ନୂଆଦିଲ୍ଲୀ: ଅବକାରୀ ଦୁର୍ନୀତି ମାମଲାରେ ଗିରଫଦାରୀ ବିରୋଧରେ ଅରବିନ୍ଦ କେଜ୍ରିୱାଲଙ୍କ ଆବେଦନର ଶୁଣାଣି ଆଜି ବି ସୁପ୍ରିମକୋର୍ଟରେ ହୋଇଛି। କେଜ୍ରିୱାଲଙ୍କୁ ଗିରଫ କରିବାର ସମୟ ନେଇ ପ୍ରଶ୍ନ ଉଠାଇଛନ୍ତି ସୁପ୍ରିମକୋର୍ଟ । ଠିକ୍ ସାଧାରଣ ନିର୍ବାଚନ ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ କାହିଁକି ଗିରଫ କରାଗଲା ବୋଲି ସୁପ୍ରିମକୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ପଚାରିଛନ୍ତି । ଇଡି ଶୁକ୍ରବାର ଏହି ପ୍ରଶ୍ନର ଜବାବ ରଖିବ।
କେଜ୍ରିୱାଲଙ୍କ ଆବେଦନର ଶୁଣାଣି କରୁଥିବା ଜଷ୍ଟିସ ସଞ୍ଜୀବ ଖାନ୍ନା ଓ ଜଷ୍ଟିସ ଦୀପଙ୍କର ଦତ୍ତାଙ୍କ ଖଣ୍ଡପୀଠ ଇଡିକୁ କିଛି ଗୁରୁତ୍ଵପୂର୍ଣ୍ଣ ପ୍ରଶ୍ନ ପଚାରିଥିଲେ । ଖଣ୍ଡପୀଠ ଇଡିକୁ କହିଛନ୍ତି ” ଆପଣ ନ୍ୟାୟିକ ପ୍ରକ୍ରିୟା ବିନା ଅପରାଧିକ କାର୍ଯ୍ୟାନୁଷ୍ଠାନ କିପରି ଆରମ୍ଭ କରିପାରିବେ ? ଏହି ମାମଲାରେ ଏପର୍ଯ୍ୟନ୍ତ କୌଣସି ବାଜ୍ୟାପ୍ତି ପ୍ରକ୍ରିୟା ଗ୍ରହଣ କରାଯାଇ ନାହିଁ । ଯଦି ଏପରି ହୁଏ, ତେବେ କେଜ୍ରିୱାଲ ଏହି ମାମଲାରେ କିପରି ସମ୍ପୃକ୍ତ ଅଛନ୍ତି ତାହା ପ୍ରମାଣିତ କରନ୍ତୁ।”
ସୁପ୍ରିମକୋର୍ଟ ମନୀଷ ସିସୋଦିଆ ମାମଲାର ଉଦାହରଣ ଦେଇ କହିଛନ୍ତିି, ଏହି (ସିସୋଦିଆ) ମାମଲାରେ ତଦନ୍ତକାରୀ ଅଧିକାରୀ କିଛି ପ୍ରମାଣ ସଂଗ୍ରହ କରିଛନ୍ତି। କିନ୍ତୁ କେଜ୍ରିୱାଲ ମାମଲାରେ ପ୍ରମାଣ କାହିଁ ? ତଦନ୍ତ ଆରମ୍ଭ ଏବଂ ଗିରଫ ମଧ୍ୟରେ ଏତେ ଲମ୍ବା ବ୍ୟବଧାନ କାହିଁକି ବୋଲି ଇଡିକୁ କଡ଼ା ପ୍ରଶ୍ନ କରିଛନ୍ତି ସର୍ବୋଚ୍ଚ ନ୍ୟାୟାଳୟ ।