ନୂଆଦିଲ୍ଲୀ: ଐତିହାସିକ କୀର୍ତ୍ତିରାଜି କୁତବ୍ ମିନାର୍ ପରିସରରେ ଖନନ ପାଇଁ ନିର୍ଦ୍ଦେଶ ଦିଆଯାଇଥିବା ଖବରକୁ କେନ୍ଦ୍ର ସଂସ୍କୃତି ମନ୍ତ୍ରୀ ଜିକେ ରେଡ୍ଡୀ ଅସ୍ୱୀକାର କରିଛନ୍ତି। କୁତବ୍ ମିନାର ପରିସରରେ ଖନନ ପାଇଁ କୌଣସି ନିଷ୍ପତ୍ତି ନିଆଯାଇ ନାହିଁ ବୋଲି ସଂସ୍କୃତି ମନ୍ତ୍ରୀ କହିଛନ୍ତି।
ଜ୍ଞାନବାପି ମସଜିଦ ବିବାଦରେ କିଛି ଗଣମାଧ୍ୟମ ରିପୋର୍ଟରେ କୁହାଯାଇଥିଲା ଯେ କୁତବ୍ ମିନାର୍ ରେ ଖନନ କାର୍ଯ୍ୟ ଖୁବ୍ ଶୀଘ୍ର ଆରମ୍ଭ ହେବ | କୁତବ୍ ମିନାରରେ ମୂର୍ତ୍ତି ଗୁଡ଼ିକର ଆଇକୋନୋଗ୍ରାଫି କରିବାକୁ ସଂସ୍କୃତି ମନ୍ତ୍ରଣାଳୟ ନିର୍ଦ୍ଦେଶ ଦେଇଥିବା ଖବର ଆସିଥିଲା ।
କେନ୍ଦ୍ର ସଂସ୍କୃତି ମନ୍ତ୍ରୀ ଜିକେ ରେଡ୍ଡୀ କହିଛନ୍ତି ଯେ କୁତବ୍ ମିନାର ପରିସରରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ (ଏଏସ୍ଆଇ) ଦ୍ୱାରା କୌଣସି ଖନନ କରାଯିବ ନାହିଁ। ଅଦ୍ୟାବଧି ଆମେ ଏ ବିଷୟରେ କୌଣସି ନିଷ୍ପତ୍ତି ନେଇନାହୁଁ। ଏହିପରି ସମସ୍ତ ରିପୋର୍ଟ ଭିତ୍ତିହୀନ |
କୁତବ୍ ମିନାରରେ ମୂର୍ତ୍ତି ଗୁଡ଼ିକର ଆଇକୋନୋଗ୍ରାଫି କରିବାକୁ ସଂସ୍କୃତି ମନ୍ତ୍ରଣାଳୟ ନିର୍ଦ୍ଦେଶ ଦେଇଥିବା ଖବର ଆସିଥିଲା । ଏଥିରେ ଆହୁରି କୁହାଯାଇଥିଲା ଯେ କୁତବ୍ ମିନାରରେ ଖନନ କରାଯିବ ଏବଂ ଏହାପରେ ଏଏସ୍ଆଇ ସଂସ୍କୃତି ମନ୍ତ୍ରଣାଳୟକୁ ରିପୋର୍ଟ ଦେବ ।
ଅଧିକାରୀଙ୍କ ସହ ଯାଞ୍ଚ୍ ପରେ ସଂସ୍କୃତି ସଚିବ ଏହି ନିଷ୍ପତ୍ତି ନେଇଥିବା କୁହାଯାଇଥିଲା। ତେଣୁ କୁତବ୍ ମିନାରର ଦକ୍ଷିଣରେ ଏବଂ ମସଜିଦଠାରୁ ୧୫ ମିଟର ଦୂରରେ ଖନନ କାର୍ଯ୍ୟ ଆରମ୍ଭ ହୋଇପାରେ | ରିପୋର୍ଟରେ କେବଳ କୁତବ୍ ମିନାର ନୁହେଁ, ଅନଙ୍ଗତାଲ ଏବଂ ଲାଲକୋଟ ଦୁର୍ଗରେ ଖନନ ବିଷୟରେ ସୂଚନା ମଧ୍ୟ ଦିଆଯାଇଥିଲା।
ସଂସ୍କୃତି ସଚିବ ଗୋବିନ୍ଦ ମୋହନ ୧୨ ଜଣିଆ ଟିମ୍ ସହିତ କୁତବ୍ ମିନାର କମ୍ପ୍ଲେକ୍ସ ଯାଞ୍ଚ କରିଥିଲେ। ଏହି ଦଳରେ ୩ ଐତିହାସିକ, ୪ ଏଏସ୍ଆଇ ଅଧିକାରୀ ଏବଂ ଅନୁସନ୍ଧାନକାରୀ ଥିଲେ | ଏହି ମାମଲାରେ ଏଏସ୍ଆଇ ଅଧିକାରୀ କହିଛନ୍ତି ଯେ ୧୯୯୧ ମସିହାରୁ କୁତବ୍ ମିନାରରେ ଖନନ କାର୍ଯ୍ୟ ହୋଇନାହିଁ। ଅନେକ ଗବେଷଣା ବିଚାରାଧୀନ ଅଛି, ଯେଉଁଥିପାଇଁ ଏହି ନିଷ୍ପତ୍ତି ନିଆଯାଇଛି ବୋଲି ସେ କହିଥିଲେ |