ଅହମ୍ମଦାବାଦ: ୨୦୦୮ ଅହମ୍ମଦାବାଦ ସିରିଜ୍ ବୋମା ବିସ୍ଫୋରଣ ମାମଲାରେ ସ୍ୱତନ୍ତ୍ର କୋର୍ଟ ଦୋଷୀଙ୍କ ବିରୋଧରେ ଦଣ୍ଡ ଘୋଷଣା କରିଛନ୍ତି। ୪୯ ଦୋଷୀ ମଧ୍ୟରୁ ୩୮ ଜଣଙ୍କୁ କୋର୍ଟ ମୃତ୍ୟୁ ଦଣ୍ଡାଦେଶ ଶୁଣାଇଥିବାବେଳେ ୧୧ ଜଣ ଦୋଷୀଙ୍କୁ ଶେଷ ନିଶ୍ୱାସ ପର୍ଯ୍ୟନ୍ତ କାରାଦଣ୍ଡରେ ଦଣ୍ଡିତ କରାଯାଇଛି। ଇତିହାସରେ ପ୍ରଥମ ଥର ପାଇଁ ଅନେକ ଦୋଷୀଙ୍କୁ ଏକାସାଙ୍ଗରେ ମୃତ୍ୟୁଦଣ୍ଡ ଦିଆଯାଇଛି।ଦଣ୍ଡ ବିଧାନ ବେଳେ ଦୋଷୀମାନଙ୍କୁ ଅନଲାଇନରେ ଅଦାଲତଙ୍କ ଆଗରେ।ହାଜର କରାଯାଇଥିଲା।
ଦୋଷୀମାନଙ୍କୁ ଦଣ୍ଡ ଦେବା ବ୍ୟତୀତ ପୀଡ଼ିତାଙ୍କୁ କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ବିସ୍ଫୋରଣରେ ପ୍ରାଣ ହରାଇଥିବା ପରିବାରବର୍ଗଙ୍କୁ ୧ ଲକ୍ଷ ଟଙ୍କା କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ସହିତ ଗୁରୁତର ଆହତ ଲୋକଙ୍କୁ ୫୦ ହଜାର ଏବଂ ନାବାଳକ ଆହତଙ୍କୁ ୨୫ ହଜାର ଟଙ୍କା ଦେବାକୁ କୁହାଯାଇଛି।
ଫେବୃଆରୀ ୮ରେ ସ୍ବତନ୍ତ୍ର କୋର୍ଟ ଏହି ମାମଲାରେ ୪୯ ଜଣଙ୍କୁ ଦୋଷୀ ସାବ୍ୟସ୍ତ କରିଥିବା ବେଳେ ୨୮ ଅଭିଯୁକ୍ତ ନିର୍ଦ୍ଦୋଷରେ ଖଲାସ ହୋଇଥିଲେ। ଏହି ମାମଲାର ଶୁଣାଣି ୧୩ ବର୍ଷ ଧରି ସ୍ୱତନ୍ତ୍ର କୋର୍ଟରେ ଚାଲିଥିଲା |
ଅହମ୍ମଦାବାଦ ସିରିଏଲ ବିସ୍ଫୋରଣରେ ୭୮ ଜଣ ଅଭିଯୁକ୍ତ ଥିଲେ। ପରେ ଜଣେ ଅଭିଯୁକ୍ତ ସରକାରୀ ସାକ୍ଷୀ ହୋଇଥିଲେ। ଏହି କାରଣରୁ ମୋଟ ୭୭ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିଲା। ୧୩ ବର୍ଷର ବିଚାର ସମୟରେ ୧୧୬୩ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା | ପୋଲିସ ଏବଂ ଆଇନ ଏଜେନ୍ସିମାନେ ୬ ହଜାରରୁ ଅଧିକ ପ୍ରମାଣ ଉପସ୍ଥାପନ କରିଥିଲେ।
୨୬ ଜୁଲାଇ ୨୦୦୮ରେ ଅହମ୍ମଦାବାଦରେ ଘଣ୍ଟାଏ ମଧ୍ୟରେ ୨୧ ବୋମା ବିସ୍ଫୋରଣ ହୋଇଥିଲା | ଏହି ସିରିଜ୍ ବିସ୍ଫୋରଣରେ ୫୬ ଜଣଙ୍କର ମୃତ୍ୟୁ ହୋଇଥିବା ବେଳେ ୨୦୦ ରୁ ଅଧିକ ଲୋକ ଆହତ ହୋଇଥିଲେ। ୨୦୦୨ରେ ଗୋଧ୍ରା ଘଟଣାର ପ୍ରତିଶୋଧ ନେବାକୁ ଆତଙ୍କୀ ଗୋଷ୍ଠୀ ଇଣ୍ଡିଆନ ମୁଜାହିଦ୍ଦିନ ଏହି ସିରିଜ୍ ବୋମା ବିସ୍ଫୋରଣ କରିଥିଲେ।
Comments are closed.