କଲମ୍ବୋ: ଏସିଆ କପ୍ ‘ସୁପର ଫୋର୍’ର ଏକ ହାଇ ଭୋଲଟେଜ୍ ମ୍ୟାଚରେ ରବିବାର ଏଠାରେ ଭାରତ ଓ ପାକିସ୍ତାନ ମୁହାଁମୁହିଁ ହେବେ । ଏହି ମ୍ୟାଚ୍ ପୂର୍ବରୁ କେଏଲ୍ ରାହୁଲ ଏବଂ ଇଶାନ କିଶନଙ୍କ ମଧ୍ୟରେ ଚୟନ ଦ୍ୱନ୍ଦ୍ୱର ସମାଧାନ ଖୋଜିବା ଭାରତୀୟ ଟିମ୍ ମ୍ୟାନେଜମେଣ୍ଟ ପାଇଁ ଗୁରୁତ୍ୱପୂର୍ଣ୍ଣ ହେବ।
ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତୀୟ ଦଳ ରବିବାର ଏସିଆ କପରେ ଦ୍ୱିତୀୟ ଥର ପାକିସ୍ତାନକୁ ଭେଟିବ। ଦଳର ଲକ୍ଷ୍ୟ ଉପରେ ଟିମ୍ ମ୍ୟାନେଜମେଣ୍ଟର ଧ୍ୟାନ ରହିଥିଲେ ମଧ୍ୟ ପାକିସ୍ତାନ ବିପକ୍ଷରେ ନିଜର ଶ୍ରେଷ୍ଠ ଏକାଦଶକୁ ପଡିଆକୁ ଓହ୍ଲାଇବା ବଡ଼ ଆହ୍ବାନ ହେବ । ତେବେ ଏଥିପାଇଁ ରାହୁଲ-କିଶନଙ୍କ ଚୟନର ରହସ୍ୟର ଉତ୍ତର ଖୋଜିବାକୁ ପଡିବ । ଏହାଛଡ଼ା ଦଳ ଆଶା କରିବ ଯେ ବର୍ଷା ଯେପରି ମ୍ୟାଚରେ ବାଧା ସୃଷ୍ଟି ନ କରେ, ଯେଉଁଥିପାଇଁ ସୋମବାର ବିବାଦୀୟ ‘ରିଜର୍ଭ’ ଦିବସ ରଖାଯାଇଛି।
ରାହୁଲଙ୍କ ଦଳକୁ ଫେରିବା ଦ୍ବାରା ଖେଳାଳିଙ୍କ ‘ପୁଲ୍’ ବଢିଛି । କିନ୍ତୁ ଏହା ଭାରତ ପାଇଁ ମଧ୍ୟ ଏକ ସୁଖଦ ମୁଣ୍ଡବ୍ୟଥାର କାରଣ ହେବ। ଏହାର କାରଣ ହେଉଛି କିଶନ ଗତ ଏକ ମାସ ମଧ୍ୟରେ ତାଙ୍କ ପ୍ରଦର୍ଶନ ଦ୍ୱାରା ସମସ୍ତଙ୍କୁ ପ୍ରଭାବିତ କରିଛନ୍ତି । ଏହି ସମୟ ମଧ୍ୟରେ ସେ ଚାରିଟି ମ୍ୟାଚରେ ୪ଟି ଅର୍ଦ୍ଧଶତକ ହାସଲ କରିଛନ୍ତି। ୱେଷ୍ଟଇଣ୍ଡିଜ୍ ବିପକ୍ଷରେ ତିନୋଟି ଏବଂ ଗତ ସପ୍ତାହରେ ପାଲେକେଲରେ ପାକିସ୍ତାନ ବିପକ୍ଷ ଏସିଆ କପ୍ ଗ୍ରୁପ୍ ଏ ମ୍ୟାଚରେ ଗୋଟିଏ ଅର୍ଦ୍ଧଶତକ ହାସଲ କରିଥିଲେ ।
ଏହି ସମୟ ମଧ୍ୟରେ କିଶନ ଇନିଂସ ଓପନ୍ କରିବା ଠାରୁ ଆରମ୍ଭ କରି ପାଞ୍ଚ ନମ୍ବରରେ ବ୍ୟାଟିଂ ପର୍ଯ୍ୟନ୍ତ ଭଲ ପ୍ରଦର୍ଶନ କରିଛନ୍ତି। ଝାଡ଼ଖଣ୍ଡର ଏହି ୨୫ ବର୍ଷୀୟ ଖେଳାଳି ୱେଷ୍ଟଇଣ୍ଡିଜ୍ ବିପକ୍ଷରେ ଇନିଂସ ଓପନ କରିଥିବାବେଳେ ପାକିସ୍ତାନ ବିପକ୍ଷରେ ସେ ମିଡିଲ୍ ଅର୍ଡରରେ ବ୍ୟାଟିଂ କରିଥିଲେ ।
କିଶାନ ଜଣେ ବାମହାତୀ ବ୍ୟାଟ୍ସମ୍ୟାନ୍, ତେଣୁ ଏହା ଭାରତୀୟ ବ୍ୟାଟିଂ କ୍ରମରେ କିଛି ବିବିଧତା ଆଣିଛି।
ଲାଗୁଛି କିଶନଙ୍କ ପାଇଁ ସବୁକିଛି ଠିକ୍ ଚାଲିଛି | କିନ୍ତୁ ଜଙ୍ଘରେ ଆଘାତ ଏବଂ ଅସ୍ତ୍ରୋପଚାର ପରେ ପୁନଃ ଥଇଥାନ ପ୍ରକ୍ରିୟା କାରଣରୁ ଚଳିତ ବର୍ଷ ମାର୍ଚ୍ଚରୁ କୌଣସି ମ୍ୟାଚ୍ ଖେଳି ନଥିବା ରାହୁଲଙ୍କୁ ଅଣଦେଖା କରିବା ମଧ୍ୟ କଷ୍ଟକର।
ଏହା ପଛର କାରଣ ହେଉଛି ରାହୁଲ (୩୧ ବର୍ଷ) ୨୦୧୯ ଠାରୁ ଭାରତର ସବୁଠାରୁ ପ୍ରଭାବୀ ଦିନିକିଆ ବ୍ୟାଟ୍ସମ୍ୟାନ୍ ହୋଇଛନ୍ତି । ସେ ୨୦୧୯ରେ ୧୩ଟି ମ୍ୟାଚରେ ହାରାହାରି ୪୭.୬୬ରେ ୫୭୨ ରନ୍ କରିଥିଲେ।
ଏହା ପରେ ମଧ୍ୟ ତାଙ୍କର ଭଲ ପ୍ରଦର୍ଶନ ଜାରି ରହିଥିଲା | ୨୦୨୦ରେ ସେ ୯ଟି ମ୍ୟାଚରେ ହାରାହାରି ୫୩.୩୮ରେ ୪୪୩ ରନ୍ ସଂଗ୍ରହ କରିଥିଲେ । ବେଙ୍ଗାଲୁରୁର ଏହି ବ୍ୟାଟ୍ସମ୍ୟାନ୍ ୨୦୨୧ରେ ତିନୋଟି ମ୍ୟାଚରୁ ହାରାହାରି ୮୮.୫୦ରେ ୧୦୮ ରନ୍ କରିଥିଲେ । ପୁଣି ୨୦୨୨ରେ ରାହୁଲ ୧୦ଟି ମ୍ୟାଚରେ ହାରାହାରି ୨୭.୮୯ରେ ୨୫୧ ରନ୍ ସଂଗ୍ରହ କରିଥିଲେ । ସେ ୨୦୨୩ରେ ୬ଟି ମ୍ୟାଚ୍ ରେ ହାରାହାରି ୫୬.୫୦ରେ ୨୨୬ ରନ୍ କରିଛନ୍ତି |
ଯଦି ଆମେ ଏହି ସଂଖ୍ୟାକୁ ଅଧିକ ଗଭୀର ଭାବରେ ଦେଖିବା, ପାଞ୍ଚ ନମ୍ବରରେ ବ୍ୟାଟିଂ କରି ରାହୁଲ ୫୩ଟି ମ୍ୟାଚରେ ହାରାହାରି ୫୩ରେ ୭୪୨ ରନ୍ ସଂଗ୍ରହ କରିଛନ୍ତି, ଯେଉଁଥିରେ ଗୋଟିଏ ଶତକ ଏବଂ ୭ ଅର୍ଦ୍ଧଶତକ ମଧ୍ୟ ରହିଛି।
ଏହି ପରିସଂଖ୍ୟାନ ବହୁତ ଭଲ ଦେଖାଯାଉଛି । ରାହୁଲଙ୍କ ସପକ୍ଷରେ ଆଉ ଏକ ଯୁକ୍ତି ହେଲା ସେ ୱିକେଟ୍ କିପିଂ ମଧ୍ୟ କରନ୍ତି | ଶୁକ୍ରବାର ସେ କଡ଼ା ୱିକେଟ୍ କିପିଂ ଅଭ୍ୟାସ କରୁଥିବା ଦେଖିବାକୁ ମିଳିଥିଲା, ଯାହା ପ୍ରତ୍ୟାବର୍ତ୍ତନ ପାଇଁ ତାଙ୍କ ପ୍ରସ୍ତୁତିକୁ ସୂଚାଉଛି | ରାହୁଲ-କିଶନଙ୍କ ମଧ୍ୟରେ କାହାକୁ ଚୂଡାନ୍ତ ଏକାଦଶରେ ସାମିଲ କରାଯିବ ସେନେଇ ଟିମ୍ ମ୍ୟାନେଜମେଣ୍ଟକୁ ମ୍ୟାଚ୍ ଦିନ କଷ୍ଟଦାୟକ ନିଷ୍ପତ୍ତି ନେବାକୁ ପଡ଼ିବ।
ଦଳ ଚାହୁଁଥିବା ସନ୍ତୁଳନ ଦୃଷ୍ଟିରୁ ଏହି ନିଷ୍ପତ୍ତି ଗୁରୁତ୍ୱପୂର୍ଣ୍ଣ । କାରଣ ସେମାନେ ମ୍ୟାଚ୍ ପାଇଁ ଯେକୌଣସି କମ୍ବିନେସନ ବାଛନ୍ତୁ ନା କାହିଁକି, ଦଳ ପାଇଁ ‘ସୁପର ଫୋର୍’ ମ୍ୟାଚରେ ବିଜୟ ନିହାତି ଜରୁରୀ |
ଲାହୋରରେ ବାଂଲାଦେଶକୁ ୭ ୱିକେଟରେ ପରାସ୍ତ କରି ପାକିସ୍ତାନ ଦୁଇ ପଏଣ୍ଟ ହାସଲ କରିଛି। ଆଉ ଗୋଟିଏ ବିଜୟ ଦ୍ବାରା ଦଳ ସହଜରେ ଫାଇନାଲକୁ ଉନ୍ନୀତ ହେବ |
ଭାରତ ମଧ୍ୟ ପଏଣ୍ଟ୍ ଟେବୁଲରେ ସାମିଲ ହେବାକୁ ଚାହିଁବ । କିନ୍ତୁ ସେମାନଙ୍କୁ ପାକିସ୍ତାନର ଘାତକ ବୋଲିଂ ଆକ୍ରମଣର ମୁକାବିଲା କରିବାକୁ ପଡିବ । କାରଣ ପାକିସ୍ତାନୀ ଦ୍ରୁତ ବୋଲରମାନେ ଯେକୌଣସି ପିଚରେ ଚମତ୍କାର ବୋଲିଂ କରିବାରେ ସକ୍ଷମ ।
ରୋହିତ ଏବଂ ଅନ୍ୟ ଭାରତୀୟ ବ୍ୟାଟ୍ସମ୍ୟାନ ନିଶ୍ଚିତ ଭାବେ ଶାହିନ୍ ଶାହା ଆଫ୍ରିଦିଙ୍କ ପେସ୍ ପ୍ରତି ସତର୍କ ରହିବେ । କିନ୍ତୁ ପାକିସ୍ତାନର ବୋଲିଂ ବିଭାଗର ଅନ୍ୟ ବୋଲରମାନେ ମଧ୍ୟ ସମାନ ଭାବେ ବିପଜ୍ଜନକ ।
ତାଙ୍କ ଗତି ସହିତ ହରିସ୍ ରାଉଫ୍ ୯ ୱିକେଟ୍ ନେଇ (ତିନି ମ୍ୟାଚରେ) ଏସିଆ କପ୍ ବୋଲିଂ ତାଲିକାର ଶୀର୍ଷରେ ଅଛନ୍ତି ଏବଂ ଯାହା ମନେ କରାଯାଉଛି ସେ ଆଫ୍ରିଦି (୭ ୱିକେଟ୍)ଙ୍କୁ ଟପିଯିବେ । ନସିମ ଶାହା ମଧ୍ୟ ୭ ୱିକେଟ୍ ନେଇଛନ୍ତି ଏବଂ ସେ ମଧ୍ୟ ବିପକ୍ଷ ଦଳର ବ୍ୟାଟ୍ସମ୍ୟାନଙ୍କ ଚିନ୍ତା ବଢାଇବେ ।
ବୋଲିଂ ବିଭାଗରେ କାଗଜରେ ପାକିସ୍ତାନ ଶକ୍ତିଶାଳୀ ଦେଖାଯାଉଛି । କିନ୍ତୁ ସେମାନଙ୍କ କାଉଣ୍ଟର ଆଟାକ୍ ପାଇଁ ଭାରତ ପାଖରେ ମଧ୍ୟ ଦକ୍ଷ ବୋଲିଂ ଆକ୍ରମଣ ରହିଛି ।
ଜସପ୍ରୀତ ବୁମରାଙ୍କ ପ୍ରତ୍ୟାବର୍ତ୍ତନ ଭାରତୀୟ ବୋଲିଂକୁ ମଜବୁତ କରିବ । ନିଜ ପ୍ରଥମ ସନ୍ତାନର ଜନ୍ମ ପାଇଁ ସେ ନେପାଳ ବିପକ୍ଷ ଲିଗ୍ ମ୍ୟାଚ୍ ଖେଳି ପାରିନଥିଲେ । ସହାୟକ ବୋଲର ଭାବେ ମହମ୍ମଦ ସିରାଜ ଏବଂ ଶାର୍ଦ୍ଦୁଲ ଠାକୁର ମଧ୍ୟ ପ୍ରଭାବୀ ହୋଇପାରନ୍ତି ।
କିନ୍ତୁ ଯେତେବେଳେ ଉଭୟ ଦଳ ପଡ଼ିଆକୁ ଓହ୍ଲାଇବେ ଚୂଡ଼ାନ୍ତ ଏକାଦଶ, ଫର୍ମ, ଅତୀତର ରେକର୍ଡ ଆଦି ବିଷୟ ଅପ୍ରାସଙ୍ଗିକ ହୋଇଯିବ | ପଡ଼ିଆରେ ଦୁଇ ଦଳ ମଧ୍ୟରେ କଡ଼ା ଟକ୍କର ହେବ ।