ନୂଆଦିଲ୍ଲୀ: ୨୦୨୩-୨୪ ଆର୍ଥିକ ବର୍ଷ ପାଇଁ ମୋଦୀ ସରକାରଙ୍କ ଦ୍ୱିତୀୟ କାର୍ଯ୍ୟକାଳର ଶେଷ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରମଣ ଏକ ବଡ଼ ଘୋଷଣା କରିଛନ୍ତି। ବର୍ତ୍ତମାନ ପାନ୍ କାର୍ଡକୁ ପରିଚୟ ପତ୍ର ଭାବରେ ବିବେଚନା କରାଯିବ | ନିର୍ମଳା ସୀତାରମଣଙ୍କ ଏହି ଘୋଷଣା ପରେ ଏବେ କେଓ୍ବାଇସି ପାଇଁ ଆଧାର କାର୍ଡ ଦେବା ବାଧ୍ୟତାମୂଳକ ହେବ ନାହିଁ ।
ନିୟମ ଅନୁଯାୟୀ ସମ୍ପ୍ରତି ଅନେକ ସ୍ଥାନରେ କେଓ୍ବାଇସି ପାଇଁ ଉଭୟ ଆଧାର ଏବଂ ପାନ୍ କାର୍ଡ ଆବଶ୍ୟକ ପଡୁଥିଲା | କିନ୍ତୁ ବର୍ତ୍ତମାନ ପାନ୍ କାର୍ଡ ସମସ୍ତ ସରକାରୀ ଏଜେନ୍ସିର ଡିଜିଟାଲ୍ ସିଷ୍ଟମରେ ଏକ ସାଧାରଣ ଆଇଡି କାର୍ଡ ଭାବରେ ବ୍ୟବହୃତ ହେବ । ଅର୍ଥମନ୍ତ୍ରୀଙ୍କ କହିବାନୁସାରେ, ଏହା ଦ୍ବାରା କାରବାର ସହଜ ହେବ ଏବଂ ଏକୀକୃତ ପଞ୍ଜୀକରଣ ବ୍ୟବସ୍ଥା ପାଇଁ କେଓ୍ବାଇସି ପ୍ରକ୍ରିୟା ମଧ୍ୟ ସହଜ ହେବ |
ନୂଆ ବ୍ୟବସ୍ଥା ସହ କେନ୍ଦ୍ରୀୟ ଏବଂ ରାଜ୍ୟ ସ୍ତରରେ ସରକାରୀ ବିଭାଗଗୁଡିକରେ ପାନ୍ କାର୍ଡ ବ୍ୟବହାର କରି ସମସ୍ତ କାର୍ଯ୍ୟ କରିହେବ । ଏବେ ଗ୍ରାହକଙ୍କୁ ବାରମ୍ବାର ଏକାଧିକ କାଗଜପତ୍ର ଦାଖଲ କରିବାକୁ ପଡ଼ିବନି । ଅର୍ଥମନ୍ତ୍ରୀଙ୍କ ଏହି ଘୋଷଣା ଦ୍ୱାରା ଏକ ନୂଆ ବ୍ୟବସାୟ ଆରମ୍ଭ କରୁଥିବା ଲୋକମାନେ ଅଧିକ ଲାଭବାନ ହେବେ | ଯଦି କୌଣସି ରାଜ୍ୟ ସ୍ତରୀୟ ବିଭାଗର ଅନୁମତି ନେଇ କେହି ଜଣେ ବ୍ୟବସାୟ ଆରମ୍ଭ କରିଛନ୍ତି ଏବଂ ଅନ୍ୟ କୌଣସି ବ୍ୟବସାୟ ପାଇଁ କେନ୍ଦ୍ରୀୟ ଏଜେନ୍ସିରୁ ଅନୁମତି ନେବାକୁ ପଡେ ତେବେ ଆବେଦନକାରୀଙ୍କୁ ପୁଣି ଥରେ ସମସ୍ତ ଆବଶ୍ୟକ ଦଲିଲ ଦାଖଲ କରିବାକୁ ପଡିବ ନାହିଁ |
ଏହାଛଡ଼ା ବ୍ୟବସାୟ ସହଜ କରିବା ପାଇଁ ୩୯,୦୦୦ ରୁ ଅଧିକ ବାଧ୍ୟତାମୂଳକ ନିୟମ ଉଚ୍ଛେଦ କରାଯାଇଥିବା ଅର୍ଥମନ୍ତ୍ରୀ ଘୋଷଣା କରିଛନ୍ତି । ସରଳ ଓ ସହଜ ବ୍ୟବସାୟ ପରିବେଶ ସୃଷ୍ଟି କରିବାକୁ, ୩୪୦୦ ରୁ ଅଧିକ ଆଇନଗତ ପ୍ରକ୍ରିୟାକୁ ଅପରାଧ ଶ୍ରେଣୀରୁ ହଟାଯାଇଛି ।