ନୂଆଦିଲ୍ଲୀ: କିଛି ଗଣମାଧ୍ୟମରେ ସାମ୍ପ୍ରଦାୟିକ ରିପୋର୍ଟକୁ ନେଇ ସୁପ୍ରିମକୋର୍ଟ ଗୁରୁବାର ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି। କୋର୍ଟ କହିଛନ୍ତି ଯେ ଏଭଳି ରିପୋର୍ଟ ଦେଶର ନାମ ଖରାପ କରୁଛି । ଗତ ବର୍ଷ ଦିଲ୍ଲୀରେ ତବଲିଗୀ ଜମାତ୍ ସମାବେଶ ଉପରେ ଏକ ଆବେଦନର ଶୁଣାଣି ବେଳେ କୋର୍ଟ ଏହି ମନ୍ତବ୍ୟ ଦେଇଛନ୍ତି। ପ୍ରଧାନ ବିଚାରପତି ଏନ.ଭି ରମନ୍ନା କହିଛନ୍ତି ଯେ ସମସ୍ୟା ହେଉଛି ଗଣମାଧ୍ୟମର ଏକ ଭାଗ ଦେଶର ପ୍ରତ୍ୟେକ ଘଟଣାକୁ ସାମ୍ପ୍ରଦାୟିକ ଦୃଷ୍ଟିକୋଣରୁ ଦର୍ଶାଉଛି।
ସୋସିଆଲ ମିଡ଼ିଆରେ ଫେକ୍ ନ୍ୟୁଜ୍ ପ୍ରସାରଣ ନେଇ କୋର୍ଟ ଉଦବେଗ ପ୍ରକାଶ କରିଛନ୍ତି। ୱେବ୍ ପୋର୍ଟାଲର ଉତ୍ତରଦାୟିତ୍ୱ ଉପରେ ମଧ୍ୟ ସର୍ବୋଚ୍ଚ ନ୍ୟାୟାଳୟ ଟିପ୍ପଣୀ କରିଛନ୍ତି | ପ୍ରଧାନ ବିଚାରପତିଙ୍କ ନେତୃତ୍ୱରେ ଏକ ଖଣ୍ଡପୀଠ କହିଛନ୍ତି ଯେ ୱେବ୍ ପୋର୍ଟାଲ ଉପରେ କାହାର ନିୟନ୍ତ୍ରଣ ନାହିଁ। ପ୍ରତ୍ୟେକ ଖବରକୁ ସାମ୍ପ୍ରଦାୟିକ ରଙ୍ଗ ଦେବା ପାଇଁ ପ୍ରୟାସ କରାଯାଉଛି, ଯାହା ଏକ ବଡ ସମସ୍ୟା ଅଟେ |
ପ୍ରଧାନ ବିଚାରପତି କହିଛନ୍ତି ଯେ ଟ୍ୱିଟର, ଫେସବୁକ ଏବଂ ୟୁଟ୍ୟୁବ ଭଳି ସୋସିଆଲ ମିଡିଆ ପ୍ଲାଟ ଫର୍ମ ବିଚାରପତିଙ୍କୁ କୌଣସି ଉତ୍ତର ଦେଉନାହିଁ ଏବଂ କୌଣସି ଉତ୍ତରଦାୟିତ୍ୱ ବିନା ଅନୁଷ୍ଠାନ ବିରୋଧରେ ଲେଖୁଛନ୍ତି। ୱେବ୍ ପୋର୍ଟାଲ୍ ଏବଂ ୟୁଟ୍ୟୁବ୍ ଚ୍ୟାନେଲରେ ମିଛ ଖବର ଉପରେ କୌଣସି ନିୟନ୍ତ୍ରଣ ନାହିଁ | ଯଦି ଆପଣ ୟୁଟ୍ୟୁବକୁ ଯାଆନ୍ତି, ତେବେ ଆପଣ ଜାଣିବେ ଯେ କିପରି ମିଛ ଖବର ଖୋଲାଖୋଲି ଭାବରେ ପ୍ରସାରିତ ହେଉଛି | ଯେକେହି ୟୁଟ୍ୟୁବରେ ଏକ ଚ୍ୟାନେଲ ଆରମ୍ଭ କରିଦେଉଛନ୍ତି |
ଜଷ୍ଟିସ ରମନ୍ନା କହିଛନ୍ତି ଯେ ଲୋକଙ୍କ କଥା ଭୁଲିଯାଆନ୍ତୁ, ସେମାନେ ଅନୁଷ୍ଠାନ ଏବଂ ବିଚାରପତିଙ୍କ ଉପରେ ଯାହା ଇଚ୍ଛା ତାହା ଲେଖୁଛନ୍ତି। ଏନେଇ ମୁଁ ଫେସବୁକ୍, ଟ୍ୱିଟର ଏବଂ ୟୁଟ୍ୟୁବରୁ କୌଣସି କାର୍ଯ୍ୟାନୁଷ୍ଠାନ ଦେଖି ନାହିଁ। ଏଥିପାଇଁ ସେମାନେ ଉତ୍ତରଦାୟୀ ରହୁନାହାନ୍ତି । ଏହା ଆମର ଅଧିକାର ବୋଲି ସେମାନେ କହୁଛନ୍ତି। ସେମାନେ କେବଳ ଶକ୍ତିଶାଳୀ ଲୋକଙ୍କୁ ଉତ୍ତର ଦିଅନ୍ତି |
ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟଙ୍କ ଆଗରେ ଉତ୍ତର ରଖି କହିଛନ୍ତି ଯେ ସାମାଜିକ ତଥା ଡିଜିଟାଲ ମିଡିଆକୁ ନିୟନ୍ତ୍ରଣ କରିବା ପାଇଁ ନୂଆ ଆଇଟି ନିୟମ ଅଣାଯାଇଛି ଏବଂ ସୋସିଆଲ ମିଡ଼ିଆକୁ ନିୟନ୍ତ୍ରଣ କରିବା ପାଇଁ ଉଦ୍ୟମ ଚାଲିଛି। ବିଭିନ୍ନ ହାଇକୋର୍ଟରେ ଆଇଟି ନିୟମକୁ ଚ୍ୟାଲେଞ୍ଜ କରୁଥିବା ଆବେଦନକୁ ସୁପ୍ରିମକୋର୍ଟକୁ ସ୍ଥାନାନ୍ତର କରିବାକୁ ସେ କୋର୍ଟଙ୍କୁ ଅନୁରୋଧ କରିଛନ୍ତି। ବିଭିନ୍ନ ହାଇକୋର୍ଟ ଭିନ୍ନ ଭିନ୍ନ ଆଦେଶ ଦେଉଛନ୍ତି। ଏହି ବିଷୟ ସମଗ୍ର ଦେଶର, ତେଣୁ ଏକ ସାମଗ୍ରିକ ଦୃଷ୍ଟିକୋଣରୁ ଏହାର ବିଚାର କରାଯିବା ଆବଶ୍ୟକ ବୋଲି ସଲିସିଟର ଜେନେରାଲ କହିଛନ୍ତି ।