ସମ୍ବଲପୁର: ଭାରତୀୟ ସାଂସ୍କୃତିକ ସହଯୋଗ ଓ ମୈତ୍ରୀ ସଂଘ (ଇସକଫ) ର ସମ୍ବଲପୁର ଜିଲାର ସାଧାରଣ ପରିଷଦର ବୈଠକ ରବିବାର ଅନୁଷ୍ଠିତ ହୋଇଯାଇଛି । ସ୍ଥାନୀୟ ସମ୍ବଲପୁର ସର୍ବସାଧାରଣ ପାଠାଗାରର ସମ୍ମିଳନୀ କକ୍ଷରେ ସକାଳ ୧୦ଟାରେ ଆୟୋଜିତ ଏହି ବୈଠକରେ ପ୍ରାକ୍ତନ ସଭାପତି ଡା. ରମାବଲ୍ଲଭ ମିଶ୍ର ଅଧ୍ୟକ୍ଷତା କରିଥିଲେ । ପ୍ରାକ୍ତନ ସାଧାରଣ ସମ୍ପାଦକ ଜୟଶଙ୍କର ମିଶ୍ର ବୈଠକକୁ ପରିଚାଳନା କରିଥିଲେ । ଜାତୀୟ ସଙ୍ଗୀତ ଗାନ ସହିତ ଆରମ୍ଭ ହୋଇଥିବା ଏହି ବୈଠକର ପ୍ରାରମ୍ଭରେ ଦିବଙ୍ଗତ ସଦସ୍ୟ ମାନଙ୍କର ଅମର ଆତ୍ମାର ସଦଗତି ନିମନ୍ତେ ୨ ମିନିଟର ନୀରବ ପ୍ରାର୍ଥନା କରାଯାଇଥିଲା । ଡା. ରମାବଲ୍ଲଭ ମିଶ୍ର ସ୍ୱାଗତ ଭାଷଣ ପ୍ରଦାନ ସହିତ ଆଗାମୀ ଡିସେମ୍ବର ୧୦ ଓ ୧୧ ତାରିଖରେ କଟକ ଠାରେ ଅନୁଷ୍ଠିତ ହେବାକୁ ଥିବା ୨୩ତମ ଜାତୀୟ ସମ୍ମିଳନୀ ସର୍ମ୍ପକରେ ବିସ୍ତୃତ ସୂଚନା ସଦସ୍ୟ ଓ ସଦସ୍ୟା ମାନଙ୍କୁ ଦେଇଥିଲେ । ଏହି ସମ୍ମିଳନୀରେ ଦେଶର କୋଣ ଅଣୁକୋଣରୁ ଅନେକ ବିଶିଷ୍ଟ ଶିକ୍ଷାବିତ ଓ ବିଦ୍ୱାନ ବ୍ୟକ୍ତି ବିଶେଷ ଯୋଗ ଦେଇ ବିଭିନ୍ନ ବିଷୟରେ ମାନସମନ୍ଥନର କାର୍ଯ୍ୟକ୍ରମ ରହିଛି ଏବଂ ଏଥିରେ ସମ୍ବଲପୁର ଜିଲା ମଧ୍ୟ ସାମିଲ ହେବ । ବିଗତ ଦିନରେ ସମ୍ବଲପୁର ମୁ୍ୟନିସିପାଲିଟି ଦ୍ୱାରା ନେଲସନ ମଣ୍ଡେଲା ଛକକୁ ନାମିତ କରାଯାଇଥିବା ବେଳେ ସେଠାରେ ନେଲସନ ମଣ୍ଡେଲା ଙ୍କ ଏକ ପ୍ରତିମୂର୍ତ୍ତି ସ୍ଥାପନ ସର୍ମ୍ପକରେ ବୈଠକରେ ବିସ୍ତୃତ ଆଲୋଚନା ହୋଇଥିଲା । ଏତଦ ବ୍ୟତିତ ନୂତନ ସଦସ୍ୟ ସଂଗ୍ରହ, ସାଙ୍ଗଠନିକ କାର୍ଯ୍ୟକ୍ରମ ଆଦି ବିଭିନ୍ନ ବିଷୟ ଉପରେ ଆଲୋଚନା କରାଯାଇଥିଲା ।
ଏଥି ସହ ଜିଲା ପରିଷଦର ନୂତନ କର୍ମକର୍ତ୍ତା ନିର୍ବାଚନ କରାଯାଇଥିଲା । ଜିଲା ପରିଷଦର ନୂତନ ସଭାପତି ରୂପେ ଡା. ରମାବଲ୍ଲଭ ମିଶ୍ର, କାର୍ଯ୍ୟକାରୀ ସଭାପତି ରୂପେ ସୁରେଶ୍ୱର ମିଶ୍ର, ଉପ ସଭାପତି ପ୍ରଣତି ପଟ୍ଟନାୟକ, ରାଜକିଶୋର ଦାସ, ସୁତାପା ମିତ୍ର, ଅରୁଣ ଖୁଣ୍ଟିଆ, ଗଣେଶ ମହାପାତ୍ର, ମହମ୍ମଦ ସୁବିର ଅହମଦ, ସାଧାରଣ ସମ୍ପାଦକ ରୂପେ ଜୟଶଙ୍କର ମିଶ୍ର, କୋଷାଧ୍ୟକ୍ଷ ରୂପେ ରବିନ୍ଦ୍ର ମହାନ୍ତି, ସଚିବ ରୂପେ ବିରାଜ କୁମାର ମିଶ୍ର, ରାଜେଶ ବିଭାର, ରତ୍ନାକର ଭୋଇ, ଶିବ ବିଶି, ଭି. ଆର. ରାଓ ଓ ଏନ. ଗୋପାଳ ଏବଂ ପୃଷ୍ଠପୋଷକ ରୂପେ ବିଜୟ ମହାନ୍ତି, ଗୋପ ରଞ୍ଜନ ଦୁବେ, ରଘୁନାଥ ମିଶ୍ର, ଅଶୋକ ବିଶି, ଅରବିନ୍ଦ ମହାପାତ୍ର ଓ ଯଦୁମଣି ପଣ୍ଡା ଙ୍କୁ ସର୍ବସମ୍ମତି କ୍ରମେ ନିଯୁକ୍ତ କରାଯାଇଛି । ବୈଠକରେ ଜିଲାର ସଦସ୍ୟ ଓ ସଦସ୍ୟା ମାନେ ସାମିଲ ହୋଇ ସୁଚିନ୍ତିତ ମତାମତ ପୋଷଣ କରିଥିଲେ । ଶେଷରେ କୋଷାଧ୍ୟକ୍ଷ ରବିନ୍ଦ୍ର ମହାନ୍ତି ଧନ୍ୟବାଦ ଅର୍ପଣ କରିଥିଲେ ।