ନୂଆଦିଲ୍ଲୀ: ସେପ୍ଟେମ୍ବର ୨୮ରେ ସିପିଆଇ ନେତା କହ୍ନେୟା କୁମାର ଏବଂ ଗୁଜରାଟର ବଡଗାମ ବିଧାନସଭା ନିର୍ବାଚନମଣ୍ଡଳୀରୁ ସ୍ୱାଧୀନ ବିଧାୟକ ଥିବା ଜିଗ୍ନେଶ ମେବାନୀ କଂଗ୍ରେସରେ ଯୋଗଦେବେ। ସେପ୍ଟେମ୍ବର ୨୮ ହେଉଛି ସହିଦ୍ ଭାଗବତ ସିଂଙ୍କ ଜନ୍ମ ବାର୍ଷିକୀ | ପୂର୍ବରୁ ସୂଚନା ମିଳିଥିଲା ଯେ କହ୍ନେୟା କୁମାର କଂଗ୍ରେସ ଦଳ ସହ ଯୋଗାଯୋଗରେ ଅଛନ୍ତି। ଅତୀତରେ ସେ ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀଙ୍କ ସହ ମଧ୍ୟ କଥା ହୋଇଥିଲେ।
ଜାତୀୟ ସ୍ତରରେ ବିଜେପି ବିରୋଧରେ ଯଦି କୌଣସି ନେତା ଲଢୁଛନ୍ତି, ତେବେ ସେ ହେଉଛନ୍ତି ରାହୁଲ ଗାନ୍ଧି। ଏଭଳି ସ୍ଥିତିରେ ରାହୁଲ ଗାନ୍ଧୀ ଏବଂ କଂଗ୍ରେସ ଦଳକୁ ମଜବୁତ କରିବାର ଆବଶ୍ୟକତା ରହିଛି ବୋଲି କହ୍ନେୟା କହିଛନ୍ତି।
ଜେଏନୟୁରେ ଦେଶ ବିରୋଧୀ ସ୍ଲୋଗାନ ଅଭିଯୋଗରେ ଗିରଫ ହେବା ପରେ କହ୍ନେୟା କୁମାର ଚର୍ଚ୍ଚିତ ହୋଇଥିଲେ। ସେ ବିହାରର ବେଗୁସରାଇ ଲୋକସଭା ଆସନରୁ ସିପିଆଇ ପ୍ରାର୍ଥୀ ଭାବରେ ୨୦୧୯ ଲୋକସଭା ନିର୍ବାଚନ ଲଢିଥିଲେ ମଧ୍ୟ ବିଜେପି ନେତା ତଥା କେନ୍ଦ୍ର ମନ୍ତ୍ରୀ ଗିରିରାଜ ସିଂଙ୍କ ଠାରୁ ହାରି ଯାଇଥିଲେ। ଅନ୍ୟପକ୍ଷରେ ଦଳିତ ସମ୍ପ୍ରଦାୟର ଜିଗ୍ନେଶ ଗୁଜୁରାଟର ବଡଗାମ ବିଧାନସଭା ନିର୍ବାଚନମଣ୍ଡଳୀରୁ ସ୍ୱାଧୀନ ପ୍ରାର୍ଥୀ ଭାବେ ଲଢି ବିଜୟୀ ହୋଇଥିଲେ ।