ପଶ୍ଚିମବଙ୍ଗ କୁଚ୍ ବିହାରରେ ଅଘଟଣ, ବିଦ୍ୟୁତ୍ ଆଘାତରେ ୧୦ କାଉଡିଆଙ୍କ ମୃତ୍ୟୁ

କୋଲକାତା: ପଶ୍ଚିମବଙ୍ଗର କୁଚ୍ ବିହାରରେ ଘଟିଛି ଛାତିଥରା ଘଟଣା । କୁଚ୍ ବେହାର ଜିଲ୍ଲାରୁ ପିକଅପ୍ ଭ୍ୟାନରେ ଶିବଙ୍କୁ ଜଳ ଅର୍ପଣ କରିବାକୁ ଜଲପାଇଗୁଡି ଜିଲ୍ଲାର ଜଲପେଶ ମନ୍ଦିରକୁ ଯାଉଥିବା ବେଳେ ବିଦ୍ୟୁତ ସଂସ୍ପର୍ଶରେ ଆସି ୧୦ ଜଣ କାଉଡିଆଙ୍କ ମୃତ୍ୟୁ ହୋଇଛି । ରବିବାର ବିଳମ୍ବିତ ରାତିରେ ଏହି ଅଘଟଣ ଘଟିଛି ।

ଏହି ଘଟଣାରେ ଅନ୍ୟ ୧୬ ଜଣ ଆହତ ହୋଇଛନ୍ତି। ଆହତମାନଙ୍କୁ ଜାଲପାଇଗୁଡିର ସୁପର ସ୍ପେସିଆଲିଟି ହସ୍ପିଟାଲରେ ଭର୍ତ୍ତି କରାଯାଇଛି।

ଡିଜେ ବଜାଇବା ପାଇଁ ପିକଅପ୍ ଭ୍ୟାନରେ ରଖାଯାଇଥିବା ଜେନେରେଟରରେ ସର୍ଟ ସର୍କିଟ ଯୋଗୁଁ ଏହି ଅଘଟଣ ଘଟିଥିବା ଅନୁମାନ କରାଯାଉଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି।

କୋଚ ବେହାର ଜିଲ୍ଲାର ମଥାଭଙ୍ଗା ଏଏସପି ଅମିତ ବର୍ମା କହିଛନ୍ତି ଯେ ଗାଡିରେ ଜେନେରେଟର ମାଧ୍ୟମରେ ଡିଜି ବଜା ଯାଉଥିଲା। ପ୍ରାଥମିକ ତଦନ୍ତରୁ ଏଥିରେ ସର୍ଟ ସର୍କିଟ ଯୋଗୁଁ ଏହି ଦୁର୍ଘଟଣା ଘଟିଥିବା ମନେ କରାଯାଉଛି |

ସେ କହିଛନ୍ତି ଯେ ୧୬ ଜଣ ଆହତଙ୍କୁ ଜଲପାଇଗୁଡି ଡାକ୍ତରଖାନାରେ ଭର୍ତ୍ତି କରାଯାଇଛି। ପୋଲିସ ଗାଡିଟିକୁ ଜବତ କରିଛି, କିନ୍ତୁ ଏହାର ଡ୍ରାଇଭର ଫେରାର ଅଛି।

ଭ୍ୟାନ୍ ରେ ଥିବା ସମସ୍ତ କାଉଡ଼ିଆ ଶୀତଲକୁଚି ବାସିନ୍ଦା ଥିଲେ | ଏହି ଦୁର୍ଘଟଣା ସମ୍ପର୍କରେ ତାଙ୍କ ପରିବାର ସଦସ୍ୟଙ୍କୁ ସୂଚନା ଦିଆଯାଇଛି।

ପୋଲିସ କହିଛି ଯେ କୋଚ ବିହାର ଶୀତଲକୁଚିରୁ ଆସୁଥିବା କାଉଡିଆ ଦଳରେ ମୋଟ ୨୭ ଜଣ ଲୋକ ଥିଲେ। ଚେଙ୍ଗଡାବନ୍ଧାର ଧର୍ଲା ନଦୀ ଉପରେ ବ୍ରିଜ୍ ପାର ହେବା ପରେ ଏହି ଅଘଟଣ ଘଟିଥିଲା ।

ଅନେକ କାଉଡ଼ିଆ ଚେତାଶୂନ୍ୟ ଅବସ୍ଥାରେ ପଡ଼ିଥିବାର ଦେଖି ଭ୍ୟାନର ଡ୍ରାଇଭର ସେମାନଙ୍କୁ ଚେଙ୍ଗଡାବନ୍ଧା ଡାକ୍ତରଖାନାକୁ ନେଇଥିଲେ। ସେଠାରେ ୧୦ ଜଣଙ୍କୁ ମୃତ ଘୋଷଣା କରାଯାଇଥିଲା। ଆହତମାନେ କହିଛନ୍ତି ଯେ ଜେନେରେଟରରେ ସର୍ଟ ସର୍କିଟ ଯୋଗୁଁ ଏହି ଦୁର୍ଘଟଣା ଘଟିଛି।