ନୂଆଦିଲ୍ଲୀ: ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀଙ୍କ ଆଜି ୫୨ ତମ ଜନ୍ମଦିନ । ଏହି ଅବସରରେ ଦଳର ନେତାଙ୍କ ସମେତ ସମର୍ଥକମାନେ ତାଙ୍କୁ ଅଭିନନ୍ଦନ ଜଣାଇଥିବାବେଳେ ରାହୁଲ କିନ୍ତୁ ଦଳୀୟ କର୍ମୀଙ୍କୁ ତାଙ୍କ ଜନ୍ମଦିନ ପାଳନ ନକରିବାକୁ ଅନୁରୋଧ କରିଛନ୍ତି। ଦଳର ନେତା ଓ କର୍ମୀଙ୍କୁ ଏକ ବାର୍ତ୍ତାରେ ରାହୁଲ କହିଛନ୍ତି ଯେ ଦେଶର ଯୁବକମାନେ ଆଜି ଅସନ୍ତୁଷ୍ଟ ଏବଂ ରାସ୍ତାରେ ବିରୋଧ କରୁଛନ୍ତି, କଂଗ୍ରେସ କର୍ମୀମାନେ ସେମାନଙ୍କ ସହ ଛିଡ଼ା ହେବା ଉଚିତ୍।
ଅଲ ଇଣ୍ଡିଆ କଂଗ୍ରେସ କମିଟି (ଏଆଇସିସି) ସାଧାରଣ ସମ୍ପାଦକ ଜୟରାମ ରମେଶ ଟ୍ୱିଟରରେ ରାହୁଲ ଗାନ୍ଧୀଙ୍କ ବାର୍ତ୍ତା ପୋଷ୍ଟ କରିଛନ୍ତି । ଏଥିରେ ରାହୁଲ କହିଛନ୍ତି ଯେ ବର୍ତ୍ତମାନ ଦେଶର ପରିସ୍ଥିତି ଅତ୍ୟନ୍ତ ଚିନ୍ତାଜନକ। ସଶସ୍ତ୍ର ବାହିନୀରେ ନିଯୁକ୍ତି ପାଇଁ ଅଗ୍ନିପଥ ଯୋଜନା ବିରୋଧରେ ଦେଶର ଅନେକ ସ୍ଥାନରେ ଚାଲିଥିବା ବିକ୍ଷୋଭ ସମ୍ପର୍କରେ ରାହୁଲ କହିଛନ୍ତି, “ଦେଶର ଯୁବକମାନେ ଅସୁବିଧାରେ ପଡ଼ିଛନ୍ତି। ଏହି ସମୟରେ ଆମେ ସେମାନଙ୍କ ଏବଂ ସେମାନଙ୍କ ପରିବାର ସହିତ ଛିଡ଼ା ହେବା ଜରୁରୀ । ସେ କହିଛନ୍ତି, “ମୁଁ ମୋର ଜନ୍ମଦିନକୁ କୌଣସି ପ୍ରକାରେ ପାଳନ ନକରିବାକୁ ଦେଶର ସମସ୍ତ କଂଗ୍ରେସ କର୍ମୀ ଏବଂ ମୋର ଶୁଭେଚ୍ଛୁମାନଙ୍କୁ ନିବେଦନ କରୁଛି।
ରାହୁଲ ଗାନ୍ଧୀଙ୍କ ମା’ ତଥା ବର୍ତ୍ତମାନର କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ ସ୍ୱାସ୍ଥ୍ୟ ଅବସ୍ଥା ମଧ୍ୟ ଭଲ ନୁହେଁ। କିଛି ଦିନ ତଳେ ସେ କରୋନା ପଜିଟିଭ୍ ଚିହ୍ନଟ ହୋଇଥିଲେ | ସେବେଠାରୁ ତାଙ୍କୁ ଦିଲ୍ଲୀର ସାର୍ ଗଙ୍ଗା ରାମ ହସ୍ପିଟାଲରେ ଭର୍ତ୍ତି କରାଯାଇଥିଲା। ମିଳିଥିବା ସୂଚନା ଅନୁଯାୟୀ, ସୋନିଆଙ୍କ ଫଙ୍ଗଲ୍ ସଂକ୍ରମଣ ମଧ୍ୟ ହୋଇଥିବା ଜଣାଯାଇଛି। ରାହୁଲ ଗାନ୍ଧୀଙ୍କ ଜନ୍ମଦିନ ପାଳନ ନକରିବାର ଏହା ମଧ୍ୟ ଏକ କାରଣ ହୋଇପାରେ | ତେବେ ରାହୁଲଙ୍କ ଚିଠିରେ ସେପରି କିଛି ଉଲ୍ଲେଖ ନଥିଲା।