ଢାକା: ବାଂଲାଦେଶରେ ହିନ୍ଦୁମାନଙ୍କ ଉପରେ ଆକ୍ରମଣ ବନ୍ଦ ହେବାର ନାଁ ନେଉନାହିଁ | ଏବେ ପୁଣି ସୂଚନା ମିଳିଛି ଯେ ରବିବାର ରାତିରେ ରଙ୍ଗପୁରର ପୀରଗଞ୍ଜରେ ୬୫ ରୁ ଅଧିକ ହିନ୍ଦୁଙ୍କ ଘରେ ଉପଦ୍ରବୀମାନେ ନିଆଁ ଲଗାଇ ଦେଇଛନ୍ତି। ସ୍ଥାନୀୟ ସଂଘ ପରିଷଦର ସଭାପତିଙ୍କ କହିବାନୁସାରେ, ଅତି କମରେ ୬୫ ହିନ୍ଦୁଙ୍କ ଘର ଉପରେ ଆକ୍ରମଣ ହୋଇ ନିଆଁ ଲଗାଇ ଦିଆଯାଇଥିଲା। ଏଥିରେ ୨୦ଟି ଘର ସମ୍ପୂର୍ଣ୍ଣ ଜଳିଯାଇଛି।
ହିନ୍ଦୁମାନଙ୍କ ଘରେ ନିଆଁ ଲଗାଇବାର କାରଣ ଏକ ସୋସିଆଲ ମିଡିଆ ପୋଷ୍ଟ ବୋଲି କୁହାଯାଇଛି। ଜଣେ ବ୍ୟକ୍ତି ଫେସବୁକରେ ଏକ ଆପତ୍ତିଜନକ ପୋଷ୍ଟ ସେୟାର କରିଥିଲେ। ଏହାକୁ ନେଇ ଉତ୍ତେଜନା ସୃଷ୍ଟି ହେବା ପରେ ଦୁର୍ବୃତ୍ତ ଉକ୍ତ ବ୍ୟକ୍ତିଙ୍କ ଘର ଉପରେ ଆକ୍ରମଣ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ସୁରକ୍ଷା ଯୋଗାଇ ଦେଇଥିଲା କିନ୍ତୁ ଦୁର୍ବୃତ୍ତମାନେ ନିକଟସ୍ଥ ଘର ଗୁଡ଼ିକରେ ନିଆଁ ଲଗାଇ ଦେଇଥିଲେ। ଢାକା ଟ୍ରିବ୍ୟୁନର ସଭାପତି ମହମ୍ମଦ ସାଦାକୁଲ ଇସଲାମ କହିଛନ୍ତି ଯେ ଦୁର୍ବୃତ୍ତମାନେ ଜମାତ୍-ଇ-ଇସଲାମୀର ସ୍ଥାନୀୟ ଶାଖା ଏବଂ ଏହାର ଛାତ୍ର ୟୁନିଟର ସଦସ୍ୟ ।
ସୋମବାର ଦିନ ବାଂଲାଦେଶରେ ହିନ୍ଦୁମାନଙ୍କ ଉପରେ ହୋଇଥିବା ଆକ୍ରମଣ ସମ୍ପର୍କରେ ଗୃହମନ୍ତ୍ରୀ ଅସଦୁଜମାନ୍ ଖାନ ଏକ ବିବୃତ୍ତି ଦେଇଛନ୍ତି। ସେ କହିଥିଲେ ଯେ ଦେଶରେ ଶାନ୍ତି ଭଙ୍ଗ କରିବାକୁ ସୁଚିନ୍ତିତ ପ୍ରୟାସ କରାଯାଉଛି। ଏହି ଆକ୍ରମଣ ପଛରେ ଏକ ସୁଚିନ୍ତିତ ଷଡଯନ୍ତ୍ର ଅଛି | ସେ କହିଛନ୍ତି ଯେ ଏହି ଆକ୍ରମଣର ଯାଞ୍ଚ କରାଯାଉଛି। ଦୋଷୀଙ୍କୁ ଦଣ୍ଡ ଦିଆଯିବ।