ନୂଆଦିଲ୍ଲୀ: ଉଦ୍ୟୋଗପତି ଗୌତମ ଆଦାନୀଙ୍କ ପ୍ରାୟ ୪୩ ହଜାରରୁ ଉର୍ଦ୍ଧ୍ବ କୋଟି ଟଙ୍କାର ସେୟାର ଫ୍ରିଜ୍ କରାଯାଇଛି । ନ୍ୟାସନାଲ ସିକ୍ୟୁରିଟି ଡିପୋଜିଟୋରୀ ଲିମିଟେଡ୍ (ଏନ୍ଏସଡିଏଲ୍) ତିନୋଟି ବିଦେଶୀ ଫଣ୍ଡ୍ ଆଲବଲା ଇନଭେଷ୍ଟମେଣ୍ଟ ଫଣ୍ଡ, କ୍ରେଷ୍ଟା ଫଣ୍ଡ ଏବଂ ଏପିଏମ୍ଏସ୍ ଇନଭେଷ୍ଟମେଣ୍ଟ ଫଣ୍ଡର ଆକାଉଣ୍ଟକୁ ଫ୍ରିଜ୍ କରିଛି | ଆଦାନୀ ଗ୍ରୁପର ୪ଟି କମ୍ପାନୀରେ ଏହି ତିନୋଟି ବିଦେଶୀ ଫଣ୍ଡ୍ ର ୪୩,୫୦୦ କୋଟିରୁ ଅଧିକ ମୂଲ୍ୟର ସେୟାର ଥିଲା | ଏନ୍ଏସଡିଏଲ୍ ୱେବସାଇଟ୍ ଅନୁଯାୟୀ, ଏହି ଆକାଉଣ୍ଟଗୁଡିକ ମେ ୩୧ ପୂର୍ବରୁ ଫ୍ରିଜ୍ କରାଯାଇଥିଲା |
ଏହି ତିନି ଫଣ୍ଡ୍ ର ଆଦାନୀ ଏଣ୍ଟରପ୍ରାଇଜରେ ୬.୮୨ ପ୍ରତିଶତ, ଆଦାନୀ ଟ୍ରାନ୍ସମିସନରେ ୮.୦୩ ପ୍ରତିଶତ, ଆଦାନୀ ଟୋଟାଲ୍ ଗ୍ୟାସରେ ୫.୯୨ ପ୍ରତିଶତ ଏବଂ ଆଦାନୀ ଗ୍ରୀନରେ ୩.୫୮ ପ୍ରତିଶତ ଅଂଶଧନ ରହିଛି। କଷ୍ଟୋଡିଆନ୍ ବ୍ୟାଙ୍କ ଏବଂ ବିଦେଶୀ ନିବେଶକଙ୍କ ଆକାଉଣ୍ଟ୍ ପରିଚାଳନା କରୁଥିବା ଆଇନ ସଂସ୍ଥାଗୁଡ଼ିକ ଅନୁଯାୟୀ, ଏହି ବିଦେଶୀ ପାଣ୍ଠିର ଲାଭଦାୟକ ମାଲିକାନା ବିଷୟରେ ସମ୍ପୂର୍ଣ୍ଣ ସୂଚନା ନ ଥାଇପାରେ | ଏହି କାରଣରୁ ସେମାନଙ୍କ ଆକାଉଣ୍ଟ ଫ୍ରିଜ୍ କରାଯାଇଛି | ମନି ଲଣ୍ଡରିଂ ଆକ୍ଟ (ପିଏମ୍ଏଲ୍ଏ) ଅଧୀନରେ, ଲାଭକାରୀ ମାଲିକାନା ବିଷୟରେ ସମ୍ପୂର୍ଣ୍ଣ ସୂଚନା ଦେବା ବିଧେୟ |
ଆକାଉଣ୍ଟ ଫ୍ରିଜ୍ ହେବା ପରେ ଆଦାନୀ ଗ୍ରୁପ୍ ବର୍ତ୍ତମାନର କୌଣସି ସିକ୍ୟୁରିଟିଜ୍ ବିକ୍ରୟ କରିପାରିବ ନାହିଁ କିମ୍ବା ନୂଆ ସିକ୍ୟୁରିଟିଜ୍ କିଣିପାରିବ ନାହିଁ | ଆକାଉଣ୍ଟ ଫ୍ରିଜ୍ ହେବା ଦ୍ବାରା ଷ୍ଟକ୍ ମାର୍କେଟରେ ଆଦାନୀ ଗ୍ରୁପ୍ ର ସେୟାର ମୂଲ୍ୟ ୧୦ ପ୍ରତିଶତ ପର୍ଯ୍ୟନ୍ତ ଖସିଛି ।
Comments are closed.