ନୂଆଦିଲ୍ଲୀ: ୱେଷ୍ଟଇଣ୍ଡିଜ୍ ବିପକ୍ଷ ଟି-୨୦ ସିରିଜ୍ ପାଇଁ ଗୁରୁବାର ୧୮ ଜଣିଆ ଭାରତୀୟ ଦଳ ଘୋଷଣା ହୋଇଛି । ଏହି ସିରିଜ୍ ପାଇଁ ରୋହିତ ଶର୍ମା ଫେରିବେ ଏବଂ ଦଳର ନେତୃତ୍ବ ନେବେ । ଆଘାତ ପରେ କେଏଲ୍ ରାହୁଲ ମଧ୍ୟ ପ୍ରତ୍ୟାବର୍ତ୍ତନ କରିଛନ୍ତି। ଅନ୍ୟପକ୍ଷରେ ବିରାଟ କୋହଲି ଏବଂ ଯସପ୍ରୀତ ବୁମ୍ରାଙ୍କୁ ବିଶ୍ରାମ ଦିଆଯାଇଛି । ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ ପୂର୍ବରୁ ରାହୁଲ ଆହତ ହୋଇଥିଲେ। ଏହା ପରେ ସେ ଚିକିତ୍ସା ପାଇଁ ଜର୍ମାନୀ ଯାଇଥିଲେ। ନିକଟରେ ସେ ଅସ୍ତ୍ରୋପଚାର କରି ସେଠାରୁ ଫେରିଛନ୍ତି | ଆଘାତ ପରେ କୁଲଦୀପ ଯାଦବଙ୍କ ମଧ୍ୟ ଦଳକୁ ପ୍ରତ୍ୟାବର୍ତ୍ତନ ହୋଇଛି । ତେବେ ଉଭୟ ରାହୁଲ ଓ କୁଲଦୀପ କେବଳ ଫିଟନେସ୍ ପରୀକ୍ଷା ପରେ ଦଳରେ ସ୍ଥାନ ପାଇବେ |
ଏହି ଗସ୍ତରେ ସମୁଦାୟ 5ଟି ଟି-୨୦ ଖେଳାଯିବ | ଟି-୨୦ ସିରିଜ୍ ୨୯ ଜୁଲାଇରୁ ଆରମ୍ଭ ହେବ, ଯାହା ଅଗଷ୍ଟ ୭ ପର୍ଯ୍ୟନ୍ତ ଚାଲିବ | ଏହି ସିରିଜର ୨ଟି ମ୍ୟାଚ୍ ଆମେରିକାରେ ମଧ୍ୟ ଖେଳାଯିବ |
ବିସିସିଆଇ ଦ୍ୱାରା ପ୍ରକାଶିତ ତାଲିକାରେ ବିରାଟ କୋହଲି ଏବଂ ବୁମରାଙ୍କ ନାମ ନାହିଁ। ଉଭୟଙ୍କୁ ବିଶ୍ରାମ ଦିଆଯିବ ବୋଲି ପୂର୍ବରୁ ହିଁ ଚର୍ଚ୍ଚା ହେଉଥିଲା। ଆହତ କାରଣରୁ ଇଂଲଣ୍ଡ ବିପକ୍ଷ ପ୍ରଥମ ଦିନିକିଆରେ କୋହଲି ଖେଳିପାରିନଥିଲେ। ଆଜି ଅନୁଷ୍ଠିତ ହେବାକୁ ଥିବା ଦ୍ୱିତୀୟ ଦିନିକିଆରେ ବି ତାଙ୍କ ଖେଳିବା ସମ୍ଭାବନା କମ୍ | ଅନ୍ୟପକ୍ଷରେ, ବୁମ୍ରାଙ୍କୁ କାର୍ଯ୍ୟଭାର ପରିଚାଳନା ଅଧୀନରେ ବିଶ୍ରାମ ଦିଆଯାଇଛି। ଇଂଲଣ୍ଡରେ ଟେଷ୍ଟ ବ୍ୟତୀତ ସେ ଟି-୨୦ ଏବଂ ଦିନିକିଆ ସିରିଜରେ ମଧ୍ୟ ଖେଳିଥିଲେ ।
ଅଫ୍ ସ୍ପିନର ଆର ଅଶ୍ୱିନ୍ ମଧ୍ୟ ଦଳରେ ସ୍ଥାନ ପାଇଛନ୍ତି। ସେ ନଭେମ୍ବର ୨୦୨୧ରେ ଶେଷଥର ଆନ୍ତର୍ଜାତୀୟ ଟି-୨୦ ଖେଳିଥିଲେ | ଚଳିତ ବର୍ଷ ହେବାକୁ ଥିବା ଟି-୨୦ ବିଶ୍ୱକପ ପାଇଁ ଏହି ଗସ୍ତ ତାଙ୍କ ପାଇଁ ଗୁରୁତ୍ୱପୂର୍ଣ୍ଣ ହୋଇପାରେ। ଏହା ବ୍ୟତୀତ ବାମହାତୀ ସ୍ପିନର କୁଲଦୀପ ଯାଦବ ମଧ୍ୟ ଦଳରେ ସ୍ଥାନ ବଜାୟ ରଖିବାକୁ ଚାହିଁବେ ।
ଭାରତୀୟ ଟି-୨୦ ଦଳ: ରୋହିତ ଶର୍ମା (କ୍ୟାପଟେନ୍), ଇଶାନ୍ କିଶାନ୍, କେଏଲ୍ ରାହୁଲ, ସୂର୍ଯ୍ୟକୁମାର ଯାଦବ, ଦୀପକ ହୁଡା, ଶ୍ରେୟସ୍ ଆୟର୍, ଦୀନେଶ କାର୍ତ୍ତିକ, ରିଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଅକ୍ଷର ପଟେଲ, ଆର୍ ଅଶ୍ୱିନ, ରବି ବିଷ୍ଣୋଇ, କୁଲଦୀପ ଯାଦବ, ଅବେଶ ଖାନ, ହର୍ଷଲ ପଟେଲ, ଅର୍ଶଦୀପ ସିଂ।