିକ ଲୋକ ଆହତ ହୋଇଥିବା ବେଳେ ଅନେକ ଲୋକଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି । ୱାଉକେଶାର ମିଲ୍ୱାକିରେ ଘଟିଥିବା ଏହି ଘଟଣାର ତଦନ୍ତ ଜାରି ରହିଛି। ବାର୍ଷିକ ସମାରୋହ ଦେଖିବା ପାଇଁ ବହୁ ସଂଖ୍ୟାରେ ଲୋକ ମିଲୱାକ୍, ୱାଉକେଶାରେ ରୁଣ୍ଡ ହୋଇଥିବା ବେଳେ ସ୍ଥାନୀୟ ସମୟ ଅପରାହ୍ନ ପ୍ରାୟ ୪:୩୦ ରେ ଏହି ଘଟଣା ଘଟିଥିଲା | ଏହି ଘଟଣା ସିସିଟିଭି କ୍ୟାମେରାରେ କଏଦ୍ ହୋଇଯାଇଛି ।
ପୋଲିସ ମହାନିର୍ଦ୍ଦେଶକ ଡାନ ଥମ୍ପସନ ଗଣମାଧ୍ୟମକୁ କହିଛନ୍ତି: “ଏକ ନାଲି ଏସୟୁଭି ଖ୍ରୀଷ୍ଟମାସ ପରେଡ୍ ବେଳେ ଭିଡ଼ ଭିତରକୁ ପଶିଯାଇଥିଲା। ଏହି ସମୟ ମଧ୍ୟରେ କାରଟି କିଛି ପିଲାଙ୍କ ସମେତ ୨୦ରୁ ଅଧିକ ଲୋକଙ୍କୁ ଧକ୍କା ଦେଇଥିଲା। ଏହି ଘଟଣାରେ ଅନେକ ଲୋକଙ୍କର ମୃତ୍ୟୁ ବି ହୋଇଛି। ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ପରିବାର ଲୋକଙ୍କୁ ସୂଚନା ନଦେବା ପର୍ଯ୍ୟନ୍ତ ଅଧିକ ସୂଚନା ପ୍ରକାଶ କରାଯିବ ନାହିଁ ବୋଲି ସେ କହିଛନ୍ତି।
ଅଗ୍ନିଶମ ବିଭାଗର ମୁଖ୍ୟ ଷ୍ଟିଭେନ୍ ହାୱାର୍ଡ କହିଛନ୍ତି ଯେ ୧୨ ଜଣ ଶିଶୁଙ୍କ ସମେତ ୨୩ ଜଣଙ୍କୁ ୬ଟି ହସ୍ପିଟାଲରେ ଭର୍ତ୍ତି କରାଯାଇଛି।
ଏହି ଘଟଣା ପାଇଁ ଜଣେ ଯୁବକଙ୍କୁ ଗିରଫ କରାଯାଇଛି ଏବଂ ଅଧିକାରୀମାନେ ଗାଡିଟିକୁ ଜବତ କରିଛନ୍ତି। ପ୍ରଶାସନ କହିଛି ଯେ କାରକୁ ଅଟକାଇବା ପାଇଁ ଜଣେ ଅଧିକାରୀ ମଧ୍ୟ ସେହି କାର ଉପରେ ଗୁଳି ଚଳାଇଥିଲେ। ସୋମବାର ଦିନ ସ୍କୁଲ ବନ୍ଦ ରହିବ ବୋଲି ନିଷ୍ପତ୍ତି ହୋଇଛି।
ୱିସକନ୍ସିନ୍ ରାଜ୍ୟ କୋଷାଧ୍ୟକ୍ଷ ପାଇଁ ଦୌଡ଼ରେ ଥିବା ଆଞ୍ଜେଲିଟୋ ଟେନୋରିଓ ମଧ୍ୟ ପ୍ୟାରେଡରେ ଥିଲେ ଏବଂ ମିଲୱାକ୍ ଜର୍ଣ୍ଣାଲ୍ ସେଣ୍ଟିନେଲକୁ କହିଥିଲେ ଯେ ଆମେ ଏକ ଏସୟୁଭି ପାସ୍ କରୁଥିବାର ଦେଖଥିଲୁ ଏବଂ ପରେ ଆମେ ଚିତ୍କାର ଶୁଣିଲୁ | ସେ କହିଛନ୍ତି ଯେ ଏହା ପରେ ଲୋକଙ୍କ କାନ୍ଦିବାର ଓ ପାଟିତୁଣ୍ଡ ଶୁଣିବାକୁ ମିଳିଥିଲା।
ପୋଲିସ କହିଛି ଯେ ଅନେକ ଲୋକଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି।