ନୂଆଦିଲ୍ଲୀ: ପଞ୍ଜାବ ନ୍ୟାସନାଲ ବ୍ୟାଙ୍କରୁ ୧୩,୦୦୦ କୋଟି ଠକେଇ ମାମଲାର ଅନ୍ୟତମ ଅଭିଯୁକ୍ତ ହୀରା ବ୍ୟବସାୟୀ ମେହୁଲ ଚୋକସିଙ୍କ ନାମ ଇଣ୍ଟରପୋଲର ‘ରେଡ ନୋଟିସ’ରୁ ହଟାଇ ଦିଆଯାଇଛି। ଫ୍ରାନ୍ସର ଲିୟନ ସହରର ଇଣ୍ଟରପୋଲ ମୁଖ୍ୟାଳୟରେ ଚୋକସି ଦାଖଲ କରିଥିବା ଏକ ଆବେଦନ ଆଧାରରେ ଏହି ନିଷ୍ପତ୍ତି ନିଆଯାଇଛି। ଅନ୍ୟପକ୍ଷରେ ସିବିଆଇ ଏହି ଘଟଣାକ୍ରମ ଉପରେ ନୀରବ ରହିଛି।
ଜଣେ ଅଭିଯୁକ୍ତକୁ ଖୋଜିବା ଓ ଗିରଫ କରିବା ପାଇଁ ସମ୍ପୃକ୍ତ ଦେଶର ଅନୁରୋଧ କ୍ରମେ ୧୯୫ ସଦସ୍ୟ ବିଶିଷ୍ଟ ଅନ୍ତର୍ଜାତୀୟ ସଂଗଠନ ଇଣ୍ଟରପୋଲ ‘ରେଡ୍ ନୋଟିସ୍’ ଜାରି କରିଥାଏ । ଇଣ୍ଟରପୋଲ ‘ରେଡ୍ ନୋଟିସ୍’ ହେଉଛି ଆଲର୍ଟର ସର୍ବୋଚ୍ଚ ସ୍ତର । ୨୦୧୮ରେ ଚୋକସିଙ୍କ ବିରୋଧରେ ଇଣ୍ଟରପୋଲ ରେଡ୍ ନୋଟିସ୍ ଜାରି କରିଥିଲା | ସେ ଭାରତ ଛାଡିବାର ପ୍ରାୟ ୧୦ ମାସ ପରେ ଏହି ନୋଟିସ୍ ଜାରି କରାଯାଇଥିଲା। ସେହି ବର୍ଷ ଚୋକସି ଆଣ୍ଟିଗୁଆ ଏବଂ ବାରବୁଡାର ନାଗରିକତ୍ୱ ଗ୍ରହଣ କରିଥିଲେ।
ତାଙ୍କ ବିରୋଧରେ ରେଡ୍ ନୋଟିସ୍ ଜାରି କରିବାକୁ ସିବିଆଇର ଆବେଦନକୁ ଚୋକସି ଚ୍ୟାଲେଞ୍ଜ କରିଥିଲେ ଏବଂ ଏହାକୁ ରାଜନୈତିକ ଷଡ଼ଯନ୍ତ୍ର ବୋଲି କହିଥିଲେ। ଚୋକସି ତାଙ୍କ ଆବେଦନରେ ଭାରତର ଜେଲ୍ ଗୁଡ଼ିକର ସ୍ଥିତି, ବ୍ୟକ୍ତିଗତ ସୁରକ୍ଷା ଏବଂ ସ୍ୱାସ୍ଥ୍ୟ ଭଳି ପ୍ରସଙ୍ଗ ମଧ୍ୟ ଉଠାଇଥିଲେ। ରିପୋର୍ଟ ଅନୁଯାୟୀ, ଚୋକସିଙ୍କ ଆବେଦନ ପରେ ଏହି ମାମଲା ପାଞ୍ଚ ଜଣିଆ ଇଣ୍ଟରପୋଲ କମିଟିର କୋର୍ଟକୁ ଯାଇଥିଲା। ଏହି କମିଟିକୁ କଣ୍ଟ୍ରୋଲ୍ ଫାଇଲ୍ କମିଶନ କୁହାଯାଏ | ଚୋକସିଙ୍କ ଆବେଦନର ଶୁଣାଣି ପରେ କମିଟି ତାଙ୍କ ବିରୋଧରେ ରେଡ୍ ନୋଟିସ୍ ରଦ୍ଦ କରିଛି।
ଚୋକସି ମେ ୨୦୨୧ରେ ଆଣ୍ଟିଗୁଆ ଏବଂ ବାରବୁଡା ଠାରୁ ରହସ୍ୟମୟ ଭାବରେ ଉଭାନ ହୋଇଯାଇଥିଲେ | ଏହା ପରେ ତାଙ୍କୁ ପଡୋଶୀ ଦେଶ ଡୋମିନିକାରେ ଦେଖିବାକୁ ମିଳିଥିଲା | ସେଠାରେ ତାଙ୍କୁ ବେଆଇନ ପ୍ରବେଶ ଅଭିଯୋଗରେ ଗିରଫ କରାଯାଇଥିଲା। ଡୋମିନିକାରେ ଚୋକସିଙ୍କ ଗିରଫ ଖବର ପରେ ଭାରତ ତାଙ୍କ ବିରୋଧରେ ଇଣ୍ଟରପୋଲ ରେଡ୍ ନୋଟିସ ଆଧାରରେ ତାଙ୍କୁ ଫେରାଇ ଆଣିବାକୁ ଯଥାସମ୍ଭବ ଉଦ୍ୟମ କରିଥିଲା। ସିବିଆଇ ଡିଜି ଶାରଦା ରାଉତଙ୍କ ନେତୃତ୍ୱରେ ଏକ ଟିମ୍ ମଧ୍ୟ ସେଠାକୁ ଯାଇଥିଲେ । କିନ୍ତୁ ଚୋକସି ଭାରତ ପ୍ରତ୍ୟର୍ପଣ ବିରୋଧରେ ଡୋମିନିକା ହାଇକୋର୍ଟରେ ଆବେଦନ କରିଥିଲେ, ଯାହାକୁ କୋର୍ଟ ମଧ୍ୟ ଗ୍ରହଣ କରିଥିଲେ। ଫଳରେ ଚୋକସିଙ୍କୁ ଭାରତ ଅଣାଯାଇ ପାରିନଥିଲା। ଚୋକସି ଡୋମିନିକାରେ ୨୦ ଦିନ ଜେଲରେ ରହିବା ପରେ ଜୁଲାଇ ୨୦୨୧ରେ ଜାମିନରେ ମୁକୁଳିଥିଲେ ।
ଉଲ୍ଲେଖଯୋଗ୍ୟ, ପଞ୍ଜାବ ନ୍ୟାସନାଲ ବ୍ୟାଙ୍କର ମୁମ୍ବାଇ ବ୍ରଡି ହାଉସ୍ ଶାଖାର କିଛି ଅଧିକାରୀଙ୍କ ସହାୟତାରେ ମେହୁଲ ଚୋକସି ଏବଂ ତାଙ୍କ ପୁତୁରା ନିରବ ମୋଦୀ ୧୪ ହଜାର କୋଟିରୁ ଉର୍ଦ୍ଧ୍ବ ଟଙ୍କାର ଠକେଇ କରିଥିବା ଅଭିଯୋଗ ହୋଇଥିଲା । ୨୦୧୧ ରୁ ୨୦୧୮ ମଧ୍ୟରେ ଏହି ଟଙ୍କା ନକଲି ଲେଟର ଅଫ୍ ଅଣ୍ଡରଟେକିଂ (ଏଲ୍ଓୟୁ) ମାଧ୍ୟମରେ ବିଦେଶୀ ଆକାଉଣ୍ଟକୁ ସ୍ଥାନାନ୍ତରିତ ହୋଇଥିଲା | ଏହି ଘୋଟାଲାରେ ସିବିଆଇ ଉଭୟ ଚୋକସି ଏବଂ ନିରବ ମୋଦୀଙ୍କ ବିରୋଧରେ ପୃଥକ ଚାର୍ଜସିଟ୍ ଦାଖଲ କରିଥିଲା।