ନୂଆଦିଲ୍ଲୀ: ତୃଣମୂଳ କଂଗ୍ରେସ ସୁପ୍ରିମୋ ମମତା ବାନାର୍ଜୀଙ୍କ ପରେ ନିର୍ବାଚନ ରଣନୀତିକାର ପ୍ରଶାନ୍ତ କିଶୋର ମଧ୍ୟ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ବିରୋଧୀଦଳର ନେତୃତ୍ବ ନେଇ କିଶୋର କଂଗ୍ରେସ ଉପରେ ପ୍ରଶ୍ନ ଉଠାଇଛନ୍ତି। କିଶୋର କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ଯେଉଁ ଦଳ ୯୦% ନିର୍ବାଚନ ହାରିଛି, ସେହି ଦଳର ନେତୃତ୍ୱ ନେବା କୌଣସି ବ୍ୟକ୍ତିଙ୍କ ଦୈବୀଦତ୍ତ ଅଧିକାର ନୁହେଁ।
ପ୍ରଶାନ୍ତ କିଶୋର ଗୁରୁବାର ଏକ ଟ୍ୱିଟ୍ କରି କହିଛନ୍ତି, ଯେଉଁ ବିଚାର ଏବଂ ସ୍ଥାନର କଂଗ୍ରେସ ପ୍ରତିନିଧିତ୍ୱ କରୁଛି ତାହା ଏକ ମଜବୁତ୍ ବିରୋଧୀ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ, କିନ୍ତୁ ବିରୋଧୀଦଳର ନେତୃତ୍ୱର ନିଷ୍ପତ୍ତି ଗଣତାନ୍ତ୍ରିକ ଉପାୟରେ କରାଯାଉ।
ପଶ୍ଚିମବଙ୍ଗରେ ଅନୁଷ୍ଠିତ ବିଧାନସଭା ନିର୍ବାଚନରେ ପ୍ରଶାନ୍ତ କିଶୋର ମମତା ବାନାର୍ଜୀଙ୍କ ନିର୍ବାଚନ ପ୍ରଚାର ପରିଚାଳନା କରିଥିଲେ। ନିର୍ବାଚନରେ ମମତାଙ୍କ ଦଳ ବିପୁଳ ବିଜୟ ହାସଲ କରିଥିଲା । ଏବେ ମମତା ଦିଲ୍ଲୀ ଏବଂ ମୁମ୍ବାଇ ଗସ୍ତ କରି ଦଳର ସମ୍ପ୍ରସାରଣରେ ବ୍ୟସ୍ତ ଅଛନ୍ତି। ରାଜନୈତିକ ସମୀକ୍ଷକମାନେ କହିଛନ୍ତି ଯେ ପ୍ରଶାନ୍ତ କିଶୋର ମମତା ବାନାର୍ଜୀଙ୍କୁ ବିରୋଧୀ ଦଳର ନେତା ଭାବରେ ପ୍ରୋଜେକ୍ଟ କରିବାକୁ କାର୍ଯ୍ୟ କରୁଛନ୍ତି।