ଚେନ୍ନାଇ : ଲିବରେସନ୍ ଟାଇଗର୍ସ ଅଫ୍ ତାମିଲ ଏଲାମ୍ (ଏଲଟିଟିଇ) ନେତା ଭେଲୁପିଲାଇ ପ୍ରଭାକରନଙ୍କ ମୃତ୍ୟୁ ହୋଇନାହିଁ । ସେ ବଞ୍ଚିଛନ୍ତି । ଏଭଳି ଦାବି କରିଛନ୍ତି ତାମିଲ ଜାତୀୟତାବାଦୀ ଆନ୍ଦୋଳନର ନେତା ପାଜା ନେଦୁମାରନ୍ । ପ୍ରଭାକରନ ଜୀବିତ ଓ ସୁସ୍ଥ ଅଛନ୍ତି । ଖୁବ ଶୀଘ୍ର ସେ ତାମିଲ ଜାତିର ମୁକ୍ତି ପାଇଁ ଏକ ଘୋଷଣା କରିବେ ବୋଲି ନେଦୁମାରନ ଥଞ୍ଜାଭୁରରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ପରିବର୍ତ୍ତିତ ବିଶ୍ୱ ସ୍ଥିତି ଏବଂ ରାଜପକ୍ଷେ ସରକାରଙ୍କ ପତନ ସହ ଶ୍ରୀଲଙ୍କାର ରାଜନୈତିକ ସଙ୍କଟ ଏଲଟିଟିଇ ମୁଖ୍ୟଙ୍କୁ ସର୍ବସମ୍ମୁଖକୁ ଆସିବା ପାଇଁ ଏକ ନୂଆ ସୁଯୋଗ ଦେଇଛି ବୋଲି ସେ କହିଛନ୍ତି ।
ନେଦୁମାରନ କହିଛନ୍ତି ଯେ ‘ତାମିଜ୍ ଦେଶିଆ ଥଲାଇବର୍’ (ତାମିଲ ଜାତୀୟତାବାଦୀ ନେତା) ପ୍ରଭାକରନଙ୍କ ମୃତ୍ୟୁକୁ ନେଇ ଗୁଜବ ଦୂର କରିବାର ସମୟ ଆସିଛି। ମୁଁ ଆପଣଙ୍କୁ କହିବି ଯେ ସେ (ପ୍ରଭାକରନ୍) ଖୁବ ଶୀଘ୍ର ତାମିଲ ଜାତିର ମୁକ୍ତି ପାଇଁ ଯୋଜନା ଘୋଷଣା କରିବାକୁ ଯାଉଛନ୍ତି।
ଦୁନିଆର ସମସ୍ତ ତାମିଲ ଲୋକ ତାଙ୍କୁ ଏକାଠି ସମର୍ଥନ କରିବା ଉଚିତ୍। ମୁଁ ଏକ ସତ ଉନ୍ମୋଚନ କରିବାକୁ ଯାଉଛି ଯାହା ପ୍ରଭାକରନଙ୍କ ଉପରେ ଥିବା ସନ୍ଦେହ ଦୂର କରିବ | ଆମେ ସମସ୍ତ ତାମିଲ ଲୋକଙ୍କୁ ଜଣାଇବାକୁ ଚାହୁଁଛୁ ଯେ ଏଲଟିଟିଇ ମୁଖ୍ୟ ଭେଲୁପିଲ୍ଲାଇ ପ୍ରଭାକରନ୍ ସୁସ୍ଥ ଏବଂ ଠିକ୍ ଅଛନ୍ତି। ”
ସେ ପ୍ରଭାକରନଙ୍କ ସହ ଯୋଗାଯୋଗ କରିଛନ୍ତି କି ବୋଲି ପଚରାଯିବାରୁ ନେଦୁମାରନ୍ କହିଛନ୍ତି, ସେ ପ୍ରଭାକରଙ୍କ ପରିବାର ସଦସ୍ୟଙ୍କ ସହ ଯୋଗାଯୋଗରେ ଅଛନ୍ତି । ଏବଂ ତାଙ୍କ ପରିବାରୁ ମିଳିଥିବା ସୂଚନା ଓ ଅନୁମତି ଆଧାରରେ ଏହି କଥା ସେ ଘୋଷଣା କରୁଛନ୍ତି।
ଶ୍ରୀଲଙ୍କା ପ୍ରଭାକରନଙ୍କୁ ମୃତ ଘୋଷଣା କରିଥିବା ବେଳେ ସେ କିପରି ବଞ୍ଚିଛନ୍ତି ବୋଲି ପ୍ରଶ୍ନ କରାଯିବାରୁ ନେଦୁମାରନ କହିଛନ୍ତି, ଏଥିରେ କୌଣସି ସନ୍ଦେହ ନାହିଁ ଯେ ସେ କେଉଁଠାରେ ଅଛନ୍ତି ତାହା ମୋ ସହ ସମସ୍ତେ ଜାଣିବାକୁ ଚାହାଁନ୍ତି । ତେବେ ସେ ଶୀଘ୍ର ସାମ୍ନାକୁ ଆସିବେ ଏବଂ ବିଶ୍ୱକୁ ମଧ୍ୟ ଏ ବିଷୟରେ ଜଣାପଡ଼ିବ।
ଉଲ୍ଲେଖଯୋଗ୍ୟ, ଶ୍ରୀଲଙ୍କା ସେନାବାହିନୀର ଅପରେସନରେ ୧୮ ମେ ୨୦୦୯ରେ ଦେଶର ଉତ୍ତର ମୁଲାଇଟିଭୁ ଜିଲ୍ଲାର ମୁଲାଇଭାଇକ୍କାଲରେ ପ୍ରଭାକରନଙ୍କ ମୃତ୍ୟୁ ହୋଇଥିଲା ବୋଲି ଶ୍ରୀଲଙ୍କା ସରକାର ଘୋଷଣା କରିଥିଲେ ।