ନ୍ୟୁୟର୍କ: ଉତ୍ତର ଆମେରିକାରେ ତାଣ୍ଡବ ରଚିଛି ଶୀତଦିନିଆ ଝଡ଼ । ଅସହ୍ୟ କାଲୁଆ ପବନ ସହ ବରଫ ବୃଷ୍ଟି ଯୋଗୁଁ ଜୀବନଯାତ୍ରା ଠପ୍ ହୋଇପଡ଼ିଛି । ଏହି ଝଡ଼ ଯୋଗୁଁ ଆମେରିକାରେ ଏଯାବତ୍ ୩୩ ଜଣଙ୍କର ମୃତ୍ୟୁ ହୋଇଛି । ନ୍ୟୁୟର୍କ ରାଜ୍ୟର ବଫାଲୋ ସହର ସବୁଠୁ ଅଧିକ ପ୍ରଭାବିତ ହୋଇଛି ।
ସେପଟେ କାନାଡାର ମେରିଟ ସହରରେ ବରଫ ଆଚ୍ଛାଦିତ ରାସ୍ତାରେ ଏକ ବସ୍ ସ୍ଲିପ୍ ହୋଇ ଓଲଟି ପଡିବାରୁ ଚାରି ଜଣଙ୍କର ମୃତ୍ୟୁ ଘଟିଛି।
ଗତ କିଛି ଦିନ ହେବ ଉତ୍ତର ଆମେରିକାରେ ଏହି ଝଡ଼ର ପ୍ରକୋପ ଦେଖିବାକୁ ମିଳିଛି । ବିଦ୍ୟୁତ ଯୋଗାଣ ବିଚ୍ଛିନ୍ନ ଯୋଗୁଁ ପ୍ରାୟ ୧୭ ଲକ୍ଷ ଲୋକ ଅନ୍ଧାରରେ ରହିଛନ୍ତି ।
ଶୀତଦିନିଆ ଝଡ଼ ଯୋଗୁଁ ବିମାନ ସେବା ମଧ୍ୟ ପ୍ରଭାବିତ ହୋଇଛି। ଏହି କାରଣରୁ ଖ୍ରୀଷ୍ଟମାସ ପାଇଁ ଅନେକ ଲୋକ ନିଜ ପରିବାର ପାଖରେ ପହଞ୍ଚି ପାରି ନାହାଁନ୍ତି |
ଝଡ଼ର ପ୍ରଭାବ ଉତ୍ତର ଆମେରିକାରେ କାନାଡା ଠାରୁ ଆମେରିକାର ଦକ୍ଷିଣ ଟେକ୍ସାସ୍ ପ୍ରଦେଶ ପର୍ଯ୍ୟନ୍ତ ରହିଛି ।
ନ୍ୟୁୟର୍କ ଗଭର୍ଣ୍ଣର କ୍ୟାଥୀ ହୋଚୁଲ ଏହାକୁ ବଫାଲୋ ସହରର ଇତିହାସରେ ସବୁଠାରୁ ଭୟଙ୍କର ଝଡ଼ ବୋଲି ଅଭିହିତ କରିଛନ୍ତି।
ନ୍ୟୁୟର୍କ ରାଜ୍ୟର ଏରି କାଉଣ୍ଟି ଏଗଜିକ୍ୟୁଟିଭ୍ ମାର୍କ ପୋଲୋନାର୍କ ଗଣମାଧ୍ୟମକୁ କହିଛନ୍ତି ଯେ ତାଙ୍କ କାରରେ ଜଣେ ବ୍ୟକ୍ତିଙ୍କ ମୃତଦେହ ମିଳିଛି।