ନୂଆଦିଲ୍ଲୀ: ତୁର୍କୀରେ ଭୟଙ୍କର ଭୂମିକମ୍ପ ସହ ଡଚ୍ ଗବେଷକ ଫ୍ରାଙ୍କ୍ ହୁଗରବିଟ୍ସଙ୍କ ମଧ୍ୟ ଚର୍ଚ୍ଚାରେ ରହିଛନ୍ତି । ଫ୍ରାଙ୍କ୍ ହୁଗରବିଟ୍ସ ତୁର୍କୀ ଏବଂ ଏହାର ପଡୋଶୀ ଅଞ୍ଚଳରେ ଏକ ବଡ଼ ଭୂକମ୍ପ ନେଇ ଭବିଷ୍ୟବାଣୀ କରିଥିଲେ । ତୁର୍କୀରେ ହୋଇଥିବା ଭୂକମ୍ପ ଯୋଗୁଁ ୩୦,୦୦୦ ରୁ ଅଧିକ ଲୋକଙ୍କର ମୃତ୍ୟୁ ହୋଇଛି ।
ଏବେ ଫ୍ରାଙ୍କ ହୁଗରବିଟ୍ସଙ୍କ ଆଉ ଏକ ଭିଡିଓ ଇଣ୍ଟରନେଟରେ ସମସ୍ତଙ୍କ ଦୃଷ୍ଟି ଆକର୍ଷଣ କରୁଛି | ଏହି ଭିଡିଓରେ ହୁଗରବିଟ୍ସ ଭାରତୀୟ ଉପମହାଦେଶରେ ମଧ୍ୟ ଏକ ବଡ଼ ଧରଣର ଭୂକମ୍ପ ଆସିବ ବୋଲି ଦାବି କରିଛନ୍ତି । ହୁଗରବିଟ୍ସ କହିଛନ୍ତି ଯେ ଭାରତ ମହାସାଗର ଅଞ୍ଚଳ ଅର୍ଥାତ ଭାରତ-ପାକିସ୍ତାନ ସମେତ ଆଫଗାନିସ୍ତାନର ଅନେକ ଅଞ୍ଚଳରେ ଶକ୍ତିଶାଳୀ ଭୂକମ୍ପ ହୋଇପାରେ।
ଫ୍ରାଙ୍କ ହୁଗରବିଟ୍ସଙ୍କ ସୋଲାର ସିଷ୍ଟମ ଜ୍ୟୋମେଟ୍ରି ସର୍ଭେ (SSGEOS) ପାଇଁ କାମ କରନ୍ତି | ଗ୍ରହ ଗତିବିଧି ଆଧାରରେ ଭୂକମ୍ପ ନେଇ ପୂର୍ବାନୁମାନ କରନ୍ତି ଫ୍ରାଙ୍କ୍ ହୁଗରବିଟ୍ସ । SSGEOS ହେଉଛି ଏକ ଗବେଷଣା ସଂସ୍ଥା ଯାହା ଗ୍ରହ ପରି ମହାକାଶ ପିଣ୍ଡ ଆଧାରରେ ଭୂକମ୍ପ ଜନିତ ଗତିବିଧି ଆକଳନ କରିଥାଏ ।
ତୁର୍କୀରେ ବଡ଼ ଭୂକମ୍ପ ହେବ ବୋଲି ଫ୍ରାଙ୍କ ହୁଗରବିଟ୍ସ ଭବିଷ୍ୟବାଣୀ କରିଥିଲେ । ଏହା ମଧ୍ୟ ସତ ହୋଇଛି। ଫ୍ରାଙ୍କ ହୁଗରବିଟ୍ସ ମଧ୍ୟ କହିଥିଲେ ଯେ ଭବିଷ୍ୟବାଣୀ କରିବା ପୂର୍ବରୁ ସେ ସମ୍ପୂର୍ଣ୍ଣ ଗବେଷଣା କରିଥିଲେ। ଗବେଷଣାରୁ ସେ ଅନୁମାନ କରିଥିଲେ ଯେ ତୁର୍କୀରେ କିଛି ଭୂକମ୍ପ ସମ୍ବନ୍ଧୀୟ କାର୍ଯ୍ୟକଳାପ ଘଟିପାରେ। ତେଣୁ ସେ ଭାବିଥିଲେ ଯେ କୌଣସି ଘଟଣା ଘଟିବା ପୂର୍ବରୁ ଲୋକଙ୍କୁ ଚେତାବନୀ ଦିଆଯିବା ଉଚିତ୍।
ସୋସିଆଲ ମିଡିଆରେ ଫ୍ରାଙ୍କଙ୍କ ଦାବି ଉପରେ ଅନେକ ପ୍ରଶ୍ନ ଉଠିଛି । ଏନେଇ ଫ୍ରାଙ୍କ କହିଛନ୍ତି ଯେ ଭୂକମ୍ପ ବିଷୟରେ ଭବିଷ୍ୟବାଣୀକୁ ସଠିକ୍ ବୋଲି ବିବେଚନା କରାଯାଏ ନାହିଁ। ଅନ୍ୟପକ୍ଷରେ ଆମେରିକୀୟ ଭୂତତ୍ତ୍ୱ ସର୍ବେକ୍ଷଣ କହିଛି ଯେ ଆଜି ପର୍ଯ୍ୟନ୍ତ କୌଣସି ବୈଜ୍ଞାନିକ କୌଣସି ଭୂକମ୍ପ ବିଷୟରେ ସଠିକ୍ ପୂର୍ବାନୁମାନ କରିନାହାଁନ୍ତି। ଭୂକମ୍ପ ଉପରେ ବୈଜ୍ଞାନିକ ଭବିଷ୍ୟବାଣୀ କରିବା ପାଇଁ ଯେଉଁ ପଦ୍ଧତି ଅବଲମ୍ବନ କରାଯାଉଛି ତାହାକୁ ନେଇ ଅନେକ ଦ୍ବନ୍ଦ୍ବ ଓ ବିବାଦ ରହିଛି |
ଭୂକମ୍ପର ତାରିଖ ଏବଂ ସମୟ ବିଷୟରେ ସୋସିଆଲ ମିଡିଆରେ ଫ୍ରାଙ୍କଙ୍କୁ ମଧ୍ୟ ବହୁ ପ୍ରଶ୍ନ କରାଯାଇଛି । ଏହାର ଉତ୍ତରରେ ଫ୍ରାଙ୍କ କହିଛନ୍ତି ଯେ ବୈଜ୍ଞାନିକମାନେ କେବଳ ଗୋଟିଏ ବର୍ଷ ମଧ୍ୟରେ ଭୂକମ୍ପ ବିଷୟରେ ପୂର୍ବାନୁମାନ କରିପାରିବେ। ଆମେ ତାରିଖ ସମୟ ଏବଂ ସଠିକ୍ ସ୍ଥାନ ସମ୍ପର୍କରେ ସୂଚନା ପ୍ରଦାନ କରିବାକୁ ସମର୍ଥ ନୋହୁଁ ।
ଫ୍ରାଙ୍କ ହୁଗରବିଟ୍ସ କହିଛନ୍ତି ଯେ ତାଙ୍କ ସଂସ୍ଥା ଅତୀତରେ ଅନେକ ଭୟଙ୍କର ଭୂକମ୍ପ ବିଷୟରେ ଗବେଷଣା କରିଛି। ଗ୍ରହମାନଙ୍କର ସ୍ଥିତିକୁ ଦେଖି ତାଙ୍କ ସଂସ୍ଥା ଭୂକମ୍ପ ଉପରେ ପୂର୍ବାନୁମାନ କରିଥାଏ ।