ନୂଆଦିଲ୍ଲୀ: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭେଟିବାର ଦିନକ ପରେ ବିଜେପି ନେତା ସୁବ୍ରମଣ୍ୟମ ସ୍ୱାମୀ କେନ୍ଦ୍ର ସରକାରଙ୍କୁ ଜୋରଦାର ଆକ୍ରମଣ କରିଛନ୍ତି। ସେ ଆଜି ସକାଳେ ନିଜ ଟ୍ୱିଟର ଆକାଉଣ୍ଟରେ ଟ୍ୱିଟ୍ କରି ମୋଦି ସରକାରଙ୍କ ରିପୋର୍ଟ କାର୍ଡ ପ୍ରକାଶ କରିଛନ୍ତି। ସେ ଲେଖିଛନ୍ତି ଯେ ଅର୍ଥନୀତି, ସୀମା ସୁରକ୍ଷା, ବୈଦେଶିକ ନୀତି, ଜାତୀୟ ସୁରକ୍ଷା ଏବଂ ଆଭ୍ୟନ୍ତରୀଣ ସୁରକ୍ଷା ଭଳି ପ୍ରସଙ୍ଗରେ ମୋଦି ସରକାର ବିଫଳ ହୋଇଛି। ଏହି ବିଫଳତା ପାଇଁ କିଏ ଦାୟୀ ବୋଲି ସେ ପ୍ରଶ୍ନ କରିଛନ୍ତି।
ସୂଚନାଯୋଗ୍ୟ ବିଜେପିର ରାଜ୍ୟସଭା ସାଂସଦ ସୁବ୍ରମଣ୍ୟମ ସ୍ୱାମୀ ବୁଧବାର ଦିନ ମମତା ବାନାର୍ଜୀଙ୍କୁ ଭେଟିବା ପରେ ଜାତୀୟ ରାଜନୀତି ସରଗରମ ହୋଇଥିଲା । ମମତା ବାନାର୍ଜୀଙ୍କୁ ଭେଟିବା ପରେ ତାଙ୍କୁ ସ୍ବାମୀ ଭୂୟସୀ ପ୍ରଶଂସା କରିଥିଲେ।
ସ୍ବାମୀ ଟ୍ୱିଟ୍ କରି ଲେଖିଛନ୍ତି, ମୁଁ ଯେଉଁ ରାଜନେତାଙ୍କ ସହ ସାକ୍ଷାତ କରିଛି କିମ୍ବା କାମ କରିଛି ସେମାନଙ୍କ ମଧ୍ୟରୁ ମମତା ବାନାର୍ଜୀ, ମୋରାରଜୀ ଦେଶାଇ, ଜେପି, ରାଜୀବ ଗାନ୍ଧୀ, ଚନ୍ଦ୍ରଶେଖର ଏବଂ ପିଭି ନରସିଂହ ରାଓଙ୍କ ପରି ନେତା ଅଛନ୍ତି । ଏହି ଲୋକମାନଙ୍କର କଥା ଏବଂ କାର୍ଯ୍ୟ ମଧ୍ୟରେ କୌଣସି ପାର୍ଥକ୍ୟ ନାହିଁ | ଭାରତୀୟ ରାଜନୀତିରେ ଏହା ଏକ ବିରଳ ଗୁଣ |
ସ୍ବାମୀଙ୍କୁ ଯେତେବେଳେ ପ୍ରଶ୍ନ କରାଗଲା ଯେ ସେ ଟିଏମସିରେ ଯୋଗଦେବେ କି ନାହିଁ, ସେ କହିଥିଲେ ଯେ ମୁଁ ସେମାନଙ୍କ(ଟିଏମସି) ସହ ଅଛି। ମୁଁ ପାର୍ଟିରେ ଯୋଗଦେବା ଆବଶ୍ୟକ ନାହିଁ |
ସୁବ୍ରମଣ୍ୟମ ସ୍ୱାମୀ ପୂର୍ବରୁ ହିଁ ବିଜେପିକୁ ଟାର୍ଗେଟ କରିଆସୁଥିଲେ । କିନ୍ତୁ ମମତାଙ୍କୁ ଭେଟିବା ପରେ ସେ ମୋଦି ସରକାର ଉପରେ ଜୋରଦାର ଆକ୍ରମଣ କରିଛନ୍ତି। ମୋଦି ସରକାରର ଦ୍ୱିତୀୟ ଇନିଂସରେ କୌଣସି ପ୍ରମୁଖ ଭୂମିକା ନ ମିଳିବାରୁ ଅସନ୍ତୁଷ୍ଟ ଥିବା ସ୍ୱାମୀ କିଛି ସମୟ ପାଇଁ ସରକାରଙ୍କ ନିଷ୍ପତ୍ତିକୁ ଖୋଲାଖୋଲି ସମାଲୋଚନା କରିବାକୁ ପଛଘୁଞ୍ଚା ଦେଇନାହାଁନ୍ତି।
ଗତ ବର୍ଷ ମଧ୍ୟ ଯେତେବେଳେ ପଶ୍ଚିମବଙ୍ଗରେ ବିଜେପି ଏବଂ ଟିଏମସି ମଧ୍ୟରେ ରାଜନୈତିକ ଲଢେ଼ଇ ଚରମ ସୀମାରେ ପହଞ୍ଚିଥିଲା, ସେତେବେଳେ ସ୍ବାମୀ ମମତା ବାନାର୍ଜୀଙ୍କୁ ପ୍ରକୃତ ହିନ୍ଦୁ ଏବଂ ଦୁର୍ଗା ଭକ୍ତ ବୋଲି କହିଥିଲେ।