ଶ୍ରୀନଗର: ଜମ୍ମୁ-କାଶ୍ମୀରର ଶ୍ରୀନଗରରୁ ୟୁଏଇର ଶାରଜା ଅଭିମୁଖେ ବିମାନସେବା ପାଇଁ ପାକିସ୍ତାନ ଏହାର ଆକାଶସୀମା ବ୍ୟବହାର କରିବାକୁ ମନା କରି ଦେଇଛି। ପାକିସ୍ତାନର ଏହି ଆକ୍ରୋଶମୂଳକ ନିଷ୍ପତ୍ତି ପରେ ଏବେ ଶ୍ରୀନଗରରୁ ଉଡ଼ାଣ ଭରୁଥିବା ବିମାନ ଗୁଡ଼ିକୁ ଉଦୟପୁର, ଅହମ୍ମଦାବାଦ ଏବଂ ଓମାନ ଦେଇ ଶାରଜା ଯିବାକୁ ପଡିବ । ଏହା ଦ୍ବାରା ଅଧିକ ସମୟ ଲାଗିବ ଓ ଯାତ୍ରୀମାନଙ୍କୁ ମଧ୍ୟ ଅଧିକ ଖର୍ଚ୍ଚାନ୍ତ ହେବାକୁ ପଡ଼ିବ। ପାକିସ୍ତାନର ଏହି ନିଷ୍ପତ୍ତି ସମ୍ବନ୍ଧୀୟ ସୂଚନା ସଂପୃକ୍ତ ମନ୍ତ୍ରଣାଳୟ ପାଇଥିବା ବେଳେ ବେସାମରିକ ବିମାନ ଚଳାଚଳ, ବୈଦେଶିକ ବ୍ୟାପାର ଏବଂ ଗୃହ ବିଭାଗ ମନ୍ତ୍ରଣାଳୟ ବିକଳ୍ପ ବ୍ୟବସ୍ଥା ଉପରେ ବିଚାର କରୁଛନ୍ତି ।
ଅକ୍ଟୋବରରେ ଆରମ୍ଭ ହୋଇଥିବା ଶ୍ରୀନଗର-ଶାରଜା ବିମାନ ସେବା ପାଇଁ ପାକିସ୍ତାନ ଏହାର ବାୟୁସେନା ବ୍ୟବହାର କରିବାକୁ ମନା କରିଦେଇଛି। ପାକିସ୍ତାନର ଏହି ନିଷ୍ପତ୍ତି ଯୋଗୁଁ ବର୍ତ୍ତମାନ ଶ୍ରୀନଗରରୁ ଶାରଜାକୁ ବିମାନ ଉଡ଼ାଣ ପାଇଁ ଏକ ଘଣ୍ଟା ସମୟ ଲାଗିବ, ଏବଂ ଏହାର ଭଡା ମଧ୍ୟ ବୃଦ୍ଧି ପାଇବ । ପାକିସ୍ତାନର ଏହି ନିଷ୍ପତ୍ତିକୁ ଦୁର୍ଭାଗ୍ୟଜନକ ବୋଲି ବର୍ଣ୍ଣନା କରି ପୂର୍ବତନ ଜାମ୍ମୁ କାଶ୍ମୀରର ସିଏମ୍ ଓମାର ଅବଦୁଲ୍ଲା ଟୁଇଟ୍ କରି କହିଛନ୍ତି, ୨୦୦୯-୧୦ରେ ମଧ୍ୟ ପାକିସ୍ତାନ ଠିକ୍ ସେହିପରି କରିଥିଲା ଯେତେବେଳେ ଶ୍ରୀନଗରରୁ ଦୁବାଇ ଅଭିମୁଖେ ବିମାନ ଉଡ଼ାଣ ପାଇଁ ପାକିସ୍ତାନ ନିଜ ବାୟୁସୀମା ବ୍ୟବହାର କରିବାକୁ ମନା କରିଦେଇଥିଲା |
ଅକ୍ଟୋବର ୨୩ରେ ଗୃହମନ୍ତ୍ରୀ ଅମିତ ଶାହା ଜାମ୍ମୁ-ଶ୍ରୀନଗର ଗସ୍ତ ସମୟରେ ଶ୍ରୀନଗର-ଶାରଜା ମଧ୍ୟରେ ବିମାନ ସେବା ଆରମ୍ଭ କରିଥିଲେ। ତେବେ ସେତେବେଳେ ଏହାର ଆକାଶ ସୀମା ବ୍ୟବହାର କରିବା ପୂର୍ବରୁ ପାକିସ୍ତାନ ପ୍ରଶାସନର ଅନୁମତି ଭାରତ ନେଇ ନଥିଲା ବୋଲି କହି ପାକିସ୍ତାନ ବିବାଦକୁ ଆହୁରି ବଢାଇଥିଲା। ଏହା ସତ୍ତ୍ୱେ ବିମାନ ଚଳାଚଳ ଜାରି ରହିଥିଲା |
ଉଲ୍ଲେଖଯୋଗ୍ୟ ଯେ ଭାରତ ସରକାର ଗୋ ଫାଷ୍ଟ୍ ସହଯୋଗରେ ଶାରଜା ଏବଂ ଶ୍ରୀନଗର ମଧ୍ୟରେ ସିଧାସଳଖ ବିମାନସେବା ଆରମ୍ଭ କରିଛନ୍ତି। ଏବେ ଗୋ ଫାଷ୍ଟ ଶ୍ରୀନଗର ଏବଂ ଶାରଜା ମଧ୍ୟରେ ସପ୍ତାହରେ ଚାରିଟି ବିମାନ ଚଳାଚଳ କରୁଛି |