କର୍ଣ୍ଣାଟକର ବିଜେପି ସରକାର ଚାରି ବର୍ଷରେ ୩୮୫ ଅପରାଧିକ ମାମଲା ପ୍ରତ୍ୟାହାର କରିଛନ୍ତି, ତାଲିକାରେ ରହିଛି ହେଟ୍ ସ୍ପିଚ୍, ସାମ୍ପ୍ରଦାୟିକ ହିଂସା ଭଳି କେସ୍

ବେଙ୍ଗାଲୁରୁ: କର୍ଣ୍ଣାଟକର ଶାସକ ଭାରତୀୟ ଜନତା ପାର୍ଟି (ବିଜେପି) ଚାରି ବର୍ଷ କାର୍ଯ୍ୟକାଳ ମଧ୍ୟରେ ୩୮୫ ଅପରାଧିକ ମାମଲା ପ୍ରତ୍ୟାହାର କରିନେଇଛି। ଜୁଲାଇ ୨୦୧୯ ରୁ ଏପ୍ରିଲ ୨୦୨୩ ପର୍ଯ୍ୟନ୍ତ ଚାରି ବର୍ଷର କାର୍ଯ୍ୟକାଳ ମଧ୍ୟରେ ଏହି ମାମଲା ଗୁଡ଼ିକ ପ୍ରତ୍ୟାହାର କରାଯାଇଥିଲା। ଏଥିପାଇଁ ୭ଟି ପୃଥକ୍ ଆଦେଶ ଜାରି କରାଯାଇଥିଲା | ପ୍ରତ୍ୟାହୃତ ମାମଲା ମଧ୍ୟରେ ୧୮୨ଟି କେସ୍ ହେଟ୍ ସ୍ପିଚ୍, ଗୋ ସୁରକ୍ଷା ଏବଂ ସାମ୍ପ୍ରଦାୟିକ ହିଂସା ସହ ଜଡ଼ିତ | ରାଜ୍ୟ ସରକାରଙ୍କ ଗୃହ ବିଭାଗ ଆରଟିଆଇ ମାଧ୍ୟମରେ ଏହି ସୂଚନା ଦେଇଛନ୍ତି।

ଫେବୃଆରୀ ୧୧, ୨୦୨୦ ମଧ୍ୟରେ ବିଏସ୍ ୟେଦିୟୁରପ୍ପା ମୁଖ୍ୟମନ୍ତ୍ରୀ ଏବଂ ବାସବରାଜ ବମ୍ମାଇ ଗୃହମନ୍ତ୍ରୀ ଥିବା ବେଳେ ଏବଂ ଫେବୃଆରୀ ୨୮, ୨୦୨୩ରେ ବମ୍ମାଇ ମୁଖ୍ୟମନ୍ତ୍ରୀ ଏବଂ ଆରାଗା ଜୟନେନ୍ଦ୍ର ଗୃହମନ୍ତ୍ରୀ ଥିବା ସମୟରେ ୩୮୫ ମାମଲା ପ୍ରତ୍ୟାହାର ପାଇଁ ୭ଟି ପୃଥକ୍ ନିର୍ଦ୍ଦେଶ ଜାରି କରାଯାଇଥିଲା।

ଆରଟିଆଇ ଜରିଆରେ ମିଳିଥିବା ଉତ୍ତର ଅନୁଯାୟୀ, ରାଜ୍ୟ ସରକାର ଫେରାଇ ନେଇଥିବା ଅଧିକାଂଶ ମାମଲା ସାମ୍ପ୍ରଦାୟିକ ହିଂସାକାଣ୍ଡ ସହ ଜଡ଼ିତ । ମାମଲା ଫେରାଇ ନେବା ଦ୍ବାରା ପ୍ରାୟ ୧୦୦୦ରୁ ଅଧିକ ଅଭିଯୁକ୍ତ ଉପକୃତ ହୋଇଥିଲେ। ସେମାନଙ୍କ ମଧ୍ୟରେ ପ୍ରାୟ ଅର୍ଦ୍ଧାଧିକ ବିଜେପି ସାଂସଦ ଏବଂ ବିଧାୟକ ଥିଲେ।

ଅଭିଯୁକ୍ତଙ୍କ ବିରୋଧରେ ମାମଲା ପ୍ରତ୍ୟାହାର ପ୍ରକ୍ରିୟାରେ ଗୃହମନ୍ତ୍ରୀଙ୍କ ସୁପାରିସ, କ୍ୟାବିନେଟ ସବ କମିଟିର ଅନୁମୋଦନ ଏବଂ ରାଜ୍ୟ କ୍ୟାବିନେଟର ମଞ୍ଜୁରି ଆବଶ୍ୟକ। ୨୦୧୩ ରୁ ୨୦୧୮ ମଧ୍ୟରେ ସାମ୍ପ୍ରଦାୟିକ ଲିଙ୍କ୍ ଥିବା ୧୮୨ଟି ମାମଲା ମଧ୍ୟରୁ ଅଧିକାଂଶ କଂଗ୍ରେସ ସରକାରଙ୍କ କାର୍ଯ୍ୟକାଳ ସମୟରେ ରୁଜୁ ହୋଇଥିଲା |

୨୦୧୩ ରୁ ୨୦୧୮ ମଧ୍ୟରେ କଂଗ୍ରେସ ମୁଖ୍ୟମନ୍ତ୍ରୀ ସିଦ୍ଧରମେୟା ୧୭୬ ମାମଲା ପ୍ରତ୍ୟାହାର କରିଥିଲେ । କଂଗ୍ରେସ ସରକାର ଏସଡିପିଆଇ ର ପ୍ରାୟ ୧୬୦୦ କର୍ମକର୍ତ୍ତା ଏବଂ ବର୍ତ୍ତମାନ ନିଷିଦ୍ଧ ପିଏଫ୍ଆଇ ବିରୋଧରେ ୧୭୬ ମାମଲା ରଦ୍ଦ କରିବାକୁ ନିର୍ଦ୍ଦେଶ ଦେଇଥିଲେ । ସେତେବେଳେ ବିଜେପି ଏପରି ନିଷ୍ପତ୍ତିକୁ ତୀବ୍ର ବିରୋଧ କରିଥିଲା।

ଅଗଷ୍ଟ ୨୦୨୧ରେ ସୁପ୍ରିମକୋର୍ଟ ଏକ ରାୟରେ କହିଥିଲେ ଯେ “କୌଣସି ପଦାସୀନ କିମ୍ବା ପୂର୍ବତନ ସାଂସଦ / ବିଧାୟକଙ୍କ ବିରୋଧରେ କୌଣସି ମାମଲା ହାଇକୋର୍ଟଙ୍କ ଅନୁମତି ବିନା ପ୍ରତ୍ୟାହାର କରାଯିବ ନାହିଁ”। ଜୁଲାଇ ୨୦୨୨ରେ କର୍ଣ୍ଣାଟକ ହାଇକୋର୍ଟ ମଧ୍ୟ କହିଥିଲେ ଯେ ନିର୍ବାଚିତ ପ୍ରତିନିଧୀଙ୍କ ବିରୋଧରେ ମାମଲା ବିନା ଅନୁମତିରେ ପ୍ରତ୍ୟାହାର କରାଯାଇପାରିବ ନାହିଁ।