ଭୁବନେଶ୍ୱର – ରାଜ୍ୟରେ ପ୍ରାର୍ଥୀ ଘୋଷଣା କ୍ଷେତ୍ରରେ ପଛୁଆ ଥିବା କଂଗ୍ରେସକୁ ଝଟକା ପରେ ଝଟକା ଲାଗିବାରେ ଲାଗିଛି। ଦଳ ଛାଡୁଛନ୍ତି ପୂର୍ବତନ ବିଧାୟକ, ପୂର୍ବତନ ମନ୍ତ୍ରୀ ଓ ବର୍ତ୍ତମାନର ବିଧାୟକ । ଆଜି ଆଉ ଜଣେ ନେତା ହାତ ଛାଡିଛନ୍ତି। ପିସିସି ଉପସଭାପତି ବିଶ୍ୱଭୂଷଣ ଦାସ କଂଗ୍ରେସରୁ ଇସ୍ତଫା ଦେଇଛନ୍ତି। ବିଶ୍ୱଭୂଷଣ କାକଟପୁରର ବିଧାନସଭା ଆସନରୁ କଂଗ୍ରେସ ପ୍ରାର୍ଥୀ ଭାବେ ୨୦୦୯ ଏବଂ ୨୦୧୯ରେ ନିର୍ବାଚନ ଲଢିଥିଲେ । ପୂର୍ବରୁ ସେ ପିସିସି ସାଧାରଣ ସଂପାଦକ ଦାୟିତ୍ବରେ ମଧ୍ୟ ଥିଲେ। ସେ ଛାତ୍ର ରାଜନୀତିରେ ସକ୍ରିୟ ରହିବା ସହ ବିଜେବି କଲେଜର ସଭାପତି ହୋଇଥିଲେ । ପରେ ସେ ରାଜ୍ୟ ଯୁବ କଂଗ୍ରେସର ଉପସଭାପତି ହୋଇଥିଲେ ।