କଂଗ୍ରେସର ଅଭିଯୋଗ, ମିଲିନ୍ଦ ଦେଓରାଙ୍କ ଇସ୍ତଫା ସମୟ ମୋଦୀ ସ୍ଥିର କରିଥିଲେ

ନୂଆଦିଲ୍ଲୀ: କଂଗ୍ରେସର ‘ଭାରତ ଯୋଡୋ ନ୍ୟାୟ ଯାତ୍ରା’ ଆରମ୍ଭ ହେବାର କିଛି ଘଣ୍ଟା ପୂର୍ବରୁ ରବିବାର ପୂର୍ବତନ କେନ୍ଦ୍ରମନ୍ତ୍ରୀ ମିଲିନ୍ଦ ଦେଓରା ଦଳରୁ ଇସ୍ତଫା ଦେଇଛନ୍ତି । କଂଗ୍ରେସ ଏବେ ଅଭିଯୋଗ କରିଛି ଯେ ଦେଓରାଙ୍କ ଇସ୍ତଫା ସମୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ଥିର କରିଥିଲେ । ଯାହା ଫଳରେ ଗଣମାଧ୍ୟମରେ ‘ଭାରତ ଯୋଡୋ ନ୍ୟାୟ ଯାତ୍ରା’ ଚର୍ଚ୍ଚାରୁ ଧ୍ୟାନ ହଟାଯାଇ ପାରିବ।

ଦଳର ସାଧାରଣ ସମ୍ପାଦକ ଜୟରାମ ରମେଶ ଦାବି କରିଛନ୍ତି, ସେ ଗତ ଶୁକ୍ରବାର ଦେଓରାଙ୍କ ସହ ଫୋନରେ କଥା ହୋଇଥିଲେ । ସେ ତାଙ୍କ ପୂର୍ବ ଲୋକସଭା ଆସନ (ଦକ୍ଷିଣ ମୁମ୍ବାଇ) ନେଇ ଚିନ୍ତିତ ଥିବାରୁ ରାହୁଲ ଗାନ୍ଧୀଙ୍କୁ ଭେଟିବାକୁ ଚାହୁଁଥିଲେ।

ସମ୍ପ୍ରତି ଦକ୍ଷିଣ ମୁମ୍ବାଇରୁ ଶିବସେନା(ଉଦ୍ଧବ ବାଲାସାହେବ ଠାକରେ)ର ଅରବିନ୍ଦ ସାୱନ୍ତ ସାଂସଦ ଅଛନ୍ତି ।

ଜୟରାମ ରମେଶ ଅଭିଯୋଗ କରିଛନ୍ତି, “ମିଲିନ୍ଦ ଦେଓରାଙ୍କ ଇସ୍ତଫା ଘୋଷଣା ସମୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ବାରା ସ୍ଥିର ହୋଇଛି ।

ଦେଓରା ମୋତେ ଶୁକ୍ରବାର ସକାଳ ୮:୫୨ରେ ମେସେଜ୍ କରିଥିଲେ ଏବଂ ତା’ପରେ ସେହି ଦିନ ଅପରାହ୍ନ ୨:୪୭ରେ ମୁଁ ତାଙ୍କୁ ଉତ୍ତର ଦେଇ ପଚାରିଲି ଆପଣ ଦଳ ଛାଡିବାକୁ ଯୋଜନା କରୁଛନ୍ତି କି? ତା’ପରେ ଅପରାହ୍ନ ୨:୪୮ରେ ସେ ଏକ ମେସେଜ୍ ପଠାଇ ମୋ ସହ କଥା ହେବାକୁ ଚାହିଁଥିଲେ। ମୁଁ ତାଙ୍କୁ କହିଲି ମୁଁ ଆପଣଙ୍କୁ କଲ୍ କରିବି। ସେହି ଦିନ ମୁଁ ତାଙ୍କ ସହ ୩:୪୦ରେ କଥା ହେଇଥିଲି। ”

ରମେଶ ଦାବି କରିଛନ୍ତି, “ଦେଓରା ଏହି ଆସନ (ଦକ୍ଷିଣ ମୁମ୍ବାଇ) ଏକ ଶିବସେନା (ୟୁବିଟି) ଆସନ ବୋଲି ଚିନ୍ତିତ ଥିଲେ, ସେ ରାହୁଲ ଗାନ୍ଧୀଙ୍କୁ ଭେଟି ଏ ବିଷୟରେ କଥା ହେବାକୁ ଚାହୁଁଥିଲେ। ମୁଁ ମଧ୍ୟ ରାହୁଲଙ୍କ ସହ ଏକ ସମ୍ପର୍କରେ କଥା ହୁଏ ବୋଲି ସେ ଚାହୁଁଥିଲେ ।”

ଦେଓରାଙ୍କୁ କଟାକ୍ଷ କରି ଜୟରାମ ରମେଶ କହିଛନ୍ତି, “ମୋର ମୁରଲୀ ଦେଓରା (ମିଲିନ୍ଦଙ୍କ ସ୍ବର୍ଗତ ପିତା) ଙ୍କ ସହ ଦୀର୍ଘ ବର୍ଷର ସମ୍ପର୍କ ମନେ ଅଛି। ସବୁ ଦଳରେ ତାଙ୍କର ଘନିଷ୍ଠ ବନ୍ଧୁ ଥିଲେ, କିନ୍ତୁ ସେ ଜଣେ ପୁରୁଖା କଂଗ୍ରେସ ଲୋକ ଥିଲେ ଯିଏ ପ୍ରତିକୂଳ ପରିସ୍ଥିତିରେ ସର୍ବଦା ଦଳ ସହ ଠିଆ ହୋଇଥିଲେ। ତଥାସ୍ତୁ !”