୨ ଅନ୍ତଃରାଜ୍ୟ ଅପରାଧୀଙ୍କୁ କାବୁ କଲା ବ୍ରହ୍ମପୁର ପୋଲିସ

ବ୍ରହ୍ମପୁର: ମୁମ୍ବାଇ ଓ ଚେନ୍ନାଇରେ ଅପରାଧ ଘଟାଇ ଫେରାର ଥିବା ଜଣେ ଗଞ୍ଜେଇ କିଙ୍ଗ୍ ପିନ୍ ସମେତ ୨ ଅନ୍ତଃରାଜ୍ୟ ଅପରାଧୀଙ୍କୁ କାବୁ କରି ବ୍ରହ୍ମପୁର ପୋଲିସ ସେଠାକାର ପୋଲିସକୁ ହସ୍ତାନ୍ତର କରିଛି। ଏମାନେ ବେଆଇନ ଗଞ୍ଜେଇ ଚୋରା ଚାଲାଣରେ ସମ୍ପୃକ୍ତ ଥିବା ଜଣାପଡ଼ିଛି। ସେମାନେ ହେଲେ ଦିଗପହଣ୍ଡି ଥାନା ଇଲାକାର ଧରମପୁର ଗାଁର ରଞ୍ଜନ ନାୟକ (୩୪) ଓ ଗୋଳନ୍ଥରା ଥାନା ଅନ୍ତର୍ଗତ ହନ୍ତୁଳୁ ଗ୍ରାମର କେ.ହୃଷିକେଶ ରେଡ୍ଡୀ (ରିଶି, ୨୬)।

ରଞ୍ଜନ ୨୦୨୧ରୁ ଏନଡିପିଏସ୍ ଆଇନରେ ମୁମ୍ବାଇର ଘାଟକୋପର ଥାନା ପୋଲିସ ଓ ଆଣ୍ଟିନାର୍କୋଟିକସ ସେଲ୍ ଦ୍ବାରା ଓ୍ବାଣ୍ଟେଡ୍ ଥାଇ ଫେରାର ଥିଲା। ସେଠାକାର ପୋଲିସ ବ୍ରହ୍ମପୁର ପୋଲିସର ସହାୟତା ମାଗିଥିଲା। ବ୍ରହ୍ମପୁର ଏସପି ଡା ସର୍ବଣା ବିବେକ ଏମ୍ ନିର୍ଦ୍ଦେଶକ୍ରମେ ଦିଗପହଣ୍ଡି ଥାନା ପୋଲିସ ତା ଗାଁରେ ଚଢ଼ାଉ କରିଥିଲା। ତାକୁ ଗିରଫ କରି ମୁମ୍ବାଇ ପୋଲିସକୁ ହସ୍ତାନ୍ତର କରାଯାଇଛି।

ସେହିପରି ଚେନ୍ନାଇର ଗୋମ୍ମୁଡିପୁଣ୍ଡି ଥାନା ପୋଲିସ ତଥା ପ୍ରୋହିବିସନ୍ ଏନଫୋର୍ସମେଣ୍ଟ ୱିଙ୍ଗ୍ ବ୍ରହ୍ମପୁର ପୋଲିସର ସହାୟତା ଚାହିଁଥିଲା। ଫେରାର ହୃଷିକେଶକୁ ଗୋଳନ୍ଥରା ଥାନା ପୋଲିସ କାବୁ କରି ବ୍ରହ୍ମପୁର ଏସପିଙ୍କ ନିର୍ଦ୍ଦେଶ ଅନୁସାରେ ଚେନ୍ନାଇ ପୋଲିସକୁ ହସ୍ତାନ୍ତର କରିଛି।