ଆଜି ଠାରୁ ଆରମ୍ଭ ହେଲା ଆଶ୍ବିନ ଶୁକ୍ଳ ପକ୍ଷର ଶାରଦୀୟ ନବରାତ୍ରି ପୂଜା। ନବରାତ୍ରିର ପ୍ରଥମ ଦିନ ପୂଜା ପାଇବେ ମା’ ଶୈଳପୁତ୍ରୀ ।
ଶୈଳରାଜ ହିମାଳୟଙ୍କ କନ୍ୟା ଶୈଳପୁତ୍ରୀ । ଏହା ପାର୍ବତୀଙ୍କର ବାଲ୍ୟ କାଳର ପରିକଳ୍ପନା । ନାରୀର ବାଲ୍ୟ ଜୀବନର ସୋପାନ ସହିତ ମାଆଙ୍କ ଏହିରୂପ ଜଡ଼ିତ । ବାଲ୍ୟାବସ୍ଥାରେ ଶିଶୁକନ୍ୟାଟି ଅବୋଧବ ଓ ନିଷ୍ପାପ ଥାଏ । ଏହି ସମୟରୁ ପ୍ରକୃତିର ଶକ୍ତି ତା ମଧ୍ୟରେ ସଂଚରିତ ହୁଏ । ତାହା ହିଁ ପରା ଶକ୍ତି। ପୌରାଣିକ କଥା ଆଧାରରେ ପୂର୍ବ ଜନ୍ମରେ ସେ ସତୀ ନାମରେ ପରିଚିତ ଥିଲେ । ଏବଂ ଭଗବାନ ଶିବଙ୍କ ପତ୍ନୀ ଥିଲେ। ସତୀଙ୍କ ପିତା ଦକ୍ଷ ପ୍ରଜାପତି ଭଗବାନ ଶିବଙ୍କୁ ଅପମାନିତ କରିଥିଲେ । ସେଥିପାଇଁ ସତୀ ଯଜ୍ଞ କୁଣ୍ଡରେ ନିଜକୁ ଭଷ୍ମ କରିଦେଇଥିଲେ। ପରବର୍ତ୍ତୀ ଜନ୍ମରେ, ଏହି ସତୀ ଶୈଳପୁତ୍ରୀ ହୋଇ ଜନ୍ମ ନେଇଥିଲେ ଓ ଭଗବାନ ଶିବଙ୍କୁ ବିବାହ କରିଥିଲେ ।
ନବରାତ୍ରୀର ପ୍ରଥମ ଦିନ, ମାଆଙ୍କୁ ପୂଜା କଲେ ସାଧକର ମୁଳାଧାର ଚକ୍ର ଜାଗ୍ରତ ହୋଇ ସାଧକକୁ ଅନେକ ସିଦ୍ଧି ପ୍ରାପ୍ତ ହୋଇଥାଏ । ଜୀବନର ସମସ୍ତ କଷ୍ଟ ଓ ଦୁଃଖ ମଧ୍ୟ ତାଙ୍କର ଦୂର ହୋଇଥାଏ । ଶୁକ୍ଲା ପ୍ରତିପଦାରେ କଳଶ ସ୍ଥାପନା କରି ମାଆଙ୍କର ପୂଜା ଆରମ୍ଭ କରାଯାଏ । ଏହି ପୂଜା ସମୟରେ ମାଆଙ୍କୁ ପାନ ପତ୍ରରେ ଲବଙ୍ଗ ଓ ମିଶ୍ରି ଅର୍ପଣ କଲେ ନକରାତ୍ମକ ଶକ୍ତିର ବିନାଶ ହୋଇଥାଏ ।
ସକଳ ଶକ୍ତିର ଆଧାର ସୂର୍ଯ୍ୟ ମହାଗ୍ରହଙ୍କ ନିମନ୍ତେ ଦୂର୍ଗାଙ୍କର ଏହି ରୂପର ଆରାଧନା କରା ଯାଇଥାଏ। ଯେଉଁ ମାନଙ୍କ କ୍ଷେତ୍ରରେ ରବିଗ୍ରହ ପୀଡା( ସୂର୍ଯ୍ୟ ) ଥାଏ ସେମାନେ ମାଆଙ୍କ ପାଖରେ ଶୁଦ୍ଧ ଘିଅର ଭୋଗ କଲେ ସୂର୍ଯ୍ୟ ମହାଗ୍ରହଙ୍କ ଆର୍ଶିବାଦ ପ୍ରାପ୍ତି ହୋଇଥାଏ । ଏହା ଦ୍ୱାରା ଉତ୍ତମ ସ୍ୱାସ୍ଥ୍ୟ ଏବଂ ସମ୍ମାନ ମିଳିଥାଏ । କହିବାକୁ ଗଲେ ଦୈବୀ କୃପା ଲାଭ ପାଇଁ ସାଧକ ଏକାନ୍ତ ଚିତ୍ତରେ ନିଜର ମୂଳଧାର ଚକ୍ରକୁ ଜାଗ୍ରତ କରିବାକୁ ହେଲେ ଏହାର ଅଧିଷ୍ଠାତ୍ରୀ ଦେବୀ ମାଆ ଶୈଳପୁତ୍ରୀଙ୍କ ଆଶୀର୍ବାଦ ନିହାତି ଆବଶ୍ୟକ। ନବରାତ୍ର ପ୍ରଥମ ଦିବସର ଏହାହିଁ ଅନ୍ତର୍ନିହିତ ଉଦ୍ଧେଶ୍ୟ।