ମୁମ୍ବାଇ: ଦେଶର ଆର୍ଥିକ ରାଜଧାନୀ ମୁମ୍ବାଇରେ କୋଭିଡ-୧୯ର ଡେଲଟା ପ୍ଲସ୍ ଭାରିଆଣ୍ଟରୁ ପ୍ରଥମ ମୃତ୍ୟୁ ରିପୋର୍ଟ ହୋଇଛି। ମୃତକ ହେଉଛନ୍ତି ଜଣେ ୬୩ ବର୍ଷୀୟା ମହିଳା ଏବଂ ସେ ଉଭୟ ଡୋଜ୍ ଟିକା ମଧ୍ୟ ନେଇଥିଲେ | ୨୧ ଜୁଲାଇରେ ତାଙ୍କ କୋଭିଡ ଟେଷ୍ଟ ପଜିଟିଭ୍ ଆସିଥିଲା ଏବଂ ସେ ୨୭ ଜୁଲାଇରେ ପ୍ରାଣ ହରାଇଥିଲେ। ମହିଳାଙ୍କର ମଧୁମେହ ସମେତ ଅନେକ ସମସ୍ୟା ଥିଲା |
ସେ ମୁମ୍ବାଇର ସାତ ଜଣ ରୋଗୀଙ୍କ ମଧ୍ୟରୁ ଜଣେ ଥିଲେ ଯିଏ ଡେଲଟା ପ୍ଲସ୍ ଭାରିଆଣ୍ଟ ପାଇଁ ପଜିଟିଭ୍ ଚିହ୍ନଟ ହୋଇଥିଲେ। ତାଙ୍କର ଜିନୋମ ସିକ୍ବେନ୍ସିଂ ଫଳାଫଳ ଅଗଷ୍ଟ ୧ ରେ ଆସିଥିଲା | ତାଙ୍କ ସହ ସଂସ୍ପର୍ଶରେ ଆସିଥିବା ଦୁଇ ଜଣ ଲୋକ ମଧ୍ୟ ଡେଲଟା ପ୍ଲସ୍ ଦ୍ଵାରା ଆକ୍ରାନ୍ତ ହୋଇଥିବା ଜଣାପଡିଛି | ମହିଳା ଜଣକ ହସ୍ପିଟାଲରେ ଅକ୍ସିଜେନ ସହାୟତାରେ ଥିଲେ ଏବଂ ତାଙ୍କୁ ଷ୍ଟେରଏଡ ଏବଂ ରିମେଡେସିଭର୍ ଦିଆଯାଇଥିଲା | ମହିଳାଙ୍କର କୌଣସି ଯାତ୍ରା ଇତିହାସ ନଥିଲା |
ଡେଲଟା ପ୍ଲସ୍ ଭାରିଆଣ୍ଟ ଯୋଗୁଁ ମହାରାଷ୍ଟ୍ରରେ ମୃତ୍ୟୁ ସଂଖ୍ୟା ବର୍ତ୍ତମାନ ୨କୁ ବୃଦ୍ଧି ପାଇଛି। ଗତ ମାସରେ ରତ୍ନଗିରିର ଜଣେ ୮୦ ବର୍ଷ ବୟସ୍କା ମହିଳାଙ୍କ ଡେଲଟା ପ୍ଲସ୍ ଭାରିଆଣ୍ଟରେ ମୃତ୍ୟୁ ହୋଇଥିଲା ।