ନୂଆଦିଲ୍ଲୀ:କରୋନା ମହାମାରୀ ସମ୍ବନ୍ଧରେ ପ୍ରତିଦିନ ନୂଆ ଅଧ୍ୟୟନ କରାଯାଉଛି। ଏପରି ଏକ ସଦ୍ୟତମ ଅଧ୍ୟୟନରୁ ଜଣାପଡିଛି ଯେ ମୋନୋକ୍ଲୋନାଲ ଆଣ୍ଟିବଡି-ଡ୍ରଗ୍ କକଟେଲ୍ କୋଭିଡ-୧୯ର ଡେଲଟା ଭାରିଆଣ୍ଟ ରୋଗୀଙ୍କ ଚିକିତ୍ସା ଓ ଏହି ଭାଇରସ ଜନିତ ମୃତ୍ୟୁର ବିପଦରୁ ୧୦୦% ସୁରକ୍ଷା ଯୋଗାଇଥାଏ। ମୋନୋକ୍ଲୋନାଲ ଆଣ୍ଟିବଡି-ଡ୍ରଗ୍ କକଟେଲ୍ କୋଭିଡ୍-୧୯ ପାଇଁ ଏକ ଚମତ୍କାର ଚିକିତ୍ସା ପଦ୍ଧତି ଭାବେ ସମଗ୍ର ବିଶ୍ୱର ଡାକ୍ତରମାନଙ୍କୁ ଆକର୍ଷିତ କରିଛି | ଯେତେବେଳେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ଏହାର ପରୀକ୍ଷା କରାଯାଇଥିଲା, ସେତେବେଳେ ଏହାର ପର୍ଯ୍ୟାପ୍ତ ପ୍ରାଥମିକ ବୈଜ୍ଞାନିକ ପ୍ରମାଣ ଉପଲବ୍ଧ ନଥିଲା । ଏହା ଉପରେ କେବଳ କିଛି ଅଧ୍ୟୟନ କରାଯାଇଥିଲା ଯାହା ଏହାର ପ୍ରଭାବକୁ ଦର୍ଶାଇଥିଲା, କିନ୍ତୁ ସାରା ବିଶ୍ୱରେ କୋଭିଡ-୧୯ ର ଡେଲଟା ଭାରିଏଣ୍ଟ ଉପରେ କୌଣସି ଅଧ୍ୟୟନ ନଥିଲା |
ଏସିଆନ୍ ହେଲଥ୍ କେୟାର ଫାଉଣ୍ଡେସନ୍, ସିସିଏମ୍ବି ହାଇଦ୍ରାବାଦ ଏବଂ ଇନଷ୍ଟିଚ୍ୟୁଟ୍ ଅଫ୍ ଲାଇଫ୍ ସାଇନ୍ସେସର ସହଯୋଗରେ ଏଆଇଜି ହସ୍ପିଟାଲ୍ ସାବ୍ୟସ୍ତ କରିଛି ଯେ କୋଭିଡ୍-୧୯ର ଡେଲଟା ଭାରିଆଣ୍ଟରେ ସଂକ୍ରମିତ ହାଇ ରିସ୍କ ବ୍ୟକ୍ତିଙ୍କଠାରେ ମୋନୋକ୍ଲୋନାଲ ଥେରାପି ପ୍ରୟୋଗ କରାଗଲେ ଏହା ରୋଗର ଗମ୍ଭୀରତା ଏବଂ ମୃତ୍ୟୁକୁ ୧୦୦ ପ୍ରତିଶତ ହ୍ରାସ କରିଥାଏ। କରୋନାର ସବୁଠାରୁ ଘାତକ ଷ୍ଟ୍ରେନ୍ କୁହାଯାଉଥିବା ଡେଲଟା ଭାରିଆଣ୍ଟ ଅନ୍ୟ ଭାରିଆଣ୍ଟ ଅପେକ୍ଷା ବହୁତ ଦ୍ରୁତ ଗତିରେ ବ୍ୟାପିଥାଏ ଏବଂ ବେଶ୍ ଘାତକ ସାବ୍ୟସ୍ତ ହୋଇଥାଏ |
ଭାରତରେ କରୋନାର ଦ୍ୱିତୀୟ ଲହରର ଭୟାବହତା ପଛରେ ଡେଲଟା ଭାରିଆଣ୍ଟ ମୁଖ୍ୟ କାରଣ ଥିଲା | ଏଜି ହସ୍ପିଟାଲର ସଭାପତି ଡ. ଡି.ନାଗେଶ୍ୱରା ରେଡ୍ଡୀ କହିଛନ୍ତି ଯେ ଅଧ୍ୟୟନର ଫଳାଫଳ ଆଶ୍ଚର୍ଯ୍ୟଜନକ ଏବଂ ଏହା କୋଭିଡ୍-୧୯ର ଚିକିତ୍ସା ପାଇଁ ଜନସ୍ୱାସ୍ଥ୍ୟ ନୀତି ପ୍ରସ୍ତୁତ କରିବାରେ ସହାୟକ ହେବ । ବିଶେଷକରି ହାଇ ରିସ୍କ ବ୍ୟକ୍ତି ତଥା ୬୦ ବର୍ଷରୁ ଊର୍ଦ୍ଧ୍ବ ରୋଗୀ ଯେଉଁମାନେ ମଧୁମେହ, ଉଚ୍ଚ ରକ୍ତଚାପ, ମେଦବହୁଳତା ଭଳି ପୁରୁଣା ରୋଗରେ ପୀଡିତ ସେମାନେ ସମସ୍ତେ ମୋନୋକ୍ଲୋନାଲ ଆଣ୍ଟିବଡି-ଡ୍ରଗ୍ କକଟେଲ୍ ରୁ ବହୁତ ଉପକୃତ ହୋଇପାରିବେ | ଆମେ ଆମର ଅନୁସନ୍ଧାନରେ ସ୍ପଷ୍ଟ ଭାବରେ ଦର୍ଶାଇଛୁ ଯେ ମୋନୋକ୍ଲୋନାଲ ଥେରାପି, ଯେତେବେଳେ ଠିକ୍ ସମୟରେ ଦିଆଯାଏ, ରୋଗ ବଢ଼ିବାରୁ ସମ୍ପୂର୍ଣ୍ଣ ରୋକିଥାଏ |