ନୂଆଦିଲ୍ଲୀ: ଗାଜାର ଏକ ହସ୍ପିଟାଲ ଉପରେ ହୋଇଥିବା ଆକ୍ରମଣରେ ବହୁ ସଂଖ୍ୟାରେ ଲୋକଙ୍କ ମୃତ୍ୟୁକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଃଖ ପ୍ରକାଶ କରିଛନ୍ତି । ସମ୍ପ୍ରତି ଜାରି ସଂଘର୍ଷରେ ସାଧାରଣ ନାଗରିକଙ୍କ ମୃତ୍ୟୁ ଗମ୍ଭୀର ଚିନ୍ତାର ବିଷୟ । ଏଥିରେ ସମ୍ପୃକ୍ତ ଲୋକଙ୍କୁ ଛଡାଯିବା ଉଚିତ ନୁହେଁ ବୋଲି ସେ କହିଛନ୍ତି।
ଗଣମାଧ୍ୟମ ରିପୋର୍ଟ ଅନୁଯାୟୀ, ମଙ୍ଗଳବାର ଗାଜାର ଅଲ-ଅହଲି ଡାକ୍ତରଖାନାରେ ଏକ ପ୍ରଚଣ୍ଡ ବିସ୍ଫୋରଣରେ ଶହ ଶହ ଲୋକଙ୍କ ମୃତ୍ୟୁ ଘଟିଛି ବୋଲି ହାମାସ୍ ଗୋଷ୍ଠୀ କହିଛି। ଏହି ବିସ୍ଫୋରଣ ପାଇଁ ହାମାସ ଇସ୍ରାଏଲର ଏୟାର୍ ଷ୍ଟ୍ରାଇକକୁ ଦାୟୀ କରିଛି । କିନ୍ତୁ ଏହାକୁ ଖଣ୍ଡନ କରିଛି ଇସ୍ରାଏଲ୍ ସେନା । ଏହି ବିସ୍ଫୋରଣ ଏକ ପାଲେଷ୍ଟାଇନ ରକେଟ୍ ଯୋଗୁଁ ଘଟିଛି ବୋଲି ଇସ୍ରାଏଲ୍ କହିଛି ।
ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (ପୂର୍ବରୁ ଟ୍ୱିଟର) ରେ ଏକ ପୋଷ୍ଟରେ ମୋଦୀ କହିଛନ୍ତି, ଗାଜାର ଅଲ ଅହଲି ହସ୍ପିଟାଲରେ ଲୋକଙ୍କ ଦୁଃଖଦ ମୃତ୍ୟୁ ନେଇ ଗଭୀର ମର୍ମାହତ । ପୀଡିତଙ୍କ ପରିବାର ପ୍ରତି ସମବେଦନା ଏବଂ ଆହତଙ୍କ ଶୀଘ୍ର ଆରୋଗ୍ୟ କାମନା କରୁଛି।
ପ୍ରଧାନମନ୍ତ୍ରୀ କହିଛନ୍ତି, ଜାରି ରହିଥିବା ସଂଘର୍ଷରେ ସାଧାରଣ ନାଗରିକଙ୍କ ମୃତ୍ୟୁ ଏକ ଗମ୍ଭୀର ଏବଂ ନିରନ୍ତର ଚିନ୍ତାର ବିଷୟ | ଏଥିରେ ଜଡିତ ଥିବା ଲୋକଙ୍କୁ ଛଡ଼ାଯିବା ଉଚିତ୍ ନୁହେଁ ।
ଅକ୍ଟୋବର ୭ରେ ଗାଜା ଷ୍ଟ୍ରିପରୁ ସଶସ୍ତ୍ର ହାମାସ ଆତଙ୍କବାଦୀମାନେ ଇସ୍ରାଏଲ ଉପରେ ସ୍ଥଳ, ବାୟୁ ଏବଂ ସମୁଦ୍ରରୁ ଅତର୍କିତ ଆକ୍ରମଣ କରିଥିଲେ । ଏହାପରେ ଇସ୍ରାଏଲ ଓ ହାମାସ ମଧ୍ୟରେ ଯୁଦ୍ଧ ଆରମ୍ଭ ହୋଇଥିଲା। ଏହି ଯୁଦ୍ଧରେ ଏଯାବତ୍ ୨,୭୭୮ ପାଲେଷ୍ଟାଇନୀୟଙ୍କ ମୃତ୍ୟୁ ଘଟିଥିବାବେଳେ ଇସ୍ରାଏଲରେ ଅତି କମରେ ୧୪୦୦ ଇସ୍ରାଏଲ ଏବଂ ବିଦେଶୀ ନାଗରିକ ପ୍ରାଣ ହରାଇଛନ୍ତି ।