କୋଲକାତା: ପଶ୍ଚିମବଙ୍ଗର ତିନୋଟି ବିଧାନସଭା ଭବାନୀପୁର, ସମସେରଗଞ୍ଜ ଏବଂ ଜାଙ୍ଗିପୁରର ଆସନରେ ଆଜି ଉପନିର୍ବାଚନ ଅନୁଷ୍ଠିତ ହେଉଛି । ସକାଳ ୭ ଟାରୁ ମତଦାନ ଆରମ୍ଭ ହୋଇଛି। ଭବାନୀପୁର ଆସନ ଉପରେ ସମସ୍ତଙ୍କ ନଜର ରହିଛି । କାରଣ ତୃଣମୂଳ କଂଗ୍ରେସ ସୁପ୍ରିମୋ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ଏଠାରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ମୁଖ୍ୟମନ୍ତ୍ରୀ ପଦରେ ରହିବାକୁ ହେଲେ ତାଙ୍କୁ ଏହି ନିର୍ବାଚନରେ ଜିତିବାକୁ ପଡିବ | ଅନ୍ୟପକ୍ଷରେ ବିଜେପି ମମତାଙ୍କ ବିରୋଧରେ ଓକିଲ ପ୍ରିୟଙ୍କା ଟିବ୍ରେଓ୍ବାଲଙ୍କୁ ପ୍ରାର୍ଥୀ କରିଛି ।
ପ୍ରଚାର ଅଭିଯାନର ଶେଷ ଦିନରେ ୮୦ ରୁ ଅଧିକ ବିଜେପି ନେତା ଭବାନୀପୁରର ପ୍ରତ୍ୟେକ ୱାର୍ଡରେ ପହଞ୍ଚି ପ୍ରଚାର କରିଥିଲେ। କେନ୍ଦ୍ର ମନ୍ତ୍ରୀ ହାର୍ଦ୍ଦିକ ସିଂ ପୁରୀ ଏବଂ ସ୍ମୃତି ଇରାନୀ ମଧ୍ୟ ପ୍ରଚାର କରିଥିଲେ। ଏଥି ସହିତ ଟିଏମସି ମଧ୍ୟ ଏହି ଅଭିଯାନରେ ନିଜର ପୂରା ବଳ ଲଗାଇ ଦେଇଥିଲା। ଏକ ଐତିହାସିକ ବିଜୟ ପଞ୍ଜିକରଣ କରିବାକୁ ଚାହୁଁଥିବାରୁ ମମତା ନିଜେ ଗୋଟିଏ ପରେ ଗୋଟିଏ ରାଲି କରିଥିଲେ। ଏହି ଅଭିଯାନ ସମୟରେ ମମତା କହିଛନ୍ତି- ଖେଳ ପୁଣି ଭବାନୀପୁର ଆସନରୁ ଆରମ୍ଭ ହୋଇ ବିଜେପିକୁ କେନ୍ଦ୍ରରୁ ହଟାଇବା ସହ ଶେଷ ହେବ।
ଏପ୍ରିଲ୍-ମେ’ରେ ଅନୁଷ୍ଠିତ ବିଧାନସଭା ନିର୍ବାଚନରେ ମମତାଙ୍କ ଦଳ ବିପୁଳ ବିଜୟ ସହ ରାଜ୍ୟରେ କ୍ରମାଗତ ତୃତୀୟ ଥର କ୍ଷମତା ଦଖଲ କରିଥିଲେ ମଧ୍ୟ ନିଜେ ମମତା ନନ୍ଦିଗ୍ରାମ ଆସନରୁ ତାଙ୍କର ଏକଦା ଘନିଷ୍ଠ ସହଯୋଗୀ ବିଜେପିର ଶୁଭେନ୍ଦୁ ଅଧିକାରୀଙ୍କ ଠାରୁ ହାରିଯାଇଥିଲେ ।
ସାମ୍ବିଧାନିକ ବିଧି ଅନୁଯାୟୀ କୌଣସି ନେତାଙ୍କୁ ମନ୍ତ୍ରୀ ପଦ ବଜାୟ ରଖିବାକୁ ହେଲେ ସେ ୬ ମାସ ମଧ୍ୟରେ ବିଧାନସଭା କିମ୍ବା ବିଧାନ ପରିଷଦର ସଦସ୍ୟ ହେବାକୁ ପଡ଼ିବ।