ନୂଆଦିଲ୍ଲୀ: ଜାନୁଆରୀ ୩ରୁ ଦେଶରେ ୧୫ ବର୍ଷରୁ ଊର୍ଦ୍ଧ୍ବ ବୟସ୍କ ପିଲାମାନଙ୍କୁ କରୋନା ଟିକା ଦିଆଯିବ | ଏହା ସହିତ ସ୍ୱାସ୍ଥ୍ୟ କର୍ମୀ ଏବଂ ଫ୍ରଣ୍ଟ ଲାଇନ କର୍ମଚାରୀଙ୍କୁ ମଧ୍ୟ ବୁଷ୍ଟର ଡୋଜ୍ ଦିଆଯିବ। ଓମିକ୍ରନ୍ ବିପଦ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ରାତି ୧୦ଟାରେ ଦେଶକୁ ସମ୍ବୋଧିତ କରି ଦୁଇଟି ବଡ଼ ଘୋଷଣା କରିଛନ୍ତି। ମୋଦି କହିଛନ୍ତି ଯେ ୬୦ ବର୍ଷରୁ ଅଧିକ ବୟସ୍କ ବ୍ୟକ୍ତି ଯେଉଁମାନେ ଅନ୍ୟ ଗୁରୁତର ରୋଗରେ ପୀଡିତ ଅଛନ୍ତି ସେମାନଙ୍କୁ ମଧ୍ୟ ବୁଷ୍ଟର ଡୋଜ୍ ଦିଆଯିବ।
ପିଲାମାନଙ୍କର ଟିକାକରଣ ଘୋଷଣା କରି ପ୍ରଧାନମନ୍ତ୍ରୀ କହିଛନ୍ତି ଯେ ଏହା କେବଳ କରୋନା ବିରୋଧରେ ଦେଶର ଲଢେ଼ଇକୁ ସଶକ୍ତ କରିବ ନାହିଁ, ବରଂ ସ୍କୁଲ, କଲେଜ ଯାଉଥିବା ଆମ ପିଲା ଏବଂ ସେମାନଙ୍କ ପିତାମାତାଙ୍କ ଚିନ୍ତା ଦୂର କରିବ।
ଦେଶକୁ ସୁରକ୍ଷିତ ରଖିବାରେ କରୋନା ଯୋଦ୍ଧାଙ୍କର ଅନେକ ଅବଦାନ ରହିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଆଜି ବି ସେମାନେ କରୋନା ରୋଗୀଙ୍କ ସେବାରେ ବହୁତ ସମୟ ବିତାଉଛନ୍ତି | ତେଣୁ ସତର୍କତା ଅବଲମ୍ବନ କରି ସରକାର ନିଷ୍ପତ୍ତି ନେଇଛନ୍ତି ଯେ ଜାନୁଆରୀ ୧୦ରୁ ଫ୍ରଣ୍ଟ ଲାଇନ ଯୋଦ୍ଧାମାନଙ୍କୁ ଏକ ବୁଷ୍ଟର ଡୋଜ୍ ଦିଆଯିବ। ବୟସ୍କ ବ୍ୟକ୍ତି ଏବଂ ପୂର୍ବରୁ କୌଣସି ଗୁରୁତର ରୋଗରେ ପୀଡିତ ଥିବା ୬୦ ବର୍ଷରୁ ଅଧିକ ବୟସ୍କ ଲୋକଙ୍କୁ ମଧ୍ୟ ଡାକ୍ତରଙ୍କ ପରାମର୍ଶ କ୍ରମେ ସତର୍କତା ଅବଲମ୍ବନ କରିପାରିବେ |
ଦେଶରେ ଓମିକ୍ରନ୍ ମାମଲା ବୃଦ୍ଧି ପାଉଥିବାରୁ ମୋଦି ସତର୍କ ରହିବାକୁ ଏବଂ କୋଭିଡ୍ ନିୟମ ପାଳନ କରିବାକୁ ଦେଶବାସୀଙ୍କୁ କହିଛନ୍ତି |