ଦକ୍ଷିଣ ଓଡ଼ିଶାର ଏକମାତ୍ର ରଘୁନାଥ ମନ୍ଦିର ଯେଉଁଠି ମର୍ଯ୍ୟାଦା ପୁରୁଷୋତ୍ତମ ଶ୍ରୀରାମଙ୍କ ଜନ୍ମ ଠାରୁ ଅଭିଷେକ ତା ପରଦିନ ଯାତ୍ରା ପର୍ଯ୍ୟନ୍ତ ଉତ୍ସବ ଦୀର୍ଘ ୧୨ ଦିନ ଧରି ଅତି ସୁନ୍ଦର ତଥା ଜାକଜମକ ରେ ପାଳନ କରାଯାଏ । ଅନ୍ୟ ସ୍ଥାନରେ ଲଙ୍କା ପୋଡି ପରେ ଯାତ୍ରା କରାଯାଏ ।
ମନ୍ଦିର ଗର୍ଭଗୃହସ୍ଥ ରତ୍ନ ସିଂହାସନ ଉପରେ ଶ୍ରୀରାମ ଓ ଲକ୍ଷ୍ମଣଙ୍କ ପ୍ରସ୍ତର ମୂର୍ତ୍ତି,ସୀତା ଦେବୀଙ୍କର ଅଷ୍ଟଧାତୁର ମୂର୍ତ୍ତି ଏବଂ ହନୁମାନଙ୍କ କାଷ୍ଠ ମୂର୍ତ୍ତି ପୂଜା ପାଉଛନ୍ତି ।
ଉପେନ୍ଦ୍ର ଭଞ୍ଜଙ୍କ ପିତାମହ ରାଜକଵି ଧନଞ୍ଜୟ ଭଞ୍ଜ(୧୬୩୬-୧୭୦୧)ଙ୍କ ଦ୍ଵାରା ନିର୍ମାଣ ହୋଇଥିଵା ଏବଂ କୈାଣସି କାରଣ ବଶତଃ ଧ୍ବଂସ ପାଇଥିବା ପରେ ଶ୍ରୀକର ଭଞ୍ଜ(୧୭୯୦-୯୯ ଓ ୧୮୧୯-୩୨)ଙ୍କ ସମୟରେ ପୁନଃରୁଦ୍ଧାର କରାଯାଇଥିବା ଏହି ମନ୍ଦିରରେ ରାମନବମୀ ଦିନ ପ୍ରଭୁ ଶ୍ରୀରାମଙ୍କ ଜନ୍ମ ଉତ୍ସବ ପାଳନ କରାଯାଏ । ତାପର ଦିନ ଅର୍ଥାତ୍ ଦ୍ବିତୀୟ ଦିନଠାରୁ ଅଷ୍ଟମ ଦିନ ପର୍ଯ୍ୟନ୍ତ ପ୍ରଭୁ ରାମ ଓ ଲକ୍ଷ୍ମଣ ସୁସଜ୍ଜିତ ରଥରେ ନଗର ପରିକ୍ରମା ପରେ ଅଷ୍ଟମ ଦିନ ପ୍ରଭୁଙ୍କ ଵିଵାହ ଉତ୍ସବ ,ନବମ ଦିନ ବନବାସ, ଦଶମ ଦିନ ଲଙ୍କାପୋଡି ହୋଇଥାଏ।