ଲଣ୍ଡନ: ଭାରତୀୟ ବଂଶୋଦ୍ଭବ ଋଷି ସୁନକ ମଙ୍ଗଳବାର ବ୍ରିଟେନ ପ୍ରଧାନମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ପୂର୍ବତନ ପ୍ରଧାନମନ୍ତ୍ରୀ ଲିଜ୍ ଟ୍ରସଙ୍କ କ୍ୟାବିନେଟର ଅନେକ ମନ୍ତ୍ରୀଙ୍କୁ ଇସ୍ତଫା ଦେବାକୁ କହିଛନ୍ତି। ଏହାଛଡ଼ା ସେ ଆଉ ଦୁଇଟି ଗୁରୁତ୍ୱପୂର୍ଣ୍ଣ ନିଯୁକ୍ତ ମଧ୍ୟ କରିଛନ୍ତି । ସେ ଡୋମିନିକ୍ ରାବଙ୍କୁ ଉପ ପ୍ରଧାନମନ୍ତ୍ରୀ ଭାବେ ନିଯୁକ୍ତ କରିଥିବା ବେଳେ ଜେରେମି ହଣ୍ଟଙ୍କୁ ଅର୍ଥମନ୍ତ୍ରୀ ବଜାୟ ରଖିଛନ୍ତି ।
ବ୍ରିଟେନର ନୂଆ ପ୍ରଧାନମନ୍ତ୍ରୀ ଋଷି ସୁନକ ରାଜା ଚାର୍ଲ୍ସ ତୃତୀୟଙ୍କୁ ସାକ୍ଷାତ କରିବାର ଏକ ଘଣ୍ଟା ମଧ୍ୟରେ ତାଙ୍କର ଏଜେଣ୍ଡା ଲାଗୁ କରିବାକୁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ତାଙ୍କ ନୂଆ କ୍ୟାବିନେଟ ଗଠନ ପାଇଁ ସେ ଲିଜ୍ ଟ୍ରସଙ୍କ ମନ୍ତ୍ରିମଣ୍ଡଳର ଅନେକ ସଦସ୍ୟଙ୍କ ଇସ୍ତଫା ଦାବି କରିଛନ୍ତି ବୋଲି ସୂତ୍ରରୁ ପ୍ରକାଶ।
ସୂଚନା ଅନୁଯାୟୀ ବର୍ତ୍ତମାନ ସୁଦ୍ଧା ତିନିଜଣ ମନ୍ତ୍ରୀଙ୍କୁ ଇସ୍ତଫା ଦେବାକୁ କୁହାଯାଇଛି। ଏଥିମଧ୍ୟରେ ବାଣିଜ୍ୟ ମନ୍ତ୍ରୀ ଯାଦବ ରିସ୍-ମୋଗ, ନ୍ୟାୟ ମନ୍ତ୍ରୀ ବ୍ରେଣ୍ଡନ୍ ଲୁଇସ୍ ଏବଂ ବିକାଶ ମନ୍ତ୍ରୀ ବିକି ଫୋର୍ଡ ଅଛନ୍ତି । ଜେରେମି ହଣ୍ଟ ଅର୍ଥମନ୍ତ୍ରୀ ଭାବରେ କାର୍ଯ୍ୟ ଜାରି ରଖିବେ।
ଲିଜ୍ ଟ୍ରସ୍ ମାତ୍ର ୪୯ ଦିନ କ୍ଷମତାରେ ରହିବା ପରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ନୂଆ ପ୍ରଧାନମନ୍ତ୍ରୀ ଭାବେ ଦାୟିତ୍ବ ଗ୍ରହଣ କରିବା ପରେ ଋଷି ସୁନକ ଦେଶକୁ ତାଙ୍କ ପ୍ରଥମ ସମ୍ବୋଧନରେ କହିଛନ୍ତି, “ଲିଜ୍ ଟ୍ରସ୍ ଏହି ଦେଶର ବିକାଶ ତଥା ଉନ୍ନତି କରିବାକୁ ଚାହୁଁଥିଲେ। ଏହା ଭୁଲ୍ ନୁହେଁ। ଏହା ଏକ ମହତ୍ ଉଦ୍ଦେଶ୍ୟ ଏବଂ ମୁଁ ପରିବର୍ତ୍ତନ ଆଣିବା ନେଇ ତାଙ୍କର ଉତ୍ସାହକୁ ପ୍ରଶଂସା କରିଥିଲି। କିନ୍ତୁ କିଛି ଭୁଲ୍ ହୋଇଥିଲା, ଯାହାକୁ ବର୍ତ୍ତମାନ ସୁଧାରିବାକୁ ପଡ଼ିବ |