ନୂଆଦିଲ୍ଲୀ: ୟୁପିଏସସିର ବିନା କୌଣସି ହସ୍ତକ୍ଷେପରେ ପୋଲିସ ମହାନିର୍ଦେଶକ (ଡିଜିପି) ନିଯୁକ୍ତ କରିବାକୁ ଅନୁମତି ଦେବା ପାଇଁ ପଶ୍ଚିମବଙ୍ଗ ସରକାରଙ୍କ ଆବେଦନକୁ ସୁପ୍ରିମକୋର୍ଟ ଖାରଜ ଦେଇଛନ୍ତି। କୋର୍ଟ କହିଛନ୍ତି ଯେ ଏହି କ୍ଷେତ୍ରରେ ତାଙ୍କ ପୁରୁଣା ଆଦେଶ ସମସ୍ତ ରାଜ୍ୟ ପାଇଁ ପ୍ରଯୁଜ୍ୟ। ସେଥିରେ ପରିବର୍ତ୍ତନ କରିବାର କୌଣସି ଆବଶ୍ୟକତା ନାହିଁ | ସେହି ଏକା ପ୍ରକାର ଆବେଦନ ବାରମ୍ବାର ଦାଖଲ କରିଥିବାରୁ ପଶ୍ଚିମବଙ୍ଗ ସରକାରଙ୍କ ଉପରେ କୋର୍ଟ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି। କୋର୍ଟଙ୍କ ଏହି ଆଦେଶ ପରେ ମମତା ସରକାରଙ୍କ ଆଗରେ କୌଣସି ବିକଳ୍ପ ନାହିଁ। ତାଙ୍କୁ ୟୁପିଏସସି ଦ୍ୱାରା ପରାମର୍ଶ ଦିଆଯାଇଥିବା ଅଧିକାରୀଙ୍କ ମଧ୍ୟରୁ ରାଜ୍ୟ ପୋଲିସ ମୁଖ୍ୟଙ୍କୁ ଚୟନ କରିବାକୁ ପଡ଼ିବ।
୨୦୦୬ରେ ଏକ ନିଷ୍ପତ୍ତିରେ ସୁପ୍ରିମକୋର୍ଟ ପୋଲିସକୁ ରାଜନୈତିକ ହସ୍ତକ୍ଷେପରୁ ଦୂରେଇ ରଖିବାକୁ ରାୟ ଶୁଣାଇଥିଲେ। ‘ପ୍ରକାଶ ସିଂ ବନାମ ଭାରତ ସରକାର’ ମାମଲାରେ ସର୍ବୋଚ୍ଚ ନ୍ୟାୟାଳୟ ତାଙ୍କ ଆଦେଶ ପ୍ରତ୍ୟେକ ରାଜ୍ୟ ପାଇଁ ବାଧ୍ୟତାମୂଳକ କରିଥିଲେ । କୋର୍ଟ କହିଥିଲେ ଯେ ଡିଜିପି ପଦରେ ନିଯୁକ୍ତି ଦେବା ପୂର୍ବରୁ ରାଜ୍ୟ ସରକାର ୟୁପିଏସସିର ବରିଷ୍ଠ ତଥା ଯୋଗ୍ୟ ଆଇପିଏସ୍ ଅଧିକାରୀଙ୍କ ତାଲିକା ନେବେ। ରାଜ୍ୟ ସରକାରଙ୍କୁ ସେହି ଅଧିକାରୀଙ୍କ ତାଲିକାରୁ ନୂଆ ଡିଜିପି ଚୟନ କରିବାକୁ ପଡିବ | ପଶ୍ଚିମବଙ୍ଗରେ ଡିଜିପି ପଦ ୩୧ ଅଗଷ୍ଟରେ ଖାଲି ପଡିଥିଲା। ପଶ୍ଚିମବଙ୍ଗ ସରକାର ଚାହୁଁଥିଲେ ଯେ ନିଜ ଇଚ୍ଛାରେ ତାଙ୍କୁ ପୋଲିସର ନୂତନ ମହାନିର୍ଦ୍ଦେଶକ ବାଛିବା ପାଇଁ ଅନୁମତି ଦିଆଯାଉ।