ନୂଆଦିଲ୍ଲୀ: ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଉପରେ ଲୋକସଭାରେ ସରଗରମ ବିତର୍କ ସହ ବିରୋଧୀ ଓ ଶାସକ ଦଳ ମଧ୍ୟରେ ଆରୋପ-ପ୍ରତ୍ୟାରୋପ ଜାରି ରହିଛି । ଅନାସ୍ଥା ପ୍ରସ୍ତାବ ଉପରେ ଜବାବ ରଖିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଲୋକସଭାରେ ପହଞ୍ଚିଛନ୍ତି। ଲୋକସଭାରେ ପ୍ରଧାନମନ୍ତ୍ରୀ ମୋଦୀଙ୍କ ଉପସ୍ଥିତିରେ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ କେନ୍ଦ୍ର ଉପରେ ତୀବ୍ର ଆକ୍ରମଣ କରିଛନ୍ତି । ଚୌଧୁରୀ ପ୍ରଧାନମନ୍ତ୍ରୀ ମୋଦୀଙ୍କୁ ମଧ୍ୟ ଛାଡ଼ି ନଥିଲେ । ସେ କହିଛନ୍ତି “ଅନାସ୍ଥା ପ୍ରସ୍ତାବ ଆଣିବାର କୌଣସି ଯୋଜନା ନଥିଲା। କିନ୍ତୁ ପ୍ରଧାନମନ୍ତ୍ରୀଙ୍କୁ ଗୃହକୁ ଆଣିବା ପାଇଁ ଅନାସ୍ଥା ପ୍ରସ୍ତାବ ଆଗତ କରାଯାଇଛି ।
ଚୌଧୁରୀ କହିଛନ୍ତି, ଆମେ ଚାହୁଁଛୁ ପ୍ରଧାନମନ୍ତ୍ରୀ ମୋଦୀ ମଣିପୁର ଉପରେ ଗୃହରେ ବିବୃତ୍ତି ରଖନ୍ତୁ। ପ୍ରଧାନମନ୍ତ୍ରୀ ମୋଦୀଙ୍କୁ ଧୃତରାଷ୍ଟ୍ର ସହ ତୁଳନା କରି ଚୌଧୁରୀ କହିଥିଲେ, ଯେବେ ଧୃତରାଷ୍ଟ୍ର ଅନ୍ଧ ଥିଲେ, ସେତେବେଳେ ଦ୍ରୌପଦୀଙ୍କ ବସ୍ତ୍ର ହରଣ ହୋଇଥିଲା । ଆଜି ମଧ୍ୟ ରାଜା ଅନ୍ଧ ହୋଇ ବସି ରହିଛନ୍ତି… ମଣିପୁର ଓ ହସ୍ତିନାପୁର ମଧ୍ୟରେ କୌଣସି ଫରକ ନାହିଁ।”
ଚୌଧୁରୀ କହିଥିଲେ, ମୋଦୀ ୧୦୦ ଥର ପ୍ରଧାନମନ୍ତ୍ରୀ ହୁଅନ୍ତୁ ଆମର କିଛି ଯାଏ ଆସେ ନାହିଁ। ଆମକୁ କେବଳ ଦେଶର ଲୋକଙ୍କ ଚିନ୍ତା । ପ୍ରଧାନମନ୍ତ୍ରୀ ସବୁ ବିଷୟରେ କହୁଛନ୍ତି କିନ୍ତୁ ମଣିପୁର ଉପରେ କାହିଁକି ଚୁପ୍ ରହିଛନ୍ତି?
ମଣିପୁରର ସାଂସଦମାନଙ୍କୁ କାହିଁକି କହିବାକୁ ଅନୁମତି ଦିଆଗଲା ନାହିଁ ବୋଲି ମଧ୍ୟ ପ୍ରଶ୍ନ କରିଛନ୍ତି ଚୌଧୁରୀ । ଏଥିସହ ମଣିପୁରରେ କାହିଁକି ଏକ ବଫର ଜୋନ୍ ସୃଷ୍ଟି ହେଲା ବୋଲି ସେ ପ୍ରଶ୍ନ ଉଠାଇଥିଲେ। ଏକ ବଫର୍ ଜୋନ୍ ସୃଷ୍ଟି କରି ବିଜେପି ସରକାର ମଣିପୁରକୁ ଭାଗ ଭାଗ କରୁଛି ବୋଲି ସେ ଅଭିଯୋଗ କରିଥିଲେ |
ଅଧୀର ରଞ୍ଜନ ଚୌଧୁରୀଙ୍କ ବୟାନରେ ବିଜେପି ସାଂସଦମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କହିଥିଲେ, ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ସମ୍ମାନ ଦିଆଯାଉ ଏବଂ କଂଗ୍ରେସ ନେତା ତାଙ୍କ ବୟାନ ପାଇଁ କ୍ଷମା ମାଗନ୍ତୁ।