ନୂଆଦିଲ୍ଲୀ: ୨୦୧୯ ପରଠୁ ଖବରକାଗଜ, ଟିଭି ଚ୍ୟାନେଲ ଏବଂ ୱେବ୍ ପୋର୍ଟାଲରେ ବିଜ୍ଞାପନ ପାଇଁ ନରେନ୍ଦ୍ର ମୋଦୀ ସରକାର ୯୦୦ କୋଟିରୁ ଅଧିକ ଟଙ୍କା ଖର୍ଚ୍ଚ କରିଛନ୍ତି । କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ରାଜ୍ୟସଭାକୁ ଏହି ସୂଚନା ଦେଇଛନ୍ତି।
କଂଗ୍ରେସ ସାଂସଦ ଦିଗବିଜୟ ସିଂହଙ୍କ ଏକ ଅଣତାରକା ପ୍ରଶ୍ନର ଉତ୍ତରରେ ଠାକୁର ପ୍ରିଣ୍ଟ, ଟେଲିଭିଜନ ଏବଂ ଅନଲାଇନ୍ ବିଜ୍ଞାପନ ଉପରେ କେନ୍ଦ୍ରୀୟ ଯୋଗାଯୋଗ ବ୍ୟୁରୋ ଦ୍ୱାରା ଖର୍ଚ୍ଚ ହୋଇଥିବା ଅର୍ଥର ବର୍ଷ ଅନୁଯାୟୀ ବ୍ରେକ୍ ଅପ୍ ପ୍ରଦାନ କରିଛନ୍ତି।
କେନ୍ଦ୍ର ମନ୍ତ୍ରୀ ଅନୁରାଗ ଠାକୁରଙ୍କ ସୂଚନା ଅନୁଯାୟୀ ଟିଭି ବିଜ୍ଞାପନରେ ପାଖାପାଖି ୨୦୦ କୋଟି ଟଙ୍କା ଖର୍ଚ୍ଚ ହୋଇଛି ଯେଉଁଥିରୁ ୨୦୧୯-୨୦ରେ ୨୭୦ ଚ୍ୟାନେଲକୁ ୯୮.୬୯ କୋଟି ଟଙ୍କା ଦିଆଯାଇଛି । ୨୦୨୦-୨୧ରେ ୩୧୮ ଚ୍ୟାନେଲକୁ ୬୯.୮୧ କୋଟି, ୨୦୨୧-୨୨ରେ ୨୬୫ ଚ୍ୟାନେଲକୁ ୨୯.୩ କୋଟିରୁ ଏବଂ ଚଳିତ ବର୍ଷ ଜୁନ୍ ସୁଦ୍ଧା ୧.୯୬ କୋଟି ଟଙ୍କା ଖର୍ଚ୍ଚ ହୋଇଛି ବୋଲି ମନ୍ତ୍ରୀ କହିଛନ୍ତି।
ଟିଭି ଅପେକ୍ଷା ଖବର କାଗଜରେ ବିଜ୍ଞାପନ ପାଇଁ ଅଧିକ ଖର୍ଚ୍ଚ ହୋଇଛି । ଏହି ତିନି ବର୍ଷରେ ଖବରକାଗଜରେ ବିଜ୍ଞାପନ ପାଇଁ ସରକାର ୬୯୦.୮୩ କୋଟି ଖର୍ଚ୍ଚ କରିଛନ୍ତି । କେବଳ ୨୦୧୯-୨୦ରେ ବିଜ୍ଞାପନ ବାବଦରେ ୫,୩୨୬ ଖବରକାଗଜକୁ ୨୯୫.୫ କୋଟି ଟଙ୍କା ଦିଆଯାଇଛି । ୨୦୨୧-୨୨ରେ ବିଜ୍ଞାପନ ଅର୍ଥ ଗ୍ରହଣ କରିଥିବା କାଗଜପତ୍ର ସଂଖ୍ୟା ୬,୨୨୪କୁ ବୃଦ୍ଧି ପାଇଥିଲା କିନ୍ତୁ ଖର୍ଚ୍ଚ ପରିମାଣ ୧୭୯.୦୪ କୋଟି ଟଙ୍କାକୁ ହ୍ରାସ ପାଇଥିଲା |
ମନ୍ତ୍ରୀଙ୍କ ସୂଚନା ଅନୁଯାୟୀ ୨୦୧୯ ପରଠାରୁ ଡିଜିଟାଲ ମିଡିଆରେ ବିଜ୍ଞାପନ ପାଇଁ ୨୦.୫୮ କୋଟି ଟଙ୍କା ଖର୍ଚ୍ଚ କରାଯାଇଛି।
ସରକାର ଯେଉଁ ସବୁ ଟିଭି ଚ୍ୟାନେଲ, ଖବରକାଗଜ ଏବଂ ଡିଜିଟାଲ ପ୍ଲାଟଫର୍ମରେ ବିଜ୍ଞାପନ ଦେଇଥିଲେ ତାହାର ତାଲିକା ‘ଡାଇରୋକ୍ଟେରଟ୍ ଆଡଭର୍ଟାଇଜିଂ ଆଣ୍ଡ୍ ଭିଜୁଆଲ୍ ପବ୍ଲିକେସନ୍ସ(ଡିଏଭିପି)ରେ ଉପଲବ୍ଧ |