ମୁମ୍ବାଇ: ଭାରତର ସବୁଠୁ ଧନୀ ଉଦ୍ୟୋଗପତି ମୁକେଶ ଅମ୍ବାନୀ ଲଣ୍ଡନରେ ଏକ ନୂଆ ଘର କିଣିଛନ୍ତି । ଏଣିକି ସେହି ନୂଆ ଘରେ ଅମ୍ବାନୀ ପରିବାର ରହିବେ । ସୂତ୍ରରୁ ପ୍ରକାଶ ଯେ ବକିଂହାମଶାୟାରର ଷ୍ଟୋକ୍ ପାର୍କରେ ୩୦୦ ଏକର ବିଶିଷ୍ଟ ଗଲ୍ଫ କ୍ଲବରେ ଅମ୍ବାନୀଙ୍କ ଏହି ନୂଆ ପ୍ରାସାଦ ରହିଛି । ଚଳିତ ବର୍ଷ ଏପ୍ରିଲରେ ୫୯୨ କୋଟି ଟଙ୍କାରେ ଏହି ସମ୍ପତ୍ତି କିଣିଥିଲେ ମୁକେଶ ଅମ୍ବାନୀ ।
ଏହି ଘରେ ୪୯ ବେଡ଼ରୁମ୍ ଅଛି | ଏହି କୋଠାରେ ଅତ୍ୟାଧୁନିକ ଚିକିତ୍ସା ସୁବିଧା ମଧ୍ୟ ରହିଛି। ଏହାକୁ ବର୍ତ୍ତମାନ ସେଟ୍ କରାଯାଉଛି | କୋଭିଡ ମହାମାରୀ ସମୟରେ ମୁମ୍ବାଇର ଅଲ୍ଟାମାଉଣ୍ଟ ରୋଡର ୪ ଲକ୍ଷ ବର୍ଗଫୁଟରେ ଅବସ୍ଥିତ ‘ଆଣ୍ଟିଲିଆ’ରେ ଏକପ୍ରକାର ବନ୍ଦୀ ହୋଇ ରହିବା ପରେ ଅମ୍ବାନୀ ପରିବାର ଏକ ଖୋଲା ପରିବେଶରେ ନୂଆ ଘର ସନ୍ଧାନରେ ଥିଲେ। ଲକଡାଉନ୍ ସମୟରେ ଅମ୍ବାନୀ ପରିବାର ମଧ୍ୟ ଜାମନଗରରେ ବହୁ ସମୟ ବିତାଇଥିଲେ। ଜାମନଗରରେ ସେମାନଙ୍କର ଏକ ତୈଳ ରିଫାଇନାରି ଅଛି, ଯାହା ଦୁନିଆର ସବୁଠୁ ବଡ଼ ରିଫାଇନାରୀ ଭାବେ ପରିଚିତ |
ଏକ ସୂତ୍ରରୁ ଜଣାପଡିଛି ଯେ ଲକଡାଉନ୍ ପରେ ଅମ୍ବାନୀ ପରିବାର ଏପରି ଏକ ଆବାସିକ ସ୍ଥଳ ଚାହୁଁଥିଲେ ଯାହା ଏକ ଖୋଲା ପରିବେଶରେ ଥିବ, ମୁମ୍ବାଇର ଘର ଭଳି ଜନବହୁଳ ସ୍ଥାନ ହୋଇନଥିବ | ତେଣୁ ଏହାର ସନ୍ଧାନ ଗତ ବର୍ଷ ଠାରୁ ଆରମ୍ଭ ହୋଇଥିଲା | ଷ୍ଟୋକ୍ ପାର୍କ ଚୁକ୍ତି ଶେଷ ହେବା ପରେ ଅଗଷ୍ଟରୁ ଏହାର ନବୀକରଣ କାର୍ଯ୍ୟ
ଚାଲିଥିଲା |
ଅମ୍ବାନୀ ପରିବାର ନୂଆ ଘରେ ଏଥର ଦୀପାବଳି ପାଳନ କରିଥିଲେ ବୋଲି କୁହାଯାଇଛି। କିଛି ଦିନ ମଧ୍ୟରେ ଅମ୍ବାନୀ ପରିବାର ମୁମ୍ବାଇ ଆସିବେ ଏବଂ ଏପ୍ରିଲରେ ଲଣ୍ଡନର ନୂଆ ଘରେ ରହିବାକୁ ଯିବେ।